O le Alofa e Alu I Itu Uma e Lua
E alofa le Atua ia Shinnah, ma e alofa Shinnah i le Atua.
Ua iloa e Shinnah B. mai Nairobi, Kenya, e alofa le Tama Faalelagi ia te ia. Ae sa lei iloaina moni lava e ia seia oo i ni nai tausaga ua mavae, ina ua ia faalogo muamua i Le Ekalesia a Iesu Keriso o le Au Paia o Aso e Gata Ai mai le uso o lona tina.
“Sa aoaoina a’u e faifeautalai i mea ou te le’i iloa. Sa la aoaoina a’u e alofa le Tama Faalelagi ia te a’u, ma le auala e tatalo ai,” o le tala lea a Shinnah. Ina ua uma ona papatisoina o ia, na fesoasoani ni nai aafiaga iā te ia e malamalama atili ai i le alofa o le Atua mo ia. O lea ua ia taumafai nei e faaali atu lona alofa mo le Tama Faalelagi ma Iesu Keriso.
Ata na tusia e Book of Lai
O le alofa o le Atua mo Shinnah
Fesoasoaniga i le Aoga
Sa tauivi Shinnah i le aoga. I se tasi aso sa ia talanoa ai i lona peresitene o Tamaitai Talavou e uiga i ai. “Sa ia fai mai ia te a’u e tatau ona ou liliu atu i le Tama Faalelagi, aua o le a Ia fesoasoani mai ia te a’u,” o le tala lea a Shinnah. Ma sa fesoasoani mai o Ia! Ina ua uma ona tatalo Shinnah, sa ia lagonaina uunaiga mai le Agaga e uiga i mea e mafai ona ia suia. “Ina ua mavae lena, sa amata ona ou vaaia le faaleleia o la’u faatinoga.”
Iloaina o Lona Faasinomaga Paia
E fiafia tele Shinnah i le laina muamua o le autu a Tamaitai Talavou: “O a’u o se afafine pele o matua faalelagi, e i ai se natura paia ma se taunuuga e faavavau.” Fai mai a ia, “E lē tatau ona e lagonaina le tuuatoatasi, aua o loo i ou autafa le Tama Faalelagi.”
Malosi i Lona Valaauga
“Ina ua ou auai i le Ekalesia, sa le’i i ai so’u lototele e talanoa atu ai i tagata,” o le tala lea a Shinnah. “Ina ua tuuina mai ia te a’u se valaauga e avea ma se peresitene o le vasega a Tamaitai Talavou, sa ou matua te’i lava. E le’i avea muamua lava a’u ma se taitai. Sa tatau ona ou faataitaia le auala e talanoa ai i luma o isi tagata ma le auala e faasoa atu ai la’u molimau. Ma i se tasi aso na valaauina ai au e lo’u epikopo i lona ofisa. Sa ia fai mai ia te a’u e alofagia tele a’u ma o le a faamalosia a’u e le Tama Faalelagi i mea uma ou te faia.”
Alofa o Shinna mo le Atua
Alu i le Lotu
O Shinnah ma lona tuagane laitiiti o Acram, e tietie i le pasi ona savavali lea na o i laua i le lotu i vaiaso uma. O nisi taimi e faigata ona ala vave, ae la te iloa o le mea lena e finagalo le Tama Faalelagi la te faia. “Ina ua ou papatiso, sa ou faia se faaiuga e tausia le aso Sapati ia paia,” o le tala lea a Shinnah.
Filifilia Mea Tonu
E taumafai Shinnah e mulimuli i le Faaola. “Ae ou te lei auai i le Ekalesia, ou te lei iloa po o ai a’u,” o lana tala lea. “Sa valaaulia a’u e uo e o i pati, ma o ni tulaga leaga lena e i ai. Ae o lenei ua ou filifili e le alu.”
Auauna Atu i Isi
“Ou te fia fesoasoani i tagata o loo manaomia la’u fesoasoani,” o le tala lea a Shinnah. “E mafai ona ou fesoasoani ia i latou pe a latou lagonaina le tuuatoatasi po o le feagai ai ma taimi faigata. O le avea ma soo o Iesu Keriso o lona uiga e tatau ona ou tausia Ana poloaiga, mulimuli i Lana faataitaiga, ma avea ma se faataitaiga i isi.”
O Le Faamanuiaga o le Talalelei
Ua ola Shinnah i le ala o lo o ola ai ona o lona alofa mo le Tama Faalelagi. “E finagalo le Atua ia ou faapena,” o lana tala lea. “Ua ou aoaoina po o ai a’u. Ou te faafetai ona e i ai se aso e mafai ai ona ou toe foi atu i le afioaga o le Tama Faalelagi. O le auai i le Ekalesia ua suia moni ai lava lo’u olaga.”