Fēfē Kapau ʻe Faingataʻa ke Maʻu Haʻaku Kaungāmeʻa?

ʻI heʻeku hiki ki ha ʻapiako foʻou ʻi he taʻu ní, naʻá ku tangi lahi he naʻe ʻikai ke u fie mavahe mei hoku ngaahi kaungāmeʻa motuʻá. Naʻá ku pehē loto pē he ʻikai ke u teitei saiʻia ʻi heʻeku ʻapiako foʻoú peá u ongoʻi hangē te u lavakiʻi hoku ngaahi kaungāmeʻa motuʻá kapau te u maʻu ha ngaahi kaungāmeʻa foʻou.

ʻI he uiké kakato, naʻá ku fakafulofula holo pē. Naʻe ʻikai ke u lea ki ha taha. Naʻe ʻi ai ha tamaiki fefine naʻa nau feinga ke talanoa mai kia au, ka naʻe ʻikai ke u fie feinga ke maheni mo kinautolu.

ʻI ha ʻaho ʻe taha, naʻá ku fakatokangaʻi ai naʻe ʻikai ke u fie nofo toko taha. Naʻá ku fakatokangaʻi naʻe fiemaʻu ke u loto-tauʻatāina ange. Lolotonga haʻaku sio ʻi ha ngaahi polokalama televīsone fekauʻaki mo Sīsū Kalaisi, naʻe ueʻi au ke u fakakaukau ki he founga naʻá Ne fakakaungāmeʻa aí. Naʻa mo Ia naʻe ʻikai ke saiʻia ʻa e taha kotoa pē ʻiate Ia, ka naʻá Ne liliu ʻa e moʻui ʻa ha kakai tokolahi.

Koeʻuhí ko e sīpinga ʻa Kalaisí, naʻá ku fakakaukau ai ke u feinga ke fakamaheni ki ha ngaahi kaungāmeʻa foʻou, neongo ʻeku manavasiʻí. Naʻá ku ilifia koeʻuhí naʻá ku mā mo hohaʻa naʻa fakakata ʻaki au ʻe he kakaí. Ka naʻá ku maʻu ʻa e fakakaukau, “ʻOku ʻi ai hoʻo Tamai ‘i Hēvani te Ne tokoniʻi koe. Tatau ai pē kapau ʻe fakasītuʻaʻi koe ʻe he taha kotoa, te Ne tokoniʻi koe.”

ʻI heʻeku toe fakakaukau atu ki aí, ʻoku ou lava ʻo ʻilo ko e Kaungāmeʻa pē ʻe taha naʻe ʻikai ke Ne teitei liʻaki au ʻi he lolotonga ʻo e taimi ko iá ko e Fakamoʻuí. Koeʻuhí ko e ngaahi aʻusia faingataʻa naʻá ku fouá, naʻá ku toe ofi ange ai kiate Ia. ʻOkú Ne ʻofa lahi ʻiate kitautolu naʻá Ne foaki ai ʻEne moʻuí maʻatautolu. Pea naʻá Ne ʻomi ʻa e folofolá ke tau lava ai ʻo ʻiloʻi ʻa e founga ke tau hangē pē ko Iá. Te ke lava maʻu pē ʻo falala kia Sīsū Kalaisi ke hoko ko ho Kaungāmeʻa.