O Lau Sailiga mo le Upumoni
Ina ia taialaina ma faamanuiaina outou, ua faaali mai ma le alofa e le Tama Faalelagi upumoni o mea e pei ona i ai nei, sa i ai, ma o le a oo mai.
Ua tele atu le malamalama ua maua i le taimi nei nai lo se isi lava taimi muamua. I aso ua mavae, afai e te fia iloa se mea, e tatau ona e alu i le faletusi ma sue. O le taimi nei, o le initoneti ma masini uulima e maua ai faamatalaga e toetoe lava a le gata e mafai ona e mauaina i le taimi lava lena.
E fiafia le Alii pe a e faaaogaina ma le atamai nei punaoa, ae i lau sailiga mo le upumoni ia manatua e vaavaai atu i le Atua, o lē na te silafia mea uma (tagai i le Mataupu Faavae ma Feagaiga 88:41). Mai ia te Ia, e mafai ona e maua ai upumoni faavavau, o le iloa lea o “mea e pei ona i ai, ma e pei ona sa i ai, ma e pei ona o le a oo mai” (Mataupu Faavae ma Feagaiga 93:24).
Faatasi ai ma upumoni ua tuuina mai e le Atua ia te oe, o se tasi o upumoni e sili ona taua o Ia o lou Tama Faalelagi. E Na te silafiaina ma alofa atoatoa ia te oe. O le malamalama ma le taliaina o lenei upumoni e faavavau na tuuina atu ai ia te oe le taitaiga ma faamanuiaga i lou muai olaga ma o le a faaauau pea ona faia i le taimi nei ma le faavavau.
Sa Outou Faatasi ma le Tama Faalelagi i le Amataga
O le moni o mea “e pei ona sa i ai” (Mataupu Faavae ma Feagaiga 93:24) ua tau mai ai ia i tatou sa tatou faatasi ma lo tatou Tama Faalelagi a o lei amataina le lalolagi (tagai i le Mataupu Faavae ma Feagaiga 93:21, 23).
A o lei oo i lo tatou olaga i le lalolagi, na tuuina mai e le Tama Faalelagi Lana fuafuaga sili o le fiafia. Na aoao mai le Perofeta o Iosefa Samita o le fuafuaga a le Atua o le tuuina mai lea ia i tatou “o se avanoa e agai ai i luma e pei o ia lava [ma] … ia faaeaina faatasi ma ia lava.” O Lana galuega ma Lona mamalu o le “aumaia le tino ola pea ma le ola faavavau o le tagata” (Mose 1:39).
Na tatou faaaogaina la tatou faitalia ma filifili e mulimuli ai i le fuafuaga a le Tama Faalelagi. Ua faamanuiaina i tatou i le fananau mai i lenei olaga lea e faaauau ai pea ona tatou maua le faitalia ma mafai ai ona tatou oo i le olaga faaletino, aoao, ma agai i luma i le ola e faavavau.
I le taimi o lau malaga i le olaga nei, o le a e oo ai i luitau ma faafitauli. Ae e le manaomia ona e feagai na o oe ma faigata o le olaga. O le a faamanuiaina oe e lou Tama Faalelagi, siitia oe, ma faamafanafanaina oe (tagai i le 2 Korinito 1:3). I le avea ai o se vaega taua o Lana fuafuaga, ua saunia ai e le Tama Faalelagi le ala mo oe e toe foi atu ai ia te Ia.
Ua Faaalia Atu ia te Oe le Ala i Lou Tama
E manino lava le moni o “mea e pei ona i ai moni” (Iakopo 4:13): e le mafai ona tatou ausia na o i tatou o tatou gafatia atoatoa o ni fanau a lo tatou Tama Faalelagi. Ona o lenei mafuaaga, ma ona o Lona alofa mo i tatou, na auina mai ai e le Atua Lona Alo e Toatasi na Fanaua, o Iesu Keriso, e faaali mai ia i tatou le ala e maua ai le fiafia, uiga, ma le olioli i lenei olaga ma le faavavau (tagai i le Ioane 3:16; Mataupu Faavae ma Feagaiga 93:11).
