Ngaahi Fakaʻilonga ʻo e Hāʻele ʻAnga Ua Maí: ʻIkai ha ʻUhinga ke Manavahē
Kuo ʻosi kikiteʻi ha ngaahi meʻa lalahi ʻe niʻihi kimuʻa pea toe hāʻele mai ʻa e Fakamoʻuí. Ka ʻoku ʻi ai ha ngaahi ʻuhinga lelei ke ʻoua naʻá ke manavahē ai.
Te Ne Toe Hāʻele Mai ke Angi mo Pule, tā fakatātaaʻi ʻe Mary RL Sauer
ʻE toe hāʻele mai hotau Fakamoʻui ko Sīsū Kalaisí. Naʻá Ne akoʻi mahino ʻa e foʻi moʻoni ko ʻení (vakai, Mātiu 24). ʻOku fie ʻilo ha kakai tokolahi ki he taimi ʻe hoko ai ʻení, ka naʻe folofola ʻa Sīsū, “ko e ʻaho mo e feituʻulaʻā ko iá, ʻoku ʻikai ʻilo ki ai ha taha, pe ʻilo ʻe he kau ʻāngelo ʻo e langí, ka ko ʻeku Tamaí pē” (Mātiu 24:36).
Ka neongo ia, kuo fakahā ʻe he ʻEikí ha ngaahi fakaʻilonga kehekehe ʻe hoko kimuʻa ʻi Heʻene Hāʻele ʻAnga Ua Maí. Ko ha konga lahi ʻo e ngaahi meʻá ni ʻoku fakafiefia mo fakaʻofoʻofa, hangē ko hono Fakafoki Mai ʻo e ongoongoleleí, ko hono ʻomi ʻo e Tohi ʻa Molomoná, pea mo hono tānaki fakataha ʻo ʻIsilelí.
Ka ʻoku ʻi ai … mo ha ngaahi fakaʻilonga kehe. Hangē ko ʻení:
-
Ngaahi fakaʻilonga ʻi he langí (kau ai ʻa e laʻaá, māhiná, mo e ngaahi fetuʻú) pea ʻi he māmaní (kau ai ʻa e afí, afaá, matangí, mo e kohu ʻo e afi).
ʻE lava ke ongo fakailifia kotoa ia. Ko hono moʻoní, naʻe folofola ʻa e Fakamoʻuí, ʻe tokolahi ʻa e kakai ʻe vaivai honau lotó ʻi he ngaahi ʻaho fakaʻosí koeʻuhí ko e manavaheé.
Mahalo ʻokú ke vakai ʻi he taimí ni ki he ngaahi palopalema ʻi he funga ʻo e māmaní, kae pehē ki he ngaahi ʻahiʻahi fakataautaha ʻokú ke fehangahangai mo iá, peá ke ongoʻi lōmekina mo loto-hohaʻa. Mahalo ʻokú ke fifili pe ko e hā ha meʻa ke ke fakatuʻamelie ki ai kapau ʻe fakaʻau ke toe fakailifia mo faingataʻa ange ʻa e ngaahi tūkungá ʻi he fakaʻau ke ofi ki he Hāʻele ʻAnga Ua Maí.
Ka ʻoku ʻikai ko e founga ʻeni naʻe mei finangalo ai ʻa Sīsū Kalaisi ke hanganaki atu ha—taha ʻo ʻEne kau ākongá—ki Heʻene liuaki maí.
Ko e Pōpoaki ʻa e ʻEikí ki Heʻene Kau Ākongá
Naʻa mo e ngaahi faingataʻa mo e moveuveu kotoa ʻo e ngaahi ʻaho fakaʻosí, naʻe folofola ʻa e Fakamoʻuí ki Heʻene kau ākongá, “ʻOua ʻe puputuʻu.” Ko e hā hono ʻuhingá? Koeʻuhí “he ʻo ka hokosia ʻa e ngaahi meʻá ni kotoa pē, te mou lava ʻo ʻilo ai ʻe fakahoko ʻa e ngaahi talaʻofa kuo fai kiate kimoutolú” (Tokāteline mo e Ngaahi Fuakava 45:35).
Kuo fakahā mai ʻe Sīsū Kalaisi ke “ʻoua ʻe manavahē” (Tokāteline mo e Ngaahi Fuakava 50:41) pea ke “mou fiefia” (Tokāteline mo e Ngaahi Fuakava 61:36). Ko ia, mahalo ʻe lelei taha pē ke liliu ʻetau tokangá, kae ʻoua ʻe nofotaha ʻi he ngaahi faingataʻa ʻoku tuʻunuku maí.
Ko ha founga mahuʻinga ʻeni ʻe tolu te ke lava ai ʻo “ʻoua ʻe manavahē,” hanganaki atu ki he Hāʻele ʻAnga Ua nāunauʻiá, pea lea fakataha mo Sione Fakahā, “ʻEiki Sīsū, ke ke hāʻele mai” (Fakahā 22:20).
1. Hanga ki he Palōfitá
Naʻe fakatokanga ʻa e Fakamoʻuí ʻe tokolahi ha kau Kalaisi loi mo ha kau palōfita loi kimuʻa ʻi Heʻene hāʻele maí ʻa ia te nau kākaaʻi ha kakai tokolahi. ʻOku ʻākilotoa kitautolu ʻe ha ngaahi tākiekina mālohi, puputuʻu, mo kovi ʻoku nau feinga ke takihalaʻi kitautolu. ‘I he ngaahi ʻaho fakaʻosí, ʻe “tekelili [ʻa Sētane] ʻi he loto ʻo e fānau ʻa e tangatá, pea ueʻi hake ʻa kinautolu ke nau ʻita ki he meʻa ʻoku leleí” (2 Nīfai 28: 20). Naʻa mo e kakai filí te nau mavahe mei he moʻoní.
Ka kuo foaki mai ʻe he ʻEikí ha tokoni lahi kiate kitautolu. Kuó Ne ui ha kau palōfita ke nau tāpuakiʻi mo tataki kitautolu. He ʻikai lava ʻe he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ʻo takihalaʻi kitautolu. Kuo folofola ʻa e Fakamoʻuí, “Neongo pe ko e fai ia ʻi hoku leʻo pē ʻoʻokú pe ʻi he leʻo ʻo ʻeku kau tamaioʻeikí, ʻoku tatau ai pē” (Tokāteline mo e Ngaahi Fuakava 1:38). Te ke lava ʻo kole ki he Tamai Hēvaní ke fakapapauʻi mai ʻe he Laumālie Māʻoniʻoní ʻa e ngaahi moʻoni ʻoku nau akoʻí, hangē ko e ngaahi akonaki fakamuimui ʻa Palesiteni Lāsolo M. Nalesoní: “Ko e lelei tahá ʻoku teʻeki ai hoko mai, koeʻuhí he ʻe toe hāʻele mai ʻa e Fakamoʻuí!” Pea: “ʻOkú Ne teuteu ke toe hāʻele mai. ʻOfa ke tau teuteu pehē ke talitali Ia.”
Pea ʻi hoʻo muimui ki heʻenau ngaahi akonakí “ʻi he kātaki mo e tui kotoa pē” (Tokāteline mo e Ngaahi Fuakava 21:5), te ke lava ʻo sio ki he founga ʻoku nau tāpuekina ai hoʻo moʻuí.
Naʻe pehē ʻe ʻEletā ʻĀlani D. Heini ʻo e Kau Fitungofulú: “ʻI heʻeku kei siʻí, naʻá ku ilifia ʻi he ngaahi kikite ko ia ki he ngaahi ʻaho fakaʻosí ʻo fakatupu ai ke u lotu ke ʻoua naʻa hoko mai ʻa e Hāʻele Anga Uá ʻi heʻeku kei moʻuí. … Ka ʻi he taimí ni ʻoku ou lotu ke hoko mai. …
“… ʻOku ʻikai fiemaʻu ia ke tau manavahē. ʻOku maʻu ʻi he ngaahi lea ʻa e palōfita moʻuí ʻa e tokāteline mo e ngaahi tefitoʻi moʻoni kuo pau ke tau muimui ai ke hao fakalaumālie mo kātekina fakatuʻasinó.
ʻI hoʻo muimui ki he fakahinohino ʻa e kau palōfitá mo e kau ʻaposetoló, ʻe fetongi hoʻo manavaheé ʻaki ʻa e tui, ʻamanaki lelei mo e fiefia.
2. Tuʻu ʻi he Ngaahi Potu Toputapú
Kuo folofola ʻa e Fakamoʻuí ʻi he lotolotonga ʻo e ngaahi faingataʻa ʻo e ngaahi ʻaho fakaʻosí, “ʻe tuʻu ʻeku kau ākongá ʻi he ngaahi potu toputapu, pea ʻe ʻikai ueʻi ʻa kinautolu” (Tokāteline mo e Ngaahi Fuakava 45:32). ʻOku kau ʻi he ngaahi potu toputapu ko ʻení hotau ngaahi ʻapí, ʻapisiasí, mo e temipalé.
Fekauʻaki mo e ngaahi temipalé, kuo akoʻi ʻe Palesiteni Nalesoni “ko hotau maluʻanga pau tahá ʻa ʻetau hokohoko atu ke moʻui taau ke hū ki Hono fale māʻoniʻoní.” Pea “ʻe tokoni hono fakalahi hotau taimi ʻi he temipalé ke tau teuteu ki he Hāʻele ʻAnga Ua Maí.”
Eventide [Efiafi], tā ʻa Yongsung Kim
3. Teuteuʻi ʻa e Māmaní
Ko e fatongia ʻe taha ʻoku fakahoko ʻe he Siasi ʻo Sīsū Kalaisí ʻi he ngaahi ʻaho fakaʻosí ko e tokoni ke teuteuʻi ʻa e māmaní ki Heʻene hāʻele maí. Pea te ke lava ʻo tokoni ʻaki haʻo kau ʻi Heʻene ngāué.
Te ke lava ʻo tokoni ke vahevahe ʻa e ongoongoleleí mo e niʻihi kehé pea tokoni ke ʻomi ʻa e maama mo e moʻoni ʻa e ʻOtuá ki he niʻihi ko ia “ʻoku kei taʻofi … mei he moʻoní koeʻuhí he ʻoku ʻikai pē te nau ʻilo ʻa e feituʻu ke ʻiloʻi ai iá” (Tokāteline mo e Ngaahi Fuakava 123:12).
Te ke lava foki ʻo fakahoko ʻa e papitaiso ʻi he temipalé maʻanautolu ʻoku ʻi he tafaʻaki ʻe taha ʻo e veilí naʻa nau moʻui pea “kuo nau pekia, ka naʻe teʻeki ai ke nau maʻu ha ʻilo ki he ongoongoleleí …, ʻa ia naʻa nau mei tali ia” (Tokāteline mo e Ngaahi Fuakava 137:7).
ʻI he lahi fau ʻa e ngaahi meʻa ʻoku ʻikai lelei ʻi he māmaní, te ke lava ʻo hoko ko ha tākiekina lelei ki he niʻihi kehé mo tokoni ke fakamoʻui ʻa e māmaní. Te ke lava ʻo tokoni ke teuteuʻi ha kakai ʻe lava ke hāʻele mai ki ai ʻa e Fakamoʻuí ʻa ia te nau mateuteu ke tali Ia.
Ko ha fatongia kāfakafa ia mo ha meʻa fakaʻofoʻofa ke fakatuʻamelie atu ki ai.