Suesue Loloto Atu i le Tusi o Kenese

O le tala ia Iakopo, Esau, ma le “mea tunu” o loo i ai ni nai lesona mo i tatou.

E tusa ai ma le Kenese 25:29–34, na sau Esau i le fale ma le fiaai ina ua mavae se galuega faigata o le aso ma fesili atu mo nisi o “mea tunu,” po o se sitiū, lea sa kukaina e lona uso o Iakopo. Na fai mai Iakopo o le a ia faafesuiaia le mea tunu mo le “tofi ulumatua” a Esau—o lona uiga, o le tofi faapitoa, tiutetauave, ma le pule lea na agavaa i ai Esau i le avea ai ma atalii ulumatua o Isaako.

Sa tali mai Esau, “Ua lelei, ua ou matelaina. O le a le aoga o se tofi ulumatua i se tagata matelaina?” Sa la faia le fefaatauaiga. O le faia o lenei mea, na faaalia ai e Esau o lona tofi ulumatua sa leai se tāua ia te ia.

Atonu o loo tatou misia nisi o faamatalaga i lenei tala (tagai i le Mose 1:23, 41; Mataupu Faavae o le Faatuatua 1:8). E le o manino pe aisea o le a le faasoa atu ai e Iakopo ana meaai i lona uso.

O le manatu, sa le afaina mo Esau le faafesuiaia o lona tofi ulumatua mo se pesini sitiū—po o soo se mea lava.

E mafai ona e mafaufau i le “tofi ulumatua” i le ala e te mafaufau ai i le “amiosao” po o le “mamalu.” Pe o le a e faafesuiaia mo ni nai minute o le lotomalie po o le faamalieina? Pe o le a e lafoaia le faavavau mo le fiafia mo se taimi lē tumau?

E foliga mai e faavalevalea le faafesuiai o lou tofi mo le supo. Ae o le mea moni, o le a faavalevalea le faafesuiai o le fiafia e faavavau mo soo se mea.

Na folafola atu e le Alii ia Aperaamo o le a avea o ia ma “tupuaga o nuu e tele” (Kenese 17:4). O le mea lea, o Aperaamo ma lona toalua, o Sara, e le’i i ai lava se la fanau ma ua matutua nei.

Sa fiafia Aperaamo i le manatu o le a maua se pepe a Sara, ae sa le talitonu. “E fanau mai ea se atalii i le tagata ua selau ona tausaga? O Sara foi, e fanau ea ia ua iva sefulu ona tausaga?” na ia fesili ai (Kenese 17:17).

Ioe, sa maua se tama a Sara—o Isaako, o lona atalii o Iakopo (o Isaraelu) o le tamā i ituaiga e sefululua.

E masani ona faia e le Alii ni folafolaga e foliga mai o se mea e lē mafai e o tatou mafaufau faaletino. Ae peitai, a tatou faamaoni, Na te tausia pea na folafolaga!

Aua le popole i le “pe faapefea.” Tuu atu lena mea ia te Ia.

Ina ua poloaiina e le Alii ia Aperaamo e ositaulaga lona atalii o Isaako, o se faatusa o le Togiola a Iesu Keriso, lea o le a oo mai i le tele o tausaga mulimuli ane (tagai i le Iakopo 4:5). O nisi nei o manatu e mafaufau i ai:

• Ua ta’u atu e le Alii ia Aperaamo e ave Isaako i “le nuu o Moria” (Kenese 22:2), o le nofoaga lea sa fausia mulimuli ane ai Ierusalema ma sa faasatauroina ai le Faaola.

• Ua amo atu e Isaako fafie mo le taulaga mu (tagai i le Kenese 22:6), e pei lava ona aveina e Iesu Lona lava satauro (tagai i le Ioane 19:17).

• Ina ua fesili Isaako po o fea le tamai mamoe e osi ai taulaga, na fai mai Aperaamo: “E aumai e le Atua se tamai mamoe māna e fai a’i le taulaga mu” (Kenese 22:8). I le taimi puupuu, sa tuuina atu e le Atua ia i la’ua se mamoe po’a e osi ai taulaga nai lo Isaako (tagai i le Kenese 22:13); i le taimi umi lava, na afio mai ai Ieova lava Ia i le lalolagi ma sa ositaulagaina mo i tatou.