Ko ʻEku Tukupā ʻo e Uike Tapú

Ko e taimi naʻe fakaafeʻi ai kimautolu ʻe heʻeku faiako seminelí ke mau ako ha hingoa pe huafa ʻe nima ʻo Sīsū Kalaisi ʻi he lolotonga e Uike Tapú he taʻu kuo ʻosí, naʻá ku fiefia.

Naʻá ku fili ʻa e ngaahi huafa ke u akó mo e ngaahi potufolofola ʻoku fekauʻaki mo kinautolú. Hili ia peá u fakatolotoloʻi leva e ngaahi huafá ʻi he ʻinitanetí ke u ʻilo honau ngaahi puipuituʻa fakahisitōliá.

Ko e taha e huafa naʻá ku akó ko e “Tangata Tufunga,” he ʻoku mahalo naʻe ako ʻe Sīsū e pōtoʻi ngāue ko ʻení meia Siosefa. Naʻá ku ʻiloʻi ko e kau tufungá naʻa nau ngāue ki he fakaleleiʻí mo e monomonó—hangē ko e founga ʻe lava ai ʻe Kalaisi ʻo fakaleleiʻi mo fakatonutonu kitautolú. Ko e foʻi fakakaukau ko iá naʻe toutou ʻasi hake ʻi ha ngaahi huafa kehe.

Hangē ko ʻení, ʻi heʻeku fakatotoloʻi ko ia ʻe “Pilinisi ʻo e Melinó,” naʻá ku ʻiloʻi ai ko e foʻi lea faka-Hepelū ki he melinó, ko e shalom, ʻo ʻuhinga ki he kakato, napangapanga-mālie, tuʻunga lelei, mo fakafoʻou. ʻOku ou ongoʻi hangē ʻoku fālute kakato ʻe he ʻuhinga ko iá ʻa e lava ʻe Kalaisi ʻo fakaleleiʻi ʻa e fakamavaheʻi mei he Tamai Hēvaní ne fakatupu ʻe heʻetau ngaahi angahalá, ʻo fakafou ʻi Heʻene feilaulau fakaleleí mo ʻetau fakatomalá. Koeʻuhí ko e ngaahi meʻa naʻe hoko ʻi he Toetuʻú, ʻe lava ai ke tau feohi mo hotau Pilinisi ʻo e Melinó mo fakamoʻui kitautolu.

Meimei ʻi he taimi ko ʻení, naʻá ku fehangahangai mo ha ngaahi faingataʻa peá u ongoʻi ʻo hangē naʻe ʻikai ha toe taha ke u falala ki aí. Naʻá ku holomui mei heʻeku fengāueʻaki mo Sīsū Kalaisí koeʻuhí he naʻá ku pehē kuo pau ke u tokoniʻi pē ʻe au au. Ka naʻe tokoniʻi au ʻe he ako ko ʻení ke u ʻiloʻi ta ko ʻeku ngaahi palopalemá naʻe ʻikai ʻaʻaku ke u fuesia tokotaha. Naʻe ʻi ai ʻa Kalaisi ke fua ʻa e kavengá. Ko e taimi pē naʻá ku tuku ai ke Ne tokoni maí, naʻá ku ongoʻi nonga. ʻOku ou ʻiloʻi ʻe lava ʻe Sīsū Kalaisi ʻo fakafoki mai ʻa e konga kotoa pē ʻo ʻeku moʻuí kapau te u fakaʻatā Ia.

Ko hoʻo tuku ko ia ha taimi ke ako ai e moʻui mo e ngaahi ʻulungaanga ʻo Sīsū Kalaisí, te ke fakatokangaʻi ʻokú Ne ʻi ai maʻu pē ke tokoniʻi koe. Ko e taimi naʻá ku fili ai ke feohi mo Ia pea mo ʻilo lahi ange Iá, naʻe lava ke u fakatokangaʻi hoku mahuʻinga ʻi Hono ʻaó. Naʻá ku ongoʻi ʻEne ʻofa kiate aú ʻi he huafa kotoa pē naʻá ku akó.