O se Asoa ma se Folafolaga
O se meaalofa faapelepele mai ia Tamāmatua na fesoasoani ou te taula’i atu ai i le malumalu.
Ata na tusia e David Comerón
Ou te fiafia i mea fe’ilafi. Ou te fiafia lava i ai. Ou te fiafia i le iila o meafe’ilafi lea e pu’eina ma atagia ai le malamalama, ma ou te manatu o le mafuaaga lena ou te fiafia tele ai i moli teufale tioata. E faapitoa lava lo’u fiafia i moli teufale tioata i totonu o le malumalu.
Ou te manatua lo’u savali atu ma le migao i se faletatala o le malumalu faatasi ma lo’u aiga i le na o le iva o o’u tausaga. O le a lē galo lava ia te a’u lo’u tu i lalo o le potu selesitila i se tulaga maofa tele. Sa ou lē talitonu i le matagofie, mama, ma le pa’ep’ae o mea uma.
Ina ua ma savavali ese mai le malumalu, sa fai mai lo’u tamāmatua e i ai sana meaalofa mo a’u. Sa lapopo’a o’u mata a o toso mai e lo’u tamāmatua se asoa feilafi mai lana taga. O se filifili umi ma se tamai tioata e tasi i le pito—e pei lava o filifili i totonu o le malumalu.
“Sa ou faia lenei mea mo oe,” o le tala lea a lo’u tamāmatua a o ia nonoaina le asoa faata’amilo i lo’u ua. O lo’u tamamatua o se fai eletise. Na te faatauina atu ituaiga uma o vaega o moli matagofie. Sa ia ta’u mai ia te a’u sa ia faia le asoa i se tioata faaopoopo mai lona faleoloa ma sa manao ou te ulaina ina ia faamanatu mai ai ia te a’u le malumalu.
Sa ia fai mai ia te a’u e folafola atu o le a ou alu i le malumalu i se aso, ma sa ia tuuina mai lana molimau i le ala na faamanuiaina ai e le malumalu lona olaga ma pe mafai faapefea ona faamanuiaina ai olaga o tagata uma. O taimi uma lava ou te ulaina ai la’u asoa tioata ou te mafaufau ai i le malumalu ma le auala na ou manao ou te alu ai i totonu. Ou te manatua pea lena folafolaga na ou faia i lo’u tamamatua.
Ina ua lava lo’u matua e alu ai e fai papatisoga i le malumalu, sa ou fiafia i avanoa uma ou te alu ai. I totonu o le malumalu, sa ou lagonaina i taimi uma le fesootai atu i lo’u Tama Faalelagi. Ma o le a le galo lava ia te a’u le lagona na ou maua ina ua uma ona maua o’u faaeega paia. Ina ua mavae lena aafiaga paia, sa ou savali atu i totonu o le potu selesitila ma fusi lo’u tamamatua i lalo o le moli teufale tioata matagofie.
Sa sa’o lava lo’u tamāmatua e uiga i le auala e mafai ai e le malumalu ona faamanuiaina o matou olaga. O loo faaauau pea ona faamanuiaina ai a’u i lo’u olaga atoa aua e fesoasoani ou te manatua ai lo’u faamoemoega iinei i le lalolagi.