E taua le aafiaga faalelalolagi o le Faaola. Sa tuputupu ae o Ia seia oo ina Ia “mauaina le atoatoaga o le mamalu o le Tama” ma “le mana uma, i le lagi ma le lalolagi” (tagai i le Mataupu Faavae ma Feagaiga 93:16–17). Ua aoao mai le Faaola e faapea “e mafai ona tatou o mai i le Tama i Lona suafa, ma maua lona atoatoaga i le taimi e tatau ai.”
Ua Ia fetalai mai: “Aua afai tou te tausi i aʼu poloaiga, o le a outou maua lona atoatoaga, ma faamamaluina ia te aʼu e pei o aʼu i le Tamā; o lea, Ou te fai atu ia te outou, o le a outou maua le alofa tunoa mo le alofa tunoa.” (Mataupu Faavae ma Feagaiga 93:19–20).
I le Faatoaga o Ketesemane ma luga o le satauro, na tauave ai e Iesu Keriso i Ona lava luga agasala a le lalolagi ma mafatia i faanoanoaga uma ma “tiga ma puapuaga ma faaosoosoga o ituaiga eseese uma” (Alema 7:11). O lenei mea “na oo [ai] ia te [Ia], … o lē ua silisili i tagata uma, le gatete ona o le tiga, ma tafe toto ai i pu afu ninii uma” (Mataupu Faavae ma Feagaiga 19:18.) E na o Iesu Keriso ma Lana Togiola ma le Toetu e mafai ai ona maua le faaolataga ma le faaeaga.
E ala i le alofa tunoa ma le taulaga togiola a le Faaola, e mafai ona e tuputupu ae seia oo ina e maua se atoatoaga i se aso ma faaatoatoaina ai. A o e mulimuli i le faataitaiga a le Faaola ma usitai i Ana poloaiga, o le a Ia taitaiina ma taialaina oe i le afioaga mamalu o lo tatou Tama oi le Lagi.
Pe O le a E Maua Lana Meaalofa?
Faatasi ai ma upumoni o “mea e pei ona i ai moni” (Iakopo 4:13), ua tatou aoao ai o o tatou aafiaga i le faavavau e fuafuaina i la tatou filifiliga e mulimuli ia Iesu Keriso ma maua meaalofa ua Ia ofoina mai.
Ua aoao mai tusitusiga paia o le a tatou “fiafia i mea ua [tatou] naunau e maua” (Mataupu Faavae ma Feagaiga 88:32; faaopoopo le faamamafa). Sa aoao mai e lo’u peresitene o le misiona, o Elder Marion D. Hanks (1921–2011), i ana faifeautalai e faapea, o le fesili po o le a se mea tatou te naunau e maua ma olioli ai o se auala lea e faamasino ai po o fea o tatou i ai i la tatou malaga faaleagaga. “Auā se a le aoga i se tagata pe a tuu atu se meaalofa i ona luga, ae na te lē taliaina le meaalofa? ” (Mataupu Faavae ma Feagaiga 88:33).
A o tatou mauaina meaalofa a le Faaola e ala i le sailia ma le naunautai ma mulimuli ia te Ia, o le a tatou olioli i le faamoemoe o le ola e faavavau ma “ia te ia o lē na foaiina mai [lena] meaalofa” (Mataupu Faavae ma Feagaiga 88:33). O lenei meaalofa ua tuuina mai ma le alofa “o le meaalofa sili o meaalofa uma a le Atua” (Mataupu Faavae ma Feagaiga 14:7).
O le Atua o lou Tama Faalelagi. Na te silafia ma alofa ia te oe. A o e liliu atu ia te Ia i lau sailiga mo le upumoni, e mafai ona e maua le atamai, poto, upumoni, amiomamā, ma le malamalama (tagai i le Mataupu Faavae ma Feagaiga 88:40) seia oo mai “le aso o le a outou malamalama ai i le Atua lava, i le faaolaina o outou ia te ia, ma e ia” (Mataupu Faavae ma Feagaiga 88:49).
O le a avea lenei aso ma se aso sili ona mamalu ma olioli.