O Lau Pusa o Meafaigaluega o le Atamai Faalelagona
O nei tomai ma motugaafa i fegalegaleaiga ma isi e mafai ona fesoasoani ia te oe i le aoga, se misiona, galuega, ma le olaga lautele!
Ata na tusia e Sebastian Iwohn
O le atamai faalelagona o le tomai lea e malamalama ai i lagona o isi a o puleaina foi ou lava lagona. O le lelei tele o lo tatou faia o lenei mea, o le lelei foi lena o lo tatou auauna atu i le Alii ma isi. Mo ni motugaafa i le auala e faaleleia ai ou tomai faalelagona (ioe, e manaomia moni lava), faitau pea!
Agaalofa
O le agaalofa o lona uiga o le mafai ona malamalama i lagona o se isi tagata, e tusa lava pe na e oo i mea lava ia e tasi e pei o i latou. Ua poloaiina i tatou e le Tama Faalelagi ia “fealofani” (Ioane 15:12), ma e mafai ona tatou faia lena mea e ala i le taumafai e tuu i tatou lava i tulaga o se isi tagata.
Ia Faataitai Loa:
-
Pe a talanoa atu se tasi iā te oe, ia faalogologo lelei i faalogona o le tagata. E ui atonu e te lē o malamalama i o latou tulaga, ae atonu e mafai ona e fesoota’i atu i lagona o le lē fiafia, faanoanoa, po o soo se mea lava latou te lagonaina.
-
Fai atu i le tagata ni fesili ina ia malamalama lelei ai i lo latou tulaga. Ia taofi le ofoina atu o vaifofo.
Gagana o le Tino
E tai tutusa lava le fesoota’i o o tatou gagana o le tino ma foliga ma a tatou upu! Pe a talanoa i se tasi, e taua le faaali atu o loo tatou faalogo ma popole i mea o loo latou fai