“E le Afaina.”

Ata na tusia e Katelyn Budge

I se tasi Aso Faraile i le aoga, sa le’i i ai iina la’u uo mamae o Dawson. Sa fai mai ni tamaiti sa latou vaai i taavale a le falemai i lona fale, ma sa amata ona ou popole. Mulimuli ane i lena aso, na ta’u mai ai e lo matou puleaoga ia i matou na aveina Dawson i le falemai ona o se tafetotoi o le faiai.

Sa avea i maua ma Dawson o se uo ina ua faatoa siitia mai lo’u aiga mai Karolaina i Saute, ISA. O ia o se tasi o tagata muamua na faatalofa mai ia te au. Na te sailia lava se tamaitiiti fou ma faia ia latou lagona le alofagia.

O le po na sosoo ai talu ona ave Dawson i le falemai, a o tatalo lo matou aiga mo ia ina ia toe malosi, sa ou faalogoina ai se leo filemu, ma le itiiti o fai mai ni upu se lua: “E le afaina.” O le taimi lava na ou faalogo ai i lena mea, sa ou iloa ai o le a manuia Dawson ma o le a ola o ia.

Ae na amata ona ou mafaufau, “Ae faapefea pe afai o le uiga o loo faapea mai le Atua o le a le afaina pe i ai Dawson iinei i le lalolagi po o le lagi?”

Sa faia e la’u siteki se anapogi e 24 itula mo Dawson ma lona aiga. Ona matou maua lea o le tala ua maliu Dawson.

Ou te lei oo muamua lava i se aafiaga faigata lea sa ou lagona ai e tatau ona ou tatalo. Ae ina ua maliu Dawson, o le tatalo sa na o le pau lea o le auala na mafai ai ona ou lagonaina se faamafanafanaga. Sa fesoasoani le Atua ia te au ia ou lagonaina le filemu, ma sa ou lagonaina e tatau ona i ai sana feau mo Dawson e fai.

Ou te iloa soo se taimi lava ou te feagai ai ma se mea faigata, e mafai ona ou talanoa i le Atua. E fesoasoani ia te au e iloa ai o le a i ai pea le Atua mo au ma tagata o loo siomia au. Ou te misia Dawson i aso uma, ae ou te iloa o le a ou toe vaai ia te ia ona o Iesu Keriso.