“ʻOku fai ʻe hoku ngaahi kaungāmeʻa leleí ha ngaahi fili ʻoku ou ongoʻi taʻefiemālie ai. Ko e hā ʻa e meʻa te u faí?”

“Talanoa ki hoʻo ngaahi kaungāmeʻá fekauʻaki mo hoʻo ngaahi ongó. ʻOku mahuʻinga ke tau fetuʻutaki faitotonu kae lava ke tau maʻu ha vā fetuʻutaki ʻoku lelei angé. ʻOku faingataʻa ʻi he taimi ʻe niʻihi koeʻuhí he ʻoku tau fakakaukau ʻe ʻita hotau ngaahi kaungāmeʻá, ka ʻoku ʻi ai ha founga ke solova ʻaki: fai ʻa e meʻa naʻe mei fai ʻe Kalaisí pea ngāue ʻi he manavaʻofa.”

Luani R., 19, Sao Paulo, Palāsila

“Ko e taimi ʻe niʻihi ʻoku faʻa fai ʻe he ngaahi kaungāmeʻá ha ngaahi fili koeʻuhí ko e fakatamaikí. Kapau te u talanoa ki hoku ngaahi kaungāmeʻá fekauʻaki mo ʻenau ngaahi filí, te u lava ʻo tokoni ke nau haʻisia ki heʻenau ngaahi taumuʻá mo e tuʻunga ʻulungaanga mahuʻingá. Ko e taimi ʻe niʻihi, ʻoku ʻikai ke mau tui tatau ʻi he meʻa ʻoku leleí pe mahuʻingá, ka kuo pau ke mau fefakaʻapaʻapaʻaki ʻi he ngaahi fakakaukaú mo e tauʻatāina ke filí.”

Meki J., 18, Tekisisi, USA

“Mahalo ʻokú ke ongoʻi taʻefiemālie koeʻuhí he ʻoku folofola atu ʻe he Laumālie Māʻoniʻoní ko e meʻa ʻokú ke faí ʻoku ʻikai totonu ia. Fakaafeʻi ke nau fai ha meʻa kehe.”

Lolenisou M., 12, Kuesoni Siti, ʻOtu Filipainí

“Te ke lava ʻo tataki kinautolu ki he hala ʻo e ʻOtuá pe kumi ha ngaahi kaungāmeʻa kehe te nau hoko ko ha tākiekina leleí. Lotu ke ke ʻiloʻi ʻa e fili ke faí. Falala ki he tuʻutuʻuni hoʻo Tamai Hēvaní, pea te Ne tataki koe.”

Heitini D., 15, Uāsingatoni, USA

“Te u fai hoku lelei tahá ke u hoko ko ha faʻifaʻitakiʻanga lelei. Te u lotua foki kinautolu he ʻoku ou ʻiloʻi ʻoku ikuna maʻu pē ʻa e māmá ʻi he fakapoʻulí.”

ʻAisake M., 19, Lualapa, Lepapulika Fakatemokālati ʻo Kongokoú

“Loto-toʻa mo loto-lahi ʻo hangē ko Molonaí. Te tau maʻu kotoa pē ha ngaahi kaungāmeʻa ʻoku nau fai ha ngaahi fili ʻoku kovi, pea te tau fiemaʻu tokoni mei he Tamai Hēvaní ke tau lavaʻi ia. ʻOku ou lotu ʻi he pongipongi kotoa pē ke tui ʻa e teunga tau ʻa e ʻOtuá, pea ʻoku tokoni lahi ʻaupito ʻeni kiate au!”

ʻAsa F., 15, ʻIutā, USA

“ʻOfa ʻiate kinautolu pea tuku ke ulo atu hoʻo māmá. ʻE kamata ke fakaʻapaʻapaʻi ʻe he kakaí ho ngaahi filí. Ko au pē mo hoku fāmilí naʻe mēmipa ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi homau ʻapiakó, pea naʻá ku fakatokangaʻi naʻe ʻikai ke kapekape ʻa e kakaí ʻi heʻemau feohí koeʻuhí he naʻa nau ʻiloʻi naʻa mau makehe.”

Penelope W., 13, Vahefonua Lotolotó, Potukali