Ngaahi Founga ʻe 3 ʻOku Tataki Ai ʻe he Kau Palōfitá mo e Kau ʻAposetoló Kitautolu kia Kalaisí

Naʻe akoʻi ʻe Sīsū Kalaisi ʻokú Ne folofola ʻo fakafou ʻi Heʻene kau palōfitá “ʻo hangē ko e lea ia mei [Hono] ngutu [ʻOʻoná]” (Tokāteline mo e Ngaahi Fuakava 21:5). ʻOku ʻuhinga ia ʻoku nau akoʻi ʻEne ongoongoleleí mo ʻomi ʻa e ngaahi pōpoaki ʻokú Ne finangalo ke tau fanongo ki aí.

Hangē ko ʻení, ʻi he konifelenisi kuo ʻosí, naʻe akoʻi ʻe Palesiteni Tāleni H. ʻOakesi ko e Tokoni ʻUluaki ʻi he Kau Palesitenisī ʻUluakí, ʻa e founga ʻe lava ai ʻa Sīsū Kalaisi ʻo tokoniʻi kitautolu ke tau foki ki he Tamai Hēvaní:

“Ko e tokoni mahuʻinga taha kuo fai ʻe he ʻOtuá ki Heʻene fānaú ʻi he moʻui fakamatelié ko hono ʻomi ha Fakamoʻui ko Sīsū Kalaisi, ʻa ia te Ne mamahi ke fuesia ʻa e totongí mo fakamolemoleʻi ʻa e ngaahi angahala kuo fakatomalaʻí. ʻOku fakamatalaʻi ʻe he Fakalelei ʻaloʻofa mo nāunauʻia ko iá ʻa e ʻuhinga ʻoku hoko ai ʻa e tui ki he ʻEiki ko Sīsū Kalaisí ko e ʻuluaki tefitoʻi moʻoni ʻo e ongoongoleleí.”

ʻOku tokoni ʻa e ngaahi tefitoʻi moʻoni ʻoku akoʻi ʻe he kau palōfitá mo e kau ʻaposetoló ke fakamālohia ʻetau tui kia Sīsū Kalaisí. Fakakaukau ki he ngaahi pōpoakí ni ʻi he lolotonga ʻo e konifelenisi lahí. ʻOku nau ʻomi fēfē koe ke ke ofi ange ki he Fakamoʻuí? Lotu ke ke ʻiloʻi ʻoku akoʻi ʻe Heʻene Kau ʻAposetoló ʻa e moʻoní.

ʻI heʻenau hoko ko e kau fakamoʻoni makehe ʻo Sīsū Kalaisí, ʻoku fakamoʻoniʻi ʻe he kau palōfitá mo e kau ʻaposetoló ʻokú Ne moʻui pea ko e Fakamoʻui Ia ʻo e māmaní. Fakakaukau ki he fakamoʻoni mālohi ko ʻeni meia Palesiteni Henelī B. ʻAealingi ko e Tokoni Ua ʻi he Kau Palesitenisī ʻUluakí:

“Ko ha fakamoʻoni au ki he Toetuʻu ʻa e ʻEikí ʻo hangē tofu pē naʻá ku ʻi ai tonu mo e ongo ākonga ʻi he fale ʻi he hala ki ʻEmeasí. ʻOku ou ʻiloʻi ʻokú Ne moʻui.

“Ko Hono Siasi moʻoní ʻeni—ʻa e Siasi ʻo Sīsū Kalaisí. …

“ʻOku ou fakamoʻoni ʻi heʻeku hoko ko ha fakamoʻoni ki he Fakamoʻui kuo toetuʻú pea mo hotau Huhuʻí.”

Fakatokangaʻi ʻa e ngaahi fakamoʻoni ko ʻení ʻi he lolotonga ʻo e konifelenisi lahí. Ko e hā ha meʻa ʻokú ke ako meiate kinautolu? Te ke lava fēfē ʻo fakamālohia hoʻo fakamoʻoni pē ʻaʻau kia Sīsū Kalaisí? ʻI hoʻo tokanga ki he kau fakamoʻoni ʻa e Fakamoʻuí kuo filí, ʻe fakapapauʻi atu ʻe he Laumālie Māʻoniʻoní kiate koe ʻoku moʻoni ʻenau ngaahi fakamoʻoni ki he Kalaisi moʻuí.

Hangē pē ko e ʻikai ke tupu ha tengaʻi ʻakau kapau ʻoku ʻikai fuʻifuʻi mo tokangaʻí, ʻe ʻikai foki tupulaki ʻetau fakamoʻoní kapau he ʻikai ke tau tanumaki kinautolu. ʻI he taimi ʻoku fakaafeʻi ai kitautolu ʻe he kau palōfitá mo e kau ʻaposetoló ke tau ngāué, ʻoku nau ʻomi ha ngaahi founga kuo ueʻi fakalaumālie ke fakamālohia ʻetau ngaahi fakamoʻoní, fakaloloto hotau vā fetuʻutaki mo Sīsū Kalaisí, mo maʻu e ngaahi tāpuaki ʻa e Fakamoʻuí kuo talaʻofa maí.

ʻI he konifelenisi lahi ʻo ʻEpeleli 2025, ko ha niʻihi pē ʻeni ʻo e ngaahi fakaafe naʻe faí:

• Tupulaki ʻi he loto-falala ʻi he ʻao ʻo e ʻEikí ʻaki hono fakatupulaki hoʻo manavaʻofá mo e angamaʻá.

• Foaki “ha taimi tatau, ʻikai ko e taimi ʻatā pē” kia Sīsū Kalaisi mo ʻEne ongoongoleleí.

• Fakamanatua lelei mo ʻuhingamālie ange ʻa e Toetuʻu ʻa Sīsū Kalaisí lolotonga e faʻahitaʻu Toetuʻú.

• Faʻa fakakaukau lahi ange mo faivelenga ange ki he Fakalelei ʻa e Fakamoʻuí.

Fekumi ki ha ngaahi fakaafe hangē ko ʻení ʻi hoʻo fanongo ki he konifelenisi lahí. ʻOku ʻomi ia maʻatautolu ʻo tautautefito ʻi he ngaahi taimi ko ʻení! Ko hono tali mo ngāueʻi kinautolú ko ha founga lelei ia ke ʻunuʻunu ke toe ofi ange kia Sīsū Kalaisi pea nofo malu fakalaumālie ʻi he ngaahi ʻaho kimui ní.

Naʻe akoʻi ʻe Palesiteni Lāsolo M. Nalesoni, “ʻOku fakapapauʻi mai ʻe he founga fuoloa ʻa e ʻOtuá kuó Ne fokotuʻu ki hono akoʻi ʻEne fānaú ʻo fakafou ʻi he kau palōfitá, te Ne tāpuakiʻi e palōfita kotoa pē pea te Ne tāpuakiʻi ʻa kinautolu ʻe talangofua ki he faleʻi fakapalōfitá.” ʻI hoʻo teuteu mo fakafanongo ki he ngaahi pōpoaki fakalaumālie ʻa e kau palōfita ʻa e ʻOtuá kuo fili, te ke lava lelei ange ai ʻo ongoʻi e ʻofa hoʻo Fakamoʻuí pea mahino kiate koe ʻa e founga ke muimui ai kiate Iá.