E te Fia Maua le Olioli Sili Atu? Faataitai le Lotofaafetai
A tumu lou olaga i suiga, e mafai ona fesoasoani le lotofaafetai ia te oe e taulai atu ai i le lelei ma tumau ai i le faamoemoe.
Ata na tusia e Maggie Stephenson
“O le a le sili atu lava lou fiafia nai lo lou lotofaafetai.”
E pei lava ona fautuaina mai e lenei upusii mai ia Elder Gary B. Sabin o le Fitugafulu, o le fiafia o loo ia te oe e uunaia sa’o lava e le lotofaafetai o loo ia te oe. E talafeagai lelei—pe a e lotofaafetai, o loo e taulai atu i mea lelei nai lo mea lē lelei.
Ae, e le o taimi uma e alu ai le olaga e pei ona fuafuaina. O suiga e le’i faamoemoeina e ono atili ai ona e atuatuvale, faanoanoa, po o le ita nai lo le fiafia. Ae a faigata mea uma, e mafai ona fesoasoani le lotofaafetai ia te oe e tumau ai i le faamoemoe. Faataitai auala nei e tolu e aumaia ai le lotofaafetai sili atu i lou olaga.
1. Vaavaai mo le Lelei
O le tele o taimi, e sili ona faigata le i ai o le lotofaafetai pe a e lagona e i ai se mea o loo e lē mauaina . Ae o a faamanuiaga e te ono le amana’iaina e ala i le taulai atu i mea e te lē o maua nai lo mea o i ai ia te oe?
A o e saili mo le lelei i lou olaga, i le aluga o taimi o le a faigofie atu ona maua.
2. Faailoa atu le Lotofaafetai i Lē Foai
Pe a e faitauina ou faamanuiaga, aua nei galo le mea e o mai mai ai.
O le faafetai i le Tama Faalelagi mo Ana meaalofa—e aofia ai le meaalofa o Lona Alo—e mafai ona faalolotoina ai lou alofa ma le faatuatua ia te Ia. Na faamalamalama mai foi e Elder D. Todd Christofferson o le Korama a Aposetolo e Toasefululua, “O le lagonaina ma le faaalia o le lotofaafetai i le Atua … e faatele ai le tapuai ma se lagona o le faafouga fiafia,” e aumaia ai ia te oe le olioli ma le malosi ma fesoasoani i lau molimau ia tumau i le saogalemu.
3. Taulai Atu i le Fuafuaga a le Tama Faalelagi
E manino lava, o le i ai o le lotofaafetai e le faapea o le le amanaiaina o mea faigata i le olaga po o le lagonaina o le fiafia i taimi uma. E oo lava ia Iesu Keriso na lagonaina ma faailoa atu le tiga (tagai i le Alema 7:11; Mataupu Faavae ma Feagaiga 19:18–19). O le faanoanoa o se vaega o le olaga faitino.
Ae po o le a lava, e tasi le mea e le suia lava: o le fuafuaga o le alofa mutimutivale o le Tama Faalelagi. O faanoanoaga uma ma tiga e te oo i ai i le olaga o le a faaatoatoaina ona o Iesu Keriso ma Lana Togiola (tagai i le Faaaliga 21:4).
Na saunoa Elder Dieter F. Uchtdorf o le Korama a Aposetolo e Toasefululua: “O le lotofaafetai i taimi o mafatiaga e le faapea ai ua tatou fiafia i o tatou tulaga. O lona uiga e ala i mata o le faatuatua e faapasi ai la tatou vaai i o tatou luitau o loo i ai i lenei taimi.”