ʻOku Tokangaʻi Au ʻe he ʻOtuá

Faitā ʻa Christina Smith

Naʻe fakafokifā hono uesia au ʻe he loto-mafasiá hili ha ngaahi uike siʻi mei hono maʻu hoku uiuiʻi ke ngāue fakafaifekaú. Naʻe ʻikai haʻaku ivi, ʻikai ha fakaʻaiʻai, pea ko e meʻa fakailifia tahá he naʻá ku ʻita. ʻIta ki hoku fāmilí, ngaahi kaungāmeʻá, ʻOtuá, pea kiate au pē. Koeʻuhí ko e ongo naʻá ku maʻú, naʻe ʻikai ke u lava ʻo aʻusia e ngaahi taumuʻa ne u fokotuʻu maʻakú.

Naʻa ku ongoʻi hangē naʻe ʻomi ʻe he ʻOtuá ha tufakanga taʻetotonú. Ko e konga lahi taha ʻo ʻeku moʻuí, ne u maʻu e fiefiá ʻi he ngāue tokoni ki hoku ngaahi kaungāmeʻá mo e fāmilí. Naʻá ku fakakaukau maʻu pē ki ha ngaahi founga ke langaki hake kinautolu mo ʻai ke toe lelei ange ʻenau moʻuí. ʻIkai ngata aí, ka ne u toki tukupā pē ke fakaʻaongaʻie taʻu ʻe ua ka hoko ʻo ʻeku moʻuí ki hono fakahoko e meʻa tatau. Naʻá ku ongoʻi naʻe līʻoa ʻeku moʻuí ki he ngāue tokoní, ka kuo ʻikai lava ʻe he ʻOtuá ʻo ueʻi ha foʻi toko taha pē ke ne vakai pe ʻoku ou fēfē? Naʻe hangē ne ʻikai ke Ne fuʻu tokanga maí.

Ka, naʻe ʻikai foki ke moʻoni ia. Naʻe tokanga lahi mai ʻa e ʻOtuá kiate au ʻo laka ange ʻi he meʻa naʻe lava ke u mākupusí. Naʻá Ne foaki mai e meʻa kotoa pē naʻá ku fiemaʻú. Naʻá Ne ʻomi ha ngaahi tōʻonga moʻui mālohi naʻá ne ʻai ke u kei fehokotaki mo e ongoongoleleí, ko ha fāmili fakaʻofoʻofa naʻe angalelei mo angaʻofa pea poupouʻi au, ka naʻa nau toe teke foki au ke fakahoko ha ngaahi liliu ke u fakalakalaka ai, pea naʻá Ne tāpuekina ʻaki au ha ngaahi kaungāmeʻa fakaʻofoʻofa ʻa ia (ne tatau ai pē pe naʻa nau ʻiloʻi ia pe ʻikai) naʻa nau ʻomi e mālohi naʻá ku fiemaʻu ke kei hokohoko atu pē ʻeku fonongá.

Neongo naʻe ʻikai ke u fuʻu lava ʻo fakatokangaʻi ia ʻi he lotolotonga ʻo ʻeku faingataʻaʻiá, ka naʻe tokangaʻi au ʻe he ʻOtuá. ʻI heʻeku maʻu hoku ʻenitaumeni ʻi he temipalé, naʻá ku fakatokangaʻi kuo tokangaʻi au ʻe he ʻOtuá mei he kamataʻanga ʻo taimí—ko e moʻoní ia! Naʻe faʻu e konga kotoa pē ʻo e palaní koeʻuhí ke faifai pē peá u ongoʻi e kakato ʻo e fiefia fakasilesitialé. Ko e konga mahuʻinga taha ʻo e palani ko ʻení ʻa e feilaulau ʻo Hono ʻAlo Pē Taha Naʻe Fakatupú, ko ha meʻaʻofa matuʻaki haohaoa he ʻikai teitei lava ʻo totongi fakafoki.

ʻOku ou houngaʻia ʻaupito ʻi he ʻOtuá. ʻOku ou houngaʻia moʻoni ʻi hoku Fakamoʻuí mo e feilaulau kuó Ne fai kae lava ke u hao ai mei he ngaahi mamahi ʻoku ou ongoʻi ʻi he māmani ko ʻení. ʻOku moʻui ʻa Sīsū Kalaisi, pea ʻokú Ne finangalo ke tau moʻui foki mo kitautolu!