Auuso e Toatolu, Tasi le Faaola

Feiloai ia Kalosi!

18 Tausaga. E fiafia i taaloga vitio ma polokalama faakomepiuta. E manao e avea ma se avetaavale o taavale tutu’u ma fai mamanu i se aso.

Ua iloa e Kalosi o le ositaulaga e aumaia ai faamanuiaga.

“O ma’ua ma lo’u uso o Seti e maua i le autism. O lenei mea na faigata ai ia te au ona suesue i le aoga. Ona valaaulia lea o i matou e lo’u tina e faitau tusitusiga paia i taeao o se aiga, ma sa fesoasoani tele ia te au. Sa tuuina mai ai ia te au se malosiaga i le aoga ma fesoasoani ia ou tutoatasi.

“O le isi taimi, ou te lei manao e alu i se konafesi a le autalavou ona sa ou matua pisi lava i se vasega i le aoga. Ae sa ou alu, ma sa ou lagonaina e pei ua faamanuiaina au e faia ia sili atu le lelei i le vasega nai lo le mea sa ou manatu o le a ou faia. Ona o nei aafiaga, sa ou tolopoina ai a’u suesuega i le iunivesite ma o loo ou sauni e alu i se misiona. Ou te iloa o le ositaulaga o le a fesoasoani ia te au.”

Feiloai ia Seti!

17 Tausaga. E fiafia e taalo i taaloga vitio, faia o ofutau i pepa malo, ma taaalo ma pusi e tolu a lo latou aiga.

E taumafai Seti ia agalelei atu i isi, e ui lava e le agalelei tagata ia te ia i taimi uma.

“Sa i ai se alii i le aoga sa i ai ni faafitauli o le soifua maloloina. Ma le isi, sa lei lelei tele ana mata tioata, ma o nisi taimi sa ia fetoai ma ni mea. I se tasi aso sa pau o ia i lalo, ma sa taufaalili tagata ia te ia. Ou te lei faia—sa ou alu ma fesoasoani ia te ia. E lei umi, ae le toe sau o ia i le aoga. Sa ou vaai ia te ia mulimuli ane i le pati o lona aso fanau, ma sa i ai o ia i se nofoa faataavalevale. Sa ou taumafai e fesoasoani ia te ia ia maua se taimi manaia i lana pati. O ia o la’u uo.

“Sa ou faia foi ni uo i lenei tausaga i le MMA. I le taimi muamua, sa ou le manao ou te alu i ai. Sa ou i ai muamua, ma o nisi tagata sa le mananao e tafafao faatasi ma a’u. Ae o le tausaga lenei e leai se tasi na faamasinoina au—i le isi itu, sa latou talisapaia au mo mea sa ou oo i ai.”

Feiloai ia Isaako!

14 Tausaga. E fiafia e taalo i taaloga vitio, taaalo ma a latou pusi, ma suesue e avea ma se fomai manu i se aso.

Ua faatuatuaina e Isaako o le a fesoasoani le Faaola ia te ia.

“Sa matou i ai i le fale o lou tinamatua i se tasi taimi ina ua o mai lou uso ma lou tausoga ma se tamai pusi lanumoli. Sa faamanualia o ia ma sa lei talitonu i se tasi o i matou. Mulimuli ane, sa ou faia ia faatuatuaina au. Sa ou tausia ma tuuina atu i ai meaai. Ina ua oo i le taimi ou te alu ai, sa faataga a’u e o’u matua ou te aumaia i le fale. Ou te manatu sa fesoasoani mai le Agaga Paia ma Iesu Keriso ia te au.

“O le isi taimi, sa ou lagonaina e pei e itiiti ifo au nai lo isi tagata uma. Sa ou faitau i tusitusiga paia, ma sa ou tau atu i le Alema 7:11: ‘Ma o le a afio atu o ia, ma mafatia i tiga ma puapuaga ma faaosoosoga o ituaiga eseese uma.’ O le mea moni, sa feagai Iesu Keriso ma o tatou tiga uma, ma o le a i ai pea o Ia iina e fesoasoani ia i tatou, e oo lava i mea laiti.”

O Kalosi, Seti, ma Isaako e le na o ni auuso—o i latou o ni uo. Ma e faalagolago i latou taitoatasi i la latou Uo ma le Faaola silisili, o Iesu Keriso.

Isaako: “Ou te iloa o loo soifua Iesu Keriso. Sa puapuagatia o Ia i o tatou tiga uma. E le faigofie i taimi uma le olaga, ae e le afaina lena mea. E mafai ona ia faia vavega.”

Seti: “Ona o Ia, ua mafai ai ona taialaina o tatou olaga i le nofoaga sa’o. Afai tatou te faatagaina i tatou lava ia taialaina e Ia, o le a lelei mea uma.”

Kalosi “Ua i ai i le Tama Faalelagi ma Iesu Keriso le mana e fesoasoani ai ia i tatou. Afai tatou te usiusitai ia i La’ua, o le a La fesoasoani mai ia i tatou i mea tatou te oo i ai i o tatou olaga.”