Na’o Tusiga Faaeletonika: O Tali mai se Aposetolo
O Le a le Uiga o le Aoao Atu e ala i le Agaga?
E mafai ona tatou aoao atu ina ia mananao tagata e fai mea ia o le a mafai ai ona latou maua le Agaga Paia i le olaga atoa.
Si’i mai le tautalaga na tuuina atu i se semina mo peresitene fou o misiona i le aso 20 o Iuni, 1996
I tausaga ua mavae, sa ma maua ai ma la’u manamea, o Kathleen, le faamanuiaga o le i ai i se fonotaga lea sa aoaoina ai e ni faifeautalai talavou e toalua se alii i le fale o lona tuaoi. Sa la fesili po o le a se lagona o le tamaloa ina ua la aoaoina o ia. Sa faigata ona la fesili atu ona sa la iloa na lagona e tagata uma o loo i totonu o le potu le mana o le Agaga Paia.
Sa talosagaina e le taitai misiona a le uarota le tamaloa e seti se aso o le papatisoga. Sa teena laititi lava e le tamaloa, ma o lea sa taumafai ai nisi o i matou e fesoasoani. Sa matou talanoa e uiga i le i ai o le mafutaga a le Agaga Paia. Sa ia fesili po o le a lena mea, ma sa ma fai atu o le avea lea o Ia ma au soa tumau.
Ou te matea ona o ia o se inisinia, sa ia manao ai e saili po o le a le uiga o le “tumau”. Sa ia fai mai, “Ia, e te lagonaina ea faapea i taimi uma?” Ma faamanuia le loto o la’u manamea, aua sa ia fai mai, “Leai. O le olaga a ia o le olaga, ma e i ai taimi e te lagona ai faapena, ae e le o taimi uma.” Sa fiafia o ia i lena mea aua sa ia iloa e faamaoni.
Sa manino lava o le mafuaaga na ia teena ai le faatulagaina o le aso o le papatisoga ona o lea, sa ta’u atu e le Agaga Paia ia te ia le uiga moni o lena mea, ma sa ia le mautinoa e mafai ona ia faia lena tautinoga tele. Sa matou faatauanauina o ia e faaali atu i le Alii e i ai lona faatuatua.
Sa papatisoina o ia e lona tuaoi, ma sa ou tuuina atu le meaalofa o le Agaga Paia.
O La’u Sini i le Aoao Atu e ala i le Agaga
Pe a ou aoao atu, ou te le mafaufau i mea e mafai ona ou faia e lagona ai le Agaga, e oo lava i mea e mafai ona faia e isi e lagona ai le Agaga. O la’u sini e mo tagata ia lagonaina ma mananao tele i ai ina ia latou toe foi pea lava pea ma aoaoina e le Agaga i o latou olaga atoa.
E le faapea e tau lava o lo’u aoaoina o oe pe tuuina atu foi ia te oe se lagona atonu e te maua le Agaga Paia mo lenei taimi, e le faapea foi ua na o se lagona. O se aafiaga faatasi ma le Agaga Paia. Ona ou manao lea ia te oe e fai le mea o le a mafai ai ona e maua lena aafiaga i le aluga o le olaga atoa.
Sa ou iloa afai e alu la’u uo inisinia e fai le mea sa ia faia, o le a ia maua le malamalama i luga o le malamalama e faaopoopo atu ia te ia. E le o se taimi, pe tau na faamautuina o ia i le Ekalesia; o se mea e faavavau.
O Se Faagasologa, E Le o se Mea e Tupu
O lenei mea o se faagasologa, e le o se mea e tupu, e le o se lagona faafuasei. Pe a molimau atu le Agaga Paia i se tagata o le upumoni o le talalelei, o lena mea e tau atu i le usiusitai. Ma o le usiusitai e taitai atu ai i le liua, le suiga tele—o mea uma ia o galuega a le Agaga Paia.
E molimau faapitoa mai le Agaga Paia i le Tama ma le Alo, o Iesu Keriso, ma le fuafuaga o loo ia i Laua mo i tatou. Pe a oo mai lena molimau, e taitai atu ai i se manao ia ogatusa ma o Laua finagalo. Ma a ogatasi se tagata ma usiusitai, ona o le mana o le Togiola a Iesu Keriso, e faatino ai e le Agaga Paia se isi matafaioi: o se faamama ma se faapaiaina.
O la’u sini ia uunaia oe e te manao e fai se mea ina ia usiusitai ai, aua ou te iloa a e faia, o le a galue le Togiola a Iesu Keriso i lou olaga ma o le a e maua ai le suiga tele na tupu, ma o le a avea oe ma tagata e te manao e avea ai oe.
Ia Faafaigofie
A o e aoao atu ma molimau atu, ia faafaigofie. E le manaomia e le Agaga Paia ni fesoasoaniga se tele—gagana teuteu ma e oo lava i tala faamomoi loto. Sa faamoemoeina lava lo’u tuueseina o nisi o vaega sili ona ootia o lo’u aafiaga faafaifeautalai, ona ou te lei manao e faafelanulanuai ma soona teuteu tele. Ou te lei manao e tau na o le toso i o outou loto. Sa na ona ou fia ta’u atu ia te outou le mea moni i le auala sili ou te mafaia. O le uiga lena o la’u tala i le faafaigofieina.
O Le Agaga Paia o se molimau o le upumoni. Afai la e manino ma faigofie lau tautala i le upumoni, ona foliga mai la lea e mafai e le Agaga Paia ona molimau atu i le loto o le tagata o loo e talanoa i ai. Ia, e i ai ni mea patino e foliga mai o le a Ia molimau. O lea la o le a ou faamutaina ai i lena ala.
O La’u Molimau
Ou te iloa le Atua le Tama. Talu mai lo’u laitiiti, ou te iloa o Ia ma alofa ia te Ia, ma ou te iloa e alofa o Ia ia te a’u, ma e alofa o Ia ia te oe.
Ou te iloa o Iesu o le Keriso aua sa ou lagonaina le mana o le Togiola o faamamaina lo’u olaga.
Ou te iloa e mafai ona avea le Agaga Paia ma se soa aua sa avea o Ia ma a’u soa. Ou te iloa o nisi taimi e mafai ona e lagonaina se mu i totonu o le loto lea e moni lava e pei o soo se lagona faaletino o le a e maua. I nisi taimi, ua ou iloa na oo mai manatu ia te a’u, o lagona, o musumusuga, o lapataiga. Ou te iloa e moni le Agaga Paia ma e fetalai mai ia te a’u ma o loo taumafai e talanoa atu ia te oe.
Ou te iloa a tatou usiusitai i na uunaiga, o le a mafai ona i ai se suiga tele mo oe ma a’u, mo tagata uma, aua o Iesu, le Keriso, na totogiina agasala a tagata uma o le a e feiloai i ai ma alofa ia i latou ma saunia le ala. Afai e mafai, tau ina latou iloa le upumoni ma le usiusitai, atonu o le a latou maua le “filemu i lenei [olaga] ma le ola e faavavau i le lalolagi a sau” (Mataupu Faavae ma Feagaiga 59:23). Ia ofoina atu lena vaega i fanau a lo tatou Tama Faalelagi.