Ko ha Lotu ke Maʻu ha Nonga

Tā fakatātā ʻa Katelyn Budge

Naʻe kē ʻeku ongomātuʻá ʻi ha taimi ʻe taha. Naʻá ku ongoʻi loto-mamahi ʻaupito ai, pea naʻe ʻikai ke u ʻilo e meʻa ke faí. Naʻá ku tūʻulutui ʻo lotu ki he Tamai Hēvaní, ʻo kole kiate Ia ke fakafiemālieʻi au mo tokoni mai ke u ongoʻi nonga.

Hili ʻeku lotú, naʻá ku fakaava hake ʻa e makasini ʻa e toʻu tupú peá u maʻu ai ha pōpoaki naʻá ne fakamanatu mai ʻa e ʻofa ʻa e Tamai Hēvaní mo Sīsū Kalaisí. Naʻá ne fakapapauʻi mai kiate au naʻe ʻikai ke u teitei tuenoa pea naʻá Na ʻi ai maʻu pē ke tataki, fakamālohia, mo fakafiemālieʻi au. Naʻá ku ongoʻi ha nonga lahi ʻi hoku lotó.

Ne ʻikai fuoloa mei ai, ne u fakatokangaʻi kuo holo foki mo e kē ʻeku ongomātuʻá. Naʻá na fefakamolemoleʻaki peá na toe kamata talanoa. Naʻá ku ongoʻi houngaʻia ʻaupito. Naʻe fakamālohia ʻe he aʻusia ko ʻení ʻeku fakamoʻoni ko e taimi ʻoku tau tafoki moʻoni ai kia Kalaisí, te Ne ʻi ai maʻu pē ke tokoniʻi kitautolu ʻi ha faʻahinga faingataʻa pē.