ʻOku Fiemaʻu Foki ʻa Sīsū Kalaisi ʻi he Ngaahi ʻAho Fakafiefiá
ʻI he taimi ʻoku tokamālie ai ʻa e ngaahi tūkungá, ʻe lava fēfē ke tukutaha ʻetau tokangá ʻi he Fakamoʻuí? Ko ha ngaahi fakakaukau ʻeni ʻe niʻihi.
Fakakaukauloto angé kapau naʻe toki feohi pē ha kaungāmeʻa mo koe ʻi he taimi ʻokú ne faingataʻaʻia aí pea fakaʻehiʻehi meia koe ʻi he taimi ʻokú ne fiefia aí. Ko ha vā fetuʻutaki lelei ia? Mahalo pē ʻikai.
ʻOku tau teitei fai nai ia ki hotau Fakamoʻuí—fekumi kiate Ia ʻi he ngaahi taimi faingataʻá pea fakangaloʻi Ia ʻi he taimi tokamālié?
ʻOku lahi ʻetau talanoa fekauʻaki mo e founga ʻoku tokoniʻi ai kitautolu ʻe Sīsū Kalaisi ʻi hotau ngaahi taimi faingataʻá, mahalo pē koeʻuhí ʻoku fehangahangai ʻa e tokotaha kotoa pē mo ha ngaahi meʻa faingataʻa.
Ka ʻoku ʻi ai ʻa e ngaahi ʻaho—naʻa mo e ngaahi uike pe taʻu, kapau ʻoku tau monūʻia—ʻoku tokamālie ʻaupito ʻa e ngaahi tūkungá. Ko e taimi ʻe niʻihi ʻoku ngalo ʻiate kitautolu ʻa e Fakamoʻuí ʻi he ngaahi taimi peheé. Naʻe pehē ʻa e kakai ʻi he Tohi ʻa Molomoná. Naʻa nau kaimonū mei he ngaahi tāpuaki ʻa e ʻOtuá ʻi ha kiʻi taimi, ka naʻe faifai pea lōmekina kinautolu ʻe he loto-hīkisiá ʻi he taimi naʻa nau fakangaloʻi ai Iá.
ʻOku ʻikai ʻuhinga ʻa e ngaahi taimi tokamālié ke pehē ai ʻoku fakafokifā pē ʻa e ʻikai ke tau toe fiemaʻu ʻa Sīsū Kalaisí. Ko e taimi ʻo e tuʻumālié ko e taimi lelei taha ia ke tau fiefia ai mo e Fakamoʻuí, kae ʻikai fakangaloʻi Ia.
Ko ia ai ʻe founga fēfē leva haʻatau kei fetuʻutaki pē mo Sīsū Kalaisi mo ʻetau Tamai ʻi Hēvaní ʻi he taimi ʻoku ʻikai fakamanatu mai ai ʻe he ngaahi faingataʻá ke tau tafoki kiate Kinauá?
Loto-fakatōkilalo Maʻu Pē
ʻI he taimi ʻoku tokamālie ai ʻa e ngaahi tūkungá, ʻoku lelei ke fakafiefiaʻi ho ngaahi tāpuakí mo e ngaahi lavameʻá. Kae ʻoua naʻa ngalo ʻa e tokotaha naʻá ne ʻai ke ke lava ʻo aʻusia ʻa e tuʻunga ʻokú ke ʻi aí. Naʻe fakalea peheni ia ʻe he Tuʻi ko Penisimaní ʻi heʻene malanga ʻi he Tohi ʻa Molomoná:
“He vakai, ʻoku ʻikai koā ko e kau paea kotoa pē ʻa kitautolu? ʻOku ʻikai koā te tau falala kotoa pē ki he Tokotaha tatau, ʻa ia ko e ʻOtuá, ke maʻu meiate ia ʻa e meʻa kotoa pē ʻoku tau maʻú, ke maʻu ʻa e meʻakai mo e kofu fakatouʻosi, pea mo e koula, mo e siliva, mo e ngaahi faʻahinga koloa kotoa pē ʻoku tau maʻú?” (Mōsaia 4:19).
Ko e loto-fakatōkilalo ʻi hoʻo ngaahi lavameʻá ʻaki hono manatuʻi ʻa e meʻa kuo fai ʻe he Tamai Hēvaní mo Sīsū Kalaisi maʻaú, ko ha founga lelei ia ke fakakau ai Kinaua ʻi hoʻo ngaahi taimi fakafiemālié.
Loto-houngaʻia Maʻu Pē
Ko e loto-houngaʻiá ko e taha ia ʻo e ngaahi faitoʻo lelei taha ki he hīkisiá mo e fakangalokí. ʻE tokoni hoʻo fakafetaʻi ki he ʻOtuá ke ke manatuʻi Ia mo e lelei kotoa pē ʻokú Ne fai mo Hono ʻAló ʻi hoʻo moʻuí. ʻOku ʻaonga tatau pē ʻeni ʻi he ngaahi taimi tokamālié mo e ngaahi taimi faingataʻá.
Moʻui Tokanga Maʻu Pē
Ko e taha ʻa e ngaahi ʻohofi ʻoku saiʻia taha ai ʻa Sētané ko hono “kākaaʻi fakaoloolo ʻa [kimoutolu] ke [mou] fiemālie fakakakano” (2 Nīfai 28:21). ʻI hono fakalea ʻe tahá, te ne saiʻia ʻaupito kapau te ke ongoʻi fiemālie mo malu ʻi hoʻo ngaahi taimi faingamālié pea ngalo ai ʻiate koe ʻa e meʻa ʻoku mahuʻinga tahá. Ko ia ai, ʻoua naʻa ngalo ʻa e ʻOtuá! Ko e taimi ʻokú ke ʻiloʻi ai ʻa e ngaahi kākā olopoto ʻa e filí pea tekeʻi ia ʻo aʻu pē ki he lolotonga hoʻo ngaahi taimi faingamālié, te ke lava ʻo nofo ofi ki he Tamai Hēvaní mo Sīsū Kalaisi.
Ko e Tauhisipi Leleí, tā fakatātā ʻa Michael Malm
Fakatefito ʻia Kalaisi
Naʻe akoʻi ʻe Palesiteni Lāsolo M. Nalesoni: “ʻI hono tukutaha ʻetau tokangá he palani ʻa e ʻOtuá ki he fakamoʻuí, pea mo Sīsū Kalaisi mo ʻEne ongoongoleleí … te tau lava ʻo ongoʻi fiefia ʻo tatau ai pē ko e hā e meʻa ʻoku hokó—pe ʻikai ke hoko—ʻi heʻetau moʻuí. ʻOku haʻu e fiefiá meiate Ia. Ko Ia e tupuʻanga ʻo e fiefia kotoa pē.”
Ko e hā hono tuʻo lahi hoʻo fakakaukau ki he foʻi moʻoni ko ʻeni fekauʻaki mo e fiefiá ʻi he taimi ʻoku tokamālie ai hoʻo moʻuí? ʻOku ʻikai ko ha faleʻi fakafiemālie pē ʻeni ki he taimi ʻo e faingataʻá. ʻOku moʻoni maʻu pē ia, ʻo kau ai ho ngaahi ʻaho fakafiefia tahá. Ko ia ai fai ʻa e meʻa kotoa pē te ke lavá ke ke tokanga taha ai kia Kalaisi, ʻo tatau pē ʻi he mamahí pe fiefiá.