E Mafai Faapefea Ona Ou Ola i Lo’u Olaga ma le Faamoemoe?

O le faamoemoe ma le lototetele o se faaiuga lea e mafai e i tatou taitoatasi ona faia. O lenei uiga faaalia e masani lava ona amata i le lotofaafetai. O le lotofaafetai o le laasaga muamua lea i le faamoemoe ma le fiafia.

E tele naua mea e tatau ona lotofaafetai ai. Ua tatou ola i le tisipenisione faaiu ma ua i ai le talalelei toefuataiina a Iesu Keriso e le gata ina taialaina ai i tatou i le taimi nei ae ia tuuina mai foi ia i tatou se lumanai susulu ma le mamalu pe a mavae lenei olaga.

O le aoaoga faavae ma le aganuu o le talalelei a Iesu Keriso o le faamoemoe. O le fuafuaga o le fiafia o le fuafuaga a se Tama oi le Lagi alofa e faamanuia ai Ana fanau uma. E leai ni tapulaa faailogalanu pe faaleaganuu i lenei fuafuaga uma ua aofia ai.

O la’u tatalo patino ia mafai ona tatou faasoa atu atoatoa le talalelei i fanau uma a lo tatou Tama. O la’u tatalo foi ina ia mafai ona tatou lotogatasi ma eseesega ma ia mafai ona tasi i tatou ma le Faaola.

Ou te fiafia i le tatalo faatoga a le Faaola mo i tatou. Na tupu moni lava i itula faaiu o Lona soifuaga faaletino e pei ona tusia i le Evagelia a Ioane. O lena tatalo na tuuina sao atu i soo o Keriso, e aofia ai ma i tatou, o le talosaga lea a le Faaola i Lona Tama: “ina ia tasi i latou uma; faapei o oe le Tamā o i totonu ia te au, o a’u foi o i totonu ia te oe, ina ia tasi i latou i totonu ia te i taua.” I le fuaiupu lenei o loo faaauau ai pea le Faaola, “O le manuia foi ua e foai mai ia te au ua ou foaiina atu ia te i latou; ina ia tasi o i latou, faapei o i taua ua tasi.” O le tasi o le mea lea na tatalo ai Keriso a o lei oo i Lona faalataina ma le Faasatauroga.

Ua tuuina mai se luitau loloto mo lo tatou tisipenisione i le amataga o le Toefuataiga o le talalelei a Iesu Keriso. O le ala o le amiotonu ua faavaeina e le Alii i luga o mataupu faavae faigofie ae faavavau: E tatau ona tatou manatu mamafa i o tatou uso ma tuafafine e pei o i tatou lava. E tatau ona tatou faataitaia le mama ma le paia. E tatau ona tasi i tatou. Afai e le tasi i tatou, e le o i tatou o Ni Ana.

Ina ia tasi, e mafai ona tatou aoao mai le taimi ua tuanai ma saunia mo le lumanai.

O a nisi o auala e mafai ona tatou maua ai le filemu i lenei lalolagi fesuisuiai ma fefinauai?

• E mafai ona tatou i ai i le lalolagi ae lē o ni o le lalolagi.

• E mafai ona tatou naunau e aua nei faatagaina le amioleaga, fefinauaiga, ma fevaevaeaiga e osofaia ai le paia o a tatou taumafaiga tuufaatasi e mulimuli ma tapuai i le Faaola i o tatou aiga ma auaiga.

• E mafai ona tatou ola i le itu lagilelei o le auala a o tatou tumau mausali i luga o le ala o feagaiga.

• E ui e le mafai ona tatou pulea isi, ae e mafai ona tatou ausia le filemu lea e sau mai le amiotonu faaletagata lava ia.

E mafai ona tasi i tatou i a tatou faapotopotoga i soo se mea tatou te nonofo ai. Sa silafia e le Aposetolo o Paulo o valaauga, auaunaga, ma saofaga a tagata o le ekalesia sa matuai eseese lava, ae e tutusa lava le taua. Sa ia faatusaina foi vaega o le tino o le tagata i le tino o le Ekalesia. O vaega taitasi o le tino e tāua i le tino atoa.

O nisi tagata o le ekalesia e i ai luitau i le lagonaina e tāua i latou ma e tatau ai i le tino o le Au Paia. O le manatu o le Aposetolo o Paulo o tagata taitoatasi e tatau ai ma e tāua.

I le faaiuga: Afai e te taulai atu lou olaga i le Faaola, o le a e i ai i le itu susulu o le auala ma maua le olioli.

Na aoao lelei mai Peresitene Nelson:

“Ua faatumulia le olaga i auala alo ma vaega faaiu e muta, o tofotofoga ma luitau o ituaiga eseese uma. Atonu e tofu i tatou ma ni taimi na toetoe lava a fano ai i tatou i le faanoanoa, mafatiaga, ma le faanoanoa. Ae e tatau ona tatou maua le olioli?

“Ioe! o le tali puupuu o se ioe manino!

“… E mafai ona fiafia le Au Paia i lalo o tulaga uma. E mafai ona tatou lagonaina le olioli e tusa lava pe i ai se aso leaga, se vaiaso leaga, po o se tausaga leaga foi! …

“O le olioli tatou te lagonaina e itiiti lava se mea e faatatau i tulaga o o tatou olaga ma mea uma e faatatau i le taulaiga o o tatou olaga.”

O lena taulaiga o le Faaola!

Ou te molimau atu afai tatou te naunau e ola i le itu lagilelei o le auala, faatasi ai ma le malamalama o le Faaola e fai ma o tatou taulaiga ma o tatou taiala, o le a tatou i ai i luga o le ala o feagaiga. A o tatou alolofa, mulimuli, ma tapuai i le Faaola, o le a tatou maua le “filemu i lenei lalolagi, ma le ola e faavavau i le lalolagi a sau.”