Ko e Meʻa ʻOku Fiemaʻu ʻe he Māmaní
Kuo taimi ke fakaʻaongaʻi hoʻo ngaahi mālohi fakapulipulí.
ʻOku ʻikai faʻa hoko tuʻo lahi ia, ka naʻá ke maʻu ha mohe lelei ʻanepō. Naʻá ke ʻā hake kuo fakaivia koe, fakatuʻamelie, mo mateuteu ke fekuki mo ha ʻaho ʻoku fonu ʻi he ngaahi faingamālié.
Ka ʻi hoʻo manga atu ki he māmaní—pea ʻoku kamata ho ʻaho leleí ʻaki e fepaki taha taha mo e fakafeʻātungiá. ʻOku lahi e ngaahi palopalema mo e fekeʻikeʻi ʻoku mafola takaí. Pea neongo hoʻo ngaahi feinga lelei tahá, ka kuo pau ke ke aʻusia e ngaahi palopalema mo e fekeʻikeʻi ko iá. Te ke ikunaʻi fēfē iá? Kae mahuʻinga angé, te ke lava fēfē ʻo tokoni ke fakaleleiʻi ha palopalema lahi pehē?
ʻI he hulufau e taʻeʻofa mo e angakovi ʻi he moʻuí, mei he kē ʻi he halá ʻo aʻu ki he tau lau ʻi he mītia fakasōsialé. ʻOku fiemaʻu ʻe he Tamai Hēvaní mo Sīsū Kalaisi ha kau faʻa fakalelei ʻo laka ange ʻi ha toe taimi kimuʻa!
Naʻe fakaafeʻi kitautolu ʻe Palesiteni Lāsolo M. Nalesoni (1924–2025) ke tau “tautapa muʻa ki heʻetau Tamai Hēvaní ke Ne fakafonu hotau lotó ʻaki ha manavaʻofa lahi ange—tautautefito kiate kinautolu ʻoku faingataʻa ke ʻofaʻí—he ko e manavaʻofá ko ha meʻaʻofa ia mei heʻetau Tamai Hēvaní maʻá e kau muimui moʻoni ʻo Sīsū Kalaisí.”
Naʻá ke maʻu e konga fakaʻosi ko iá? Ko e manavaʻofá ko ha meʻaʻofa ia mei he Tamai Hēvaní. ʻI hono fakalea ʻe tahá, neongo kapau ʻokú ke faingataʻaʻia he taimi ʻe niʻihi (pe tuʻo lahi) ʻi he anga hoʻo fakakaukau pe tōʻonga ki he niʻihi kehé, te ke lava ʻo kamata lotua he ʻahó ni ʻa e meʻaʻofa ʻo e manavaʻofá.
ʻOku fiemaʻu ʻe he māmaní ʻa e angaʻofa kotoa pē ʻe lava ʻo maʻú—ko e monūʻiá leva, he ʻokú ke ʻi ai.