Sa Ou Filifili e Maua O’u Faaeega Paia i le 18

Sa ou filifili ou te manao e maua o’u faaeega paia i le malumalu i le taimi lava e atoa ai lo’u 18. O le konafesi aoao na aoaoina ai au o feagaiga o le malumalu o le a aumaia faalatalata atili ai i tatou i le Faaola, o le mea tonu lava lea sa ou sailia.

Sa ou iloaina o se tiutetauave tele le osia o se feagaiga ma le Alii, o lea sa ou manao ai ia mautinoa o feagaiga o le malumalu o se mea sa ou manao e tautino atu i ai. Sa ma talanoa ma lo’u epikopo, suesue, ma faia le kosi sauniuni mo le malumalu. O le taimi lava na ou malamalama ai i tautinoga o le a ou faia, sa ou lagonaina le saunia. Sa ou saunia e tausia la’u folafolaga.

Sa ou alu i le malumalu i Lisbon, Potukale, lea pe tusa ma le tolu ma le afa itula le mamao. Sa o se aafiaga lelei tele. Atonu ou te lei malamalama i mea uma talu mai lo’u taimi muamua lea, ae sa ou lagonaina le alofa o le Atua, ma sa ou malamalama po o ai moni lava au: o se afafine o le Atua e i ai se gafatia ofoofogia.

E le manaomia ona tatou faatali seia tatou atoatoa e liliu atu ia te Ia. O le alu i le malumalu mo le taimi muamua, mo i tatou lava, o se taimi o le tuputupu ae tele. E faamalosia moni ai la tatou sootaga ma Keriso. Ou te manatu la o soo se tasi e i ai le manao e tatau ona tatalo e uiga i ai ma saunia, ma afai o lo latou manao lena, o lona uiga o le malumalu o le nofoaga sili lea mo i latou e o i ai.