Olioli ma le Ala o Feagaiga
O le ala o feagaiga o se ala moni lea o le alofa togiola.
Malamalama ma le Ola, saunia e Mandy Williams
Ina ua tuua e Isaraelu ma Elisapeta Haven Barlow ia Navu, Ilinoi, mo le Vanu o Sate Leki i le 1848, sa la tuua ai iina se pepe tama sa tanumia i se fanuatanu laitiiti i Navu. O James Nathaniel Barlow, le la tama muamua, na maliu ae lei leva ona fanau mai ia Me 1841.
Atonu e lei mafaufauina lava e Isaraelu ma Elisapeta e toe vaavaai atu i le tuugamau o lo la atalii. Ae ina ua valaauina Isaraelu i se misiona i Egelani i ni nai tausaga mulimuli ane, sa ia ui atu i Navu. I le talosaga a Elisapeta, sa afe ai o ia e su’e le tuugamau o le la tama ma sii atu i le fanuatanu autu.
Ina ua maua e Isaraelu le tuugamau, sa ia vaaia ua pala ma ta’ei. I se tusi i lona toalua, na tusia ai e Isaraelu na ia filifili e tuua le tuugamau ma toe foi mai i ai i le lumanai.
E le’i silia ma ni nai futu na ia savali ese atu ai ma le tuugamau ae ia faalogoina se leo i lona mafaufau o faapea mai, “Tama, aua e te tuua a’u iinei.” Sa toe foi atu Isaraelu i le tuugamau, ma lana faaiuga e aveese mai si ona atalii laititi.
A o i ai pea Isaraelu i le tuugamau, sa ia ta’u atu ia Elisapeta, “Sa ou lagonaina se manao e tuuto atu a’u lava ma mea uma lea e ono ta’ua o a’u mea, i aao o le Alii ina ina ia mafai ona faitaulia lo’u agavaa e o mai faatasi ma [James] i le taeao o le Uluai Toetu.”
O le tuuto atu o Isaraelu i le talalelei a Iesu Keriso ma le faamamaluina o feagaiga paia ua faia ai le ola e faavavau—lena faamanuiaga silisili o faamanuiaga uma—o se mea e mafaia mo ia ma faamanuiaina ai lona aiga—o tuaa ma fanau.
E moni foi lena mea mo i tatou uma lava.
Folafolaga Paia
E alolofa lou Tama Faalelagi ma Lona Alo, o Iesu Keriso ia te oe e sili atu nai lo soo se mea lava e mafai ona e mafaufauina. La te mananao e faalatalata atili atu oe ia i Laua ma fesoasoani ia te oe e aoao ma tuputupu ae i le faatuatua ma le malamalama. La te mananao e faamanuia oe i le mana faalelagi, faamalologa, ma le filemu i se lalolagi lea e mafai ona faigata ona maua ai na faamanuiaga. La te mananao ia e lagonaina le olioli i lenei olaga ma i le olaga a sau.
O le tafe mai i lenei alofa atoatoa, La te ofoina atu ai i tagata uma le avanoa e ulu atu ai i se sootaga faalefeagaiga ma i Laua i le papatisoga ma i le maota o le Alii. Ua tatou maua le faamanuiaga o le toe tuuto atu i na feagaiga i vaiaso taitasi i le taimi o le sauniga faamanatuga.
Pe a tatou aai ma feinu i le faamanatuga, tatou te tauaveina i o tatou luga le suafa o Iesu Keriso. Tatou te manatuaina o Ia ma Lona alofa mo i tatou lea e faaalia e ala i le meaalofa o Lana Togiola. Tatou te faaalia foi lo tatou naunau e tausi Ana poloaiga (tagai i le Mataupu Faavae ma Feagaiga 20:77, 79).
Na saunoa Peresitene Russell M. Nelson: “E tele ina ou faalogo i le faaupuga tatou te aai i le faamanatuga e faafou ai feagaiga na osia i le papatisoga. E ui e moni lena mea, ae e matuā sili atu i lo lena.” Na saunoa mai Peresitene Nelson o taimi uma tatou te aai ai ma feinu i le faamanatuga tatou te osia ai se feagaiga fou, “o le taui lea e faia ai e [le Alii] le faamatalaga e faapea o le a tatou maua pea Lona Agaga e faatasi ma i tatou. E maeu lea faamanuiaga!”
Pe a tatou salamo ma aai ma feinu i le faamanatuga ma se loto mama, tatou te maua le Agaga Paia ma “faamamaina mai agasala e peiseai ua tatou toe papatisoina. O le faamoemoe ma le alofa mutimutivale lea ua ofoina mai e Iesu ia i tatou taitoatasi.”
E maeu le olioli i le salamo ma le faamagaloina e ala i le alofa togiola o Keriso!
O Lona Maota o le Olioli
Talu mai le avea ma Peresitene O Le Ekalesia a Iesu Keriso o le Au Paia o Aso e Gata Ai, sa saunoa soo mai ai Peresitene Nelson e uiga i le ala o feagaiga. Tatou te ulu atu i lena ala e ala i le “salamo ma le papatisoga i le vai” (2 Nifae 31:17), ma “ona tatou ulu atoa atu ai lea i le malumalu.”
O lo tatou olaga faaletino ua na o se taimi i lo tatou olaga, ae o lena taimi—o nisi taimi e faigata tele—e faavavau le taua. Ina ia faia o tatou olaga ia matagofie ma i ai se faamoemoe, ua saunia ai e lo tatou Tama Faalelagi se Faaola. E ala i Lona alofa ma le taulaga togiola, sa Ia taulimaina ai ma faamaloloina mea uma o le a tatou fetaiai i le olaga. Ma ona o Lona maota paia—Lona maota o le olioli—o le a lelei ai mea uma e ui lava i faigata.
Malumalu o San Pedro Sula Honotura
O le ala o feagaiga o se ala moni lea o le alofa togiola. A o e osia feagaiga i le malumalu, ona faamamaluina lea o i latou, o le a e maua faamanuiaga o le mana sili atu, alofa sili atu, alofa mutimutivale sili atu, malamalama sili atu, ma le faamoemoe sili atu.
Faapotopoto i Latou i le Fale
Ua i ai ia i maua ma Sister Kearon se lagona maaleale faapitoa ma le agaalofa tele mo Isaraelu ma Elisapeta Barlow. O le ma tama muamua, o se tamaitiiti e igoa ia Sean, na maliu i le taimi o le taotoga o le fatu ina ua faatoa tolu vaiaso lona matua. O se faalavelave sa nutipalaina ai lo ma lalolagi. I lena taimi, sa ma taumanatunatu pe mafai ona maua ola pea. Sa ma tanumia o ia i se tuugamau laitiiti sili ona tiga i Egelani. I le sefululima tausaga mulimuli ane, sa talosagaina ai lo matou aiga e siitia ese mai lo matou aiga i le Malo Aufaatasi e auauna atu i le taimi atoa i le Ekalesia, ma sa matou tuua ai lena tuugamau laitiiti.
Ua matou maua le amataga o se malamalamaaga i le mea na oo i ai le au Barlows. O le tuugamau o le ma pepe e matua mamao lava, ae e pei o le aiga o Barlows, ua matou maua le faatuatua tumau i le Toetu o Iesu Keriso ma le natura e faavavau o lo matou aiga e ala i le feagaiga paia o le faamauga.
E tofu uma i tatou ma tuaa ma isi e pele i tua atu o le tuugamau o loo fai mai ia i tatou,“Aua e te tuua a’u iinei.” Ona o feagaiga o le malumalu, e leai se tasi e manaomia ona tuua. O lo tatou valaauga o le alofa ia i latou, auauna atu ia i latou, ma fesoasoani e faapotopoto mai i latou i le aiga.
O le mafuaaga lena ua i ai ai a tatou sauniga. O le mafuaaga lena ua tatou faia ai feagaiga. O le mafuaaga lena ua tatou fausia ai malumalu. O le mafuaaga lena na auina mai ai e le Tama Faalelagi Lona Alo e motusia noataga o le oti ina ia i ai se aso e mafai ai ona tatou faamaligiina loimata o le olioli i faatasiga e faavavau ma ē pele ia i tatou o loo faatalitali mai mo i tatou ma i le afioaga o le Tama ma le Alo.
E alofa lo tatou Tama Faalelagi ia i tatou—o oe ma a’u. Tau ina ia tatou maua le olioli ma le filemu a o tatou tausia a tatou feagaiga ma auai faatasi ma le Alii i Lana galuega faaola mamalu.