Na o le Faaeletonika
O Tulaga Lelei e 7 o loo Ia te Oe o se Au Paia o Aso e Gata Ai i Tausaga o le Atamai Faafoliga
O lenei tekinolosi fou o le a aumaia ai suiga. Ae ua saunia lelei oe e taulimaina lena vaega.
Atonu na e faalogo e uiga i le atamai faafoliga (AI). O le isi mea tele e sosoo ai, e foliga mai—o komepiuta ia e mafai ona tali atu ma faaosofia ai mea i auala e foliga mai e talitutusa ma le atamai o le tagata.
Atonu foi ua e faalogo i ni nai valoaga e uiga i le atamai faafoliga. O mea e pei o le: “O le a aveesea ai a tatou galuega!” “O le a fatuina ai ni galuega fou!” “O le a faaumatia ai le lalolagi!” “O le a faaleleia ai le lalolagi!”
Tatou te le iloa tonu po o le a le mea o le a tupu, ae o le mea e tasi e mautinoa: o meafaigaluega AI ma tekinolosi ua leva ona mafua ai se tulaga vāvāō.
I le avea ai ma se tagata auai O Le Ekalesia a Iesu Keriso o le Au Paia o Aso e Gata Ai, e i ai ni ou tulaga lelei faaleagaga i lenei vaitau aliae o le atamai faafoliga lea e mafai ona fesoasoani ia te oe e maua ai le olioli ma le filemu sili atu. E mafai ona e aoao e uiga i ai i tusitusiga paia ma upu a perofeta o aso nei. O ni nai vaega ia e fitu, e le o i ai i se faatulagaga faapitoa.
1. Ua e iloa lou faasinomaga moni ma lou tāua—ma le tāua o fanau uma a le Atua.
O oe o se atalii/afafine o le Atua. E faapena foi tagata uma i le lalolagi. O le galuega ma le mamalu o lou Tama Faalelagi o le fesoasoani lea ia i tatou ia avea faapei o Ia (tagai i le Mose 1:39). “Ua tele lava le taua o agaga i le silafaga a le Atua” (Mataupu Faavae ma Feagaiga 18:10). O le iloaina o lou tāua—ma le tāua o tagata uma—o lona uiga e te faatauaina mea ua avea ai i tatou ma fanau a le Atua ma mea e mafai ona tatou faia.
Ua lapatai mai Elder David A. Bednar o le Korama a Aposetolo e Toasefululua e faapea o le AI “ua i ai le gafatia e punitia ai lo tatou faasinomaga moni o ni atalii ma ni afafine o se Tama Faalelagi alofa.” Ae o le a e le faatagaina le faigofie ma le malosiaga o le AI e faatauaso ai oe i le mea moni e faapea, o tagata soifua (po o fanau a le Atua) e sili ona tāua i fofoga o le Atua. E le o tupe, e le o le faafaigofieina, e le o ni manatu faalemanino o le “alualu i luma,” ae o tagata. E te faatauaina mea e mafai e fanau a le Atua ona fai ma fatufatu.
2. Ua e iloa e mafai ona faaaoga tekinolosi mo faamoemoega lelei po o le leaga (po o le faavalevalea).
Soo se meafaigaluega po o tekinolosi e mafai ona faaaoga mo le lelei po o le leaga. Ua uma ona muai lapataia ai oe e uiga i lenei mea. (Mo se faataitaiga, o le faaaogaina o le initoneti e fai ai talafaasolopito o aiga e manaia; o le faaaogaina e maua ai ponokalafi e matuai le manaia lava.) Ona i ai lea o mea e le lelei tele pe leaga ae na o le faavalevalea—mo se faataitaiga, o mea uma faamaimau taimi e le magafagafa, e leai se uiga o loo i ai iina i le matamata faasolosolo e le iu.
E faapena foi, o nisi o faaaogaaga o AI e mafai ona lelei tele (mo se faataitaiga, e faaaoga ai ma faaliliu ai gagana po o le tuufaatasia o punavai e sailiili ai se autu). Ona toe fai atu lea, o nisi e leaga pe faavalevalea (mo se faataitaiga, e faaaoga e tusi ai se lauga i le sauniga faamanatuga, kopi i le aoga, pe faia ni vitio loloto pepelo o tagata lauiloa).
O le mafaufau lelei e mafai ona taialaina oe i le auala e te mafaufau ai e uiga i le AI, ae o le mea e sili atu ona tāua, e mafai e le Agaga Paia ona fesoasoani ia te oe e iloatino mea e lelei pe leaga (pe na o le faavalevalea lava) e uiga i ai (tagai #5).
3. E te faatāuaina lou faitalia.
O lou faitalia—o lou tomai e filifili ai ma faatino—o se mea tele. Sa saili Satani e faaumatia ina ua ia fouvale i le Tama Faalelagi i le Fono Tele ae tatou te le’i o mai i le lalolagi (tagai i le Mose 4:3). O le a la le mea e fai e le AI i le faitalia? Ua lapataia i tatou e Elder Bednar: “Ona ua faaofiofiina le AI i le faatuatuaina ma folafolaga o le alualu i luma faasaienisi, atonu o le a faaseseina i tatou i le lafoaia o lo tatou faitalia tāua i se tekinolosi lea e na o le telesitila lava e mafai ona mafaufau i ai. O le faia o lena mea, e mafai ai ona faasolosolo malie ona suia i tatou mai sui e mafai ona galulue i mea faitino ia e na o le faatinoina lava.”
Ona e te faatāuaina lou faitalia, o le a e le faatagaina ai le AI e taofia e ala i le lafoaia o lou taimi atoa, gauai atu, malosi fatufatuai, ma le faia o faaiuga i ai. Ma e mafai foi ona e faaaogaina lou faitalia e ala i le le filifili e faaaoga le AI pe a mafai. O le mana lena o le faitalia: e te filifili; e te faatino.
4. E te fiafia i le upumoni.
Ona o oe o se soo o Iesu Keriso, ua e fiafia ai i le upumoni. O lea la, o le manatu o le faaaogaina o le AI i soo se auala o le a lagona ai le lē faamaoni po o le taufaasese e lagona ai le sese. Atonu e faaosoosoina le pasi ese atu o le galuega na faagaoioia e le AI e fai ma au oe lava galuega. Ae ona e te fiafia i le upumoni, o le a e le faia ai lena mea.
E le gata i lea, ua e iloa le auala e saili ai mo le upumoni. Ua e iloa afai e tuuina atu e le AI ia te oe faamatalaga ae e le faasino atu oe i punavai faatuatuaina mo lena faamatalaga, e tatau ona e faaeteete i le faatuatuaina o lena mea.
Ma ua e iloa ua na o se meafaigaluega, ae le o le puna o le upumoni mai le Atua. O loo maua lena mea i tusitusiga paia ma upu a perofeta, faapea foi e ala i le Agaga Paia. E pei ona aoao mai Elder Gerrit W. Gong o le Korama a Aposetolo e Toasefululua, “O le atamai faafoliga e le mafai ona suitulaga i faaaliga po o le faatupuina o le upumoni mai le Atua.”
5. Ua ia te oe le meaalofa o le Agaga Paia.
O le meaalofa o le Agaga Paia e mafai ona fesoasoani ia te oe e iloatino ai le faaaogaina lelei ma le leaga o le AI. O lenei meaalofa e mafai foi ona aumaia ia te oe le mafanafana ma le filemu i se lalolagi lea e foliga mai ua sasau atu i fesouaiga faaupufai, faaletamaoaiga, ma faaleamioga i le ala mai o lenei tekinolosi aliae. A o e faamaoni i au feagaiga, ua ia te oe le folafolaga a le Atua e uiga i lenei taitaiga ma le faamafanafanaga (tagai i le Mataupu Faavae ma Feagaiga 82:10).
6. E te faatauaina le aoaoina, galue, ma le tuputupu ae.
O le faamoemoega o le fuafuaga a le Tama Faalelagi e mo i tatou ia avea atili e faapei o Ia. Ona ua e iloa lenei mea, ua e iloa ai o le paie i taimi uma e feteenai ma lena faamoemoega. Ma o lea e te iloa ai o le faapea atu, “Na o le tuu atu lava i le AI e nate faia,” i taimi uma lava e le o le manatu lea. O le ola ma le aoaoina e faatatau i le atiina ae o lou mafaufau, o ou tomai, ma lou malamalama; e le o faatatau i le tuuina atu ina ia faia se galuega, o ou mafaufauga ma faamasinoga i se masini.
Ma ona ua e iloa "e fiafia le Alii i taumafaiga," ua e iloa o le faagasologa o le aoaoina e taua tele e pei o mea e te gaosia o se taunuuga (pepa, tofiga, suega, togi, tikeri, lauga o sauniga faamanatuga, ma isi mea faapena), aua o le faagasologa o iina e tupu ai le tuputupu ae.
E pei ona aoao mai Elder Bednar, “O le faamoemoega e le na o le gaosiga po o le tuuina atu o anotusi faagaeetia; ae, o le galue ma le avea ma mea ua faamoemoeina ma faananau mai le Atua mo i tatou ia avea ai.”
7. E te faatāuaina le sootaga ma le Atua ma Ana fanau.
E te manao i se sootaga moni ma tuusao i le Tama Faalelagi e ala i le tatalo, suesue i tusitusiga paia, ma isi auala faaleagaga. O le a e le faatagaina ai le AI e faalavelave i lena fesootaiga. E te manao foi i se fesootaiga moni i tagata. E le na ona e manao i se vaega faataitai o le mafutaga faaletagata. E te manao i le mea moni. E te manao e fesootai ma isi fanau a le Atua, o ē e i ai agaga ma mafaufau ma tino.
E pei ona saunoa Elder Bednar: "O se soa AI ua na o se faagasologa faamatematika. E le fiafia ia te oe. E le popole ia te oe. E le iloa moni pe o e i ai pe leai.”