ʻAisake R.

17, Lancashire, England

ʻOku ʻikai ke taʻengata ʻa e ngaahi faingataʻá. Neongo kapau ʻokú ke ʻi ha tuʻunga faingataʻaʻia ʻaupito, ʻe lava maʻu pē ʻo lelei ange.

ʻOku ou tā ʻa e ʻōkaní mo e pianó. ʻOku ou manako ai. ʻI he Kilisimasi ne toki ʻosí, naʻe fakahoko ʻe homau haʻofanga lotu fakalotofonuá ha koniseti hiva kilisimasi pea ne kau ki ai ha kakai ʻe toko 1,000 nai. Naʻá ku tā ha foʻi hiva ʻi he kamatá naʻe faingataʻa ʻa e sīpingá.

Naʻá ku faingataʻaʻia ai lolotonga ʻeku akoakó, pea ko e ʻuhinga ia naʻá ku kiʻi loto-siʻi ai kimuʻa ʻi he konisetí. Ka naʻá ku lotu kimuʻa ʻo kole ki he ʻOtuá ke lelei ia pea ke tokoni mai ke u nonga. Naʻe ʻaonga ia! Naʻe ʻikai ke u matuʻaki ongoʻi fiemālie, ka naʻá ku lava ʻo mapuleʻi lelei ke tā fakalelei ia. Ko hono moʻoní, ko e lelei taha ia kuó u tā ʻaki e konga ko iá.

ʻOku ʻuhinga ʻa e sio kia Kalaisí ki hono ʻiloʻi ʻokú Ne tokoniʻi kitautolu ʻi heʻetau moʻui fakaʻahó. ʻOku ou ongoʻi mālohi taha ʻa e Laumālié ʻi he mūsiká, ko ia ko e tuʻu ʻo tā ʻōkani ʻi muʻa ʻi he tokotaha kotoa pē mo fanongo ki he hiva fakataha ʻa ha kakai ʻe laungeaú ko ha ongo mālohi ia. ʻI hoʻo ʻiloʻi kuó ke tokoniʻi ha taha kehe ke ne ongoʻi e Laumālié ʻe lava ke tokoniʻi ai koe ke ke ongoʻi ʻa e Laumālié.