Naʻe ʻIkai Ke Ne ʻIloʻi Naʻá Ku Fiemaʻu Ia

Faitaaʻi ʻe Melanie Miza

Naʻá ku fekuki mo ha ngaahi palopalema fakataautaha. ʻI ha ʻaho ʻe taha naʻe ʻikai ke u ongoʻi sai ai, pea naʻe ʻikai ke u loko fie ʻalu ki he seminelí. Ka naʻá ku fakakaukau, “Ko hoku taʻu fakaʻosí ʻeni, pea kuo pau ke u fakaʻaongaʻi lelei ia.”

Ko ia ai naʻá ku ʻalu leva, pea naʻa mau talanoa fekauʻaki mo e founga ʻoku ʻafioʻi ai ʻe Sīsū Kalaisi kitautolu takitaha ʻaki hotau hingoá. Naʻa mau lau ʻa e Tokāteline mo e Ngaahi Fuakava 18:10: “Manatu, ʻoku mahuʻinga lahi ʻa e ngaahi laumālié ʻi he ʻao ʻo e ʻOtuá.” Naʻe kamata ke u ongoʻi loto-māfana ʻi heʻeku fakaʻilongaʻi ʻa e vēsí. ʻI he taimi ʻoku ou ongoʻi loto-māfana aí, ʻoku ou faʻa tangi, ko ia naʻe ʻikai ke u loto ke toe lau ia ʻi he kalasí.

Naʻe fehuʻi mai ʻe he faiakó kimui ange, “Ko e hā ʻa e meʻa ʻokú ke mahuʻingaʻia taha aí, pea ko e hā hono ʻuhingá?” Naʻe ʻikai ke u fie lea, ka naʻe lave haku kaungāmeʻa ki he potufolofola ko iá. Naʻá ne vahevahe ʻene fakamoʻoní he ʻikai ke tuku ʻe he ʻOtuá ke tau tuenoa, pea ʻe ngalo ʻiate kitautolu ʻi he taimi ʻe niʻihi, ka ʻokú Ne ʻafioʻi kitautolu pea te Ne ʻi ai maʻatautolu.

ʻI heʻeku fanongo ki aí, naʻe hangē ia ha folofola mai ʻa e Tamai Hēvaní kiate au ʻo fakafou ʻi hoku kaungāmeʻá. Naʻe hangē ia Haʻane folofola mai, “ʻOua te ke hola meiate au—ko au eni.”

Hili iá naʻá ku ʻalu ke holoholoʻi hoku matá, pea naʻe haʻu hoku kaungāmeʻá kiate au. Naʻá ne pehē mai, “Naʻe ʻikai ke ʻai ke u vahevahe, ka naʻá ku ongoʻi naʻe fiemaʻu ke u fai ia koeʻuhí he ʻe tokoni ia ki ha taha. Naʻe ʻikai ke u ʻilo ko koe ʻa e tokotaha ko iá.” Naʻe toe ʻāsili ai hono fakapapauʻi mai kiate au ʻoku ʻafioʻi au ʻe he Tamai Hēvaní.

ʻI he tuku ʻa e seminelí, naʻá ku foki ki ʻapi ʻo lotu. Ko e angamahení, ʻoku ou fakamālō mo kolea ha ngaahi meʻa. Ka ʻi he lotu ko iá—ʻoku ou tui mahalo ko e toki lotu loto-fakafetaʻi lahi taha ia kuó u faí. Naʻá ku ongoʻi ʻa e Laumālié ʻi hoku lokí, pea naʻá ku ongoʻi naʻe ʻi ai ʻa e Tamai Hēvaní mo au.