Ko ho Vā mo Koé
ʻOku mahuʻinga moʻoni hoʻo fakakaukaú mo hoʻo tōʻongá.
Tā fakatātaaʻi ʻe Townen Jones
Ko e taimi ʻokú ke fakakaukau ai ki he vā fetuʻutakí, mahalo ʻokú ke fakakaukau ki ho vā mo hoʻo ongomātuʻá, ngaahi tokouá mo e tuofāfiné, ngaahi kaungāmeʻá, kaungā-akó, pe kakai ʻi he lotú. Ka ʻoku ʻi ai ha vā mahuʻinga ʻe taha ʻe lava ke taʻe-fakatokangaʻi he taimi ʻe niʻihi.
Naʻe pehē ʻe Palesiteni Tietā F. ʻUkitofa, ʻi he taimi naʻe Tokoni Ua ai ʻi he Kau Palesitenisī ʻUluakí, ʻoku ʻi ai hatau vā mahuʻinga “mo hotau ʻOtuá, hotau ngaahi fāmilí, hotau kāingá, mo kitautolu pē.” Ko e anga hoʻo fakakaukau kiate koé—mo hoʻo tōʻonga kiate koé—ʻoku mahuʻinga lahi!
Ko ha ngaahi founga ʻeni te ke lava ʻo tanumaki mo fakamālohia ai ho vā mo koé.
Vakavakaiʻi pē ʻe koe ʻa Koe
Fakakaukau ke tuku ha kiʻi taimi ke kole ai ki he Tamai Hēvaní ke tokoni atu ke ke ʻiloʻi ho tuʻunga totonu he taimi ní. Mahalo ʻe lelei ʻa e ngaahi meʻá, pe te ke fakatokangaʻi ʻoku ʻikai ke nau fuʻu lelei ʻo fakatatau mo hoʻo fiemaʻú. ʻE lava ke tokoni haʻo kiʻi taʻofi siʻi ke vakavakaiʻi hoʻo ngaahi fengāueʻaki fakasōsialé, moʻui lelei fakaesinó, tuʻunga fakalaumālié, mo e ngaahi tafaʻaki kehe ʻo hoʻo moʻuí, ke ke ʻiloʻi ai e ngaahi tafaʻaki ʻokú ke loto ke liliu pe fakaleleiʻí.
Fokotuʻu ha Ngaahi Fakangatangata Lelei
ʻOku mahuʻinga ʻi ho ngaahi vā fetuʻutakí, ke ke ʻai ke ʻilo ʻe ne niʻihi kehé ʻa e ngaahi tōʻonga te ke talí—ke mahino e ngaahi fakangatangatá. Mahalo naʻa ngalikehe ʻi he kamataʻangá, ka ʻi hono ʻai ko ia ke ʻiloʻi ʻe he kakaí ʻa e ngaahi tuʻunga moʻui ʻa e ʻEikí ʻokú ke moʻui ʻakí, meʻa ʻokú ke taʻefiemālie aí, meʻa ʻoku ʻikai ke ke lava ʻo fai he taimi ní, mo e founga ʻokú ke fiemaʻu ke nau fai atu kiate koé, ʻe lava ke hoko ia ko ha tokoni lahi.
ʻI he foungá ni, ʻokú ke fakahaaʻi ai hoʻo fakaʻapaʻapaʻi koé mo ho tuʻunga leleí. ʻOku toe tokoni foki ʻeni ke ke feau ai hoʻo ngaahi fiemaʻú mo fakatupulaki ai ha fetuʻutaki lelei ange, moʻui lelei, mo potupotutatau ange mo e niʻihi kehé. ʻI he taimi tatau pē, ʻe hanga ʻe hono tali ʻo e ngaahi faingamālie ʻokú ne tokoniʻi koe ke ke ngāue lahi ange mo tupulakí—hangē ko hano fai ha lea ʻi he lotú—ʻo langaki hake koe mo hoʻo loto-lahí.
Tuku ha Taimi ki he Ngaahi Meʻa ʻOkú ke Manako Aí
ʻOku ʻikai ko e siokita ia ke ke fakapapauʻi ʻokú ke moʻui lelei pea mo kumi ivi ʻi he lotolotonga kotoa ho ngaahi fatongiá. ʻE lava ʻe hono lau ha tohi leleí, sio he faiva ʻokú ke saiʻia taha aí, fakamoleki ha taimi ʻi tuʻá, pe kau ʻi he hivá, hulohulá, sipotí, pe ʻātí, ʻo ʻoatu ha ivi foʻou ke feau e ngaahi fiemaʻu ʻo e moʻuí pea pehē ki ha ivi foʻou ke tokoni mo ke tokoni ki ha niʻihi kehe.
Fehokotaki mo e Langí
Ko e mahuʻinga tahá, te ke lava ʻo vā lelei ange mo koe ʻi he taimi ʻokú ke ngāue ai ki ha vā moʻoni mo tuʻuloa mo hoʻo Tamai Hēvaní. Te ke lava ʻo ʻunu ʻo ofi ange kiate Ia ʻi he lotú, ako folofolá, taimi ʻi he temipalé, mo ha ngaahi founga kehe. ʻI hoʻo fai iá, naʻe pehē ʻe Palesiteni ʻUkitofa te ke “ako ke ʻiloʻi koe ʻo hangē ko hono ʻafioʻi koe ʻe he Tamai Hēvaní—ko Hono ʻofefine pe foha ʻoku ʻi ai hono ivi fakalangi.”
ʻE tokoni atu hoʻo vakai kiate koe ʻi he founga ko ʻení ke ke faʻa kātaki, angaʻofa, fakaʻapaʻapa, mo faʻa fakamolemole lahi ange ai. Te ke lava ʻo maʻu e mālohi ʻi loto ke liliú, lelei ange ʻi he ʻaho takitaha, mo ngāue ke ke aʻusia ʻa e tuʻunga kotoa ʻoku ʻafioʻi ʻe he Tamai Hēvaní te ke lava ʻo aʻusiá.