Faafofoga Mai,Tagata Faimalaga i le Taimi!

O ata na tusia e Dave Murray

Vaai faalemafaufau i se masini o le taimi na faafuasei ona tu mai. Ae e te le’i fiafia tele e tietie i se manu taufulufulua, o le vaega le manuia lea: e na ona faatagaina ai lava o oe e toe foi i tua ma asiasi i le tagata lea sa avea ai oe!

Laa atu i totonu o le masini … saofai ma faamau agai i le nofoa … ma vwaaap! Ua faafuasei ona e tilotilo ia te oe ao e laitiiti. O le a lau tala o le a e fai atu ia te oe? Atonu o lou lava tagata laitiiti o loo i ai i sona aso lelei, ma e te fai atu ia te oe lava ia fiafia i minute uma. Pe atonu o loo i ai i sou aso faigata, ma e te tuuina atu ia te oe se opo agaalofa.

Afai o a’u lea, o le a tele se avanoa lea o lo’u tagata laitiiti o le a atuatuvale e uiga i se mea. Sa tele lava ina ou popole ona sa ou inoino i le faia o mea sese! Ou te le’i lelei i suiga, e pei o le siitia atu i se vasega po o se aoga fou. Ma sa tele taimi sa ou lagonaina ai e pei ou te le’i fetaui lelei ai i na tulaga.

Talu mai lena taimi, ua ou aoaoina ai ni tomai mo le taulimaina o nei mafaufauga ma lagona.

Afai e mafai ona ou toe malaga i tua i le taimi, o ni fesoasoaniga faapolofesa nei o le a ou faasoa atu i lo’u lava tagata laitiiti:

• Aemaise lava pe a faataitai se mea fou, o le a e faaletonu—ma e le afaina lena mea! Faataitai le agaalofa ma faamalosi’au ia te oe lava. E pei ona saunoa Jeffrey R. Holland i se tasi taimi, “O tagata lē atoatoa o tagata uma ia sa tatau ona galulue faatasi ma le Atua. Atonu o se tulaga e matua faanoanoa ai o Ia, ae o loo Ia taulimaina pea lava. E ao foi la ona tatou faapena. … Ia onosai ma agalelei ma loto faamagalo.” O aso nei pe a ou faataitaia se mea fou, ou te tuuina ia te a’u lava se tautalaga e tapenapena ai, e pei o le, “Atonu o le a faigata lenei mea. Ae o le mea lena e aoga i ai nai taumafaiga muamua lava! Ona mafai lea ona ou faataitai ma faaleleia.”

• E le afaina le lagona o le faanoanoa pe a suia tulaga, aemaise lava faauoga. Ia talitonu o sootaga e sili atu ona lelei a o e tuputupu ae. O le a faateleina lou lalolagi faaagafesootai. O le a e aoao e seti ni tuaoi ina ia faaitiitia ai le noatia i tagata o e aumaia le le lelei i lou olaga pe uma ai lou malosi faalelagona ma faaleagaga. Ma o faauoga moni o le a tuputupu ae i le aluga o taimi. A o e faalatalata atu pea i le Tama Faalelagi ma le Faaola—o au sootaga aupito sili ona taua—o le a La taialaina oe i se lumanai loloto ma le fesootai.

• O le a e oo i vaitau tuuatoatasi o le olaga, ae o le a pasi uma na vaitau. E malamalama le Faaola i le tiga o le tuuatoatasi ma o le a savavali faatasi ma oe i lena auala. O le a iu ina e feiloai i tagata o e alolofa ia te oe ma faasoa atu mea e te fiafia i ai. Ma e te iloa? O ou aafiaga o loo fesoasoani moni lava ia te oe e atiina ae se malosiaga: loto malamalama! Ona ua e iloa le lagona o le tuulafoaiina, o lea e te lelei atili ai i le iloaina ma le faaaofia ai o isi i le ala o le a faia ai e le Faaola.

O le uiga moni o lenei faamatalaga? O le olaga e faaauau pea ona lelei atili ma lelei atu! E pei ona faamautinoa mai Peresitene Russell M. Nelson ia i tatou: “E tele naua mea tatou te tulimatai atu i ai! …

“Ou te le o fai atu o aso o i luma atu o le a faigofie, ae ou te folafola atu ia te outou o le a mamalu le lumanai mo i latou ua saunia ma ē e faaauau pea ona saunia ina ia avea ma meafaigaluega i aao o le Alii.”

E le faapea la o se laina sao ma le atoatoa agai i luga i aso uma. Ou te mafaufau atili i le olaga e pei o se sai e tolu ona itu, lea e foliga mai ai o nisi taimi e foliga mai o loo ou feagai pea lava pea ma faafitauli masani. Ae a o ou mulimuli pea ia Iesu Keriso, o loo ou agai moni atu i se vaalele faaleagaga e maualuga atu nai lo le mea sa ou i ai muamua—agai i luma ma luga.

O lou taimi la lenei. O le a se mea o le a e ta’u atu i lou tagata laitiiti? Ma, ina ia toe laa atili atu i luma, o le a sou manatu o lea se mea o le a toe foi mai lou tagata i le lumanai ma fai atu ia te oe i le taimi nei?!

Oka. Ua tele nauā na mea e mafaufau i ai. E sili lo latou taofi ao le’i pa se faiai o se isi. Manuia lau malaga i le taimi!