Loto-mafasiá, Laumālié, pea mo e Folofolá

Tā fakatātā ʻa Katelyn Budge

Kuo tuʻo lahi ʻeku hikihiki takai holo ʻi heʻeku moʻuí. ʻI he ngaahi taʻu siʻi kuohilí, naʻa mau hiki ai ki Tupai ʻi ha kiʻi taimi nounou. Ko e taimi naʻá ku ʻaʻau ai ʻeku kato valá, ko e meʻa fakamuimuitaha naʻe ʻi lalo ʻi heʻeku kató ko ʻeku folofolá. Naʻá ku fakakaukau ʻoku totonu ke u lau ia. Naʻá ku fai ia, ʻa ia ʻoku kiʻi ngali kehe koeʻuhí he ʻoku ʻikai ke u faʻa muimui maʻu pē ʻi he ngaahi ueʻi fakalaumālié. Ka naʻá ku kamata mei he kamataʻangá, pea ʻoku ou tui mahalo naʻá ku lau ha vahe ʻe nima pe ono.

Kimui angé, naʻe kole mai ke u lea ʻi he houalotu sākalamēnití. Naʻá ku ongoʻi ke u lea fekauʻaki mo hono mahuʻinga ʻo e ako ʻa e folofolá. Naʻá ku hiki ʻeku leá peá u fakakaukau, “Mani, ʻoku totonu ke u lau ke lahi ange ʻa e folofolá.” Naʻe hoko foki ia ko haʻaku feʻauhi mo ʻeku tangataʻeikí. Naʻá ne ʻi he tohi ʻAlamaá, pea naʻá ku loto ke u tulituli hake kiate ia. Naʻe kamata ke u lau fakaʻaho ʻeku folofolá—taimi ʻe niʻihi ko ha vahe ʻe 10 pe 15!

Naʻe kamata ke u fakatokangaʻi ha ngaahi aʻusia fakalaumālie lahi ange. Ko e taimi ʻokú te laukonga lahi pehē aí, ʻokú ne fakaʻatā ʻe ia ke te maʻu ha fakahā fakataautaha. Naʻá ku fokotuʻu moʻoni ha taimi maʻá e ʻEikí.

Naʻe kamata ke u tauhi ha tohinoa fakalaumālie. Naʻá ku tohi ʻi ha meʻa ʻe taha ʻo pehē, “Naʻá ku lau ʻa e tohi 3 Nīfaí fekauʻaki mo e founga naʻe hāʻele hifo ai ʻa Sīsū Kalaisi ki he kakaí mo e ngaahi meʻa fakaʻofoʻofa kotoa pē naʻá Ne faí. Naʻá ku ongoʻi vāofi moʻoni mo e Tamai Hēvaní mo Sīsū Kalaisi ʻi he ʻahó ni.”

Naʻá ku fuʻu ʻohovale ʻaupito ʻi he lahi ʻa e ngaahi meʻa kuó u aʻusiá, tautautefito ki he taimi naʻá ku fekumi ai kiate kinautolú. Naʻá ku pehē, “Mani, ʻoku lahi moʻoni ʻa e folofola mai ʻa e ʻOtuá kiate aú.”

Naʻe tokoni moʻoni ʻa hono ako ʻa e folofolá kiate au, tautautefito ki he mafasia fakaʻatamai ʻo e lahi ʻo e hikihiki takai holó. Ko e folofolá ko e ngaahi tō-folofola ia ʻa Kalaisi. ʻOkú Ne folofola mai kiate kitautolu ʻo fakafou [ʻi he folofolá]. ‘Oku fakafou ʻi Heʻene ngaahi folofolá, ʻa ‘eku lava ʻo ʻunu ofi ange kiate Iá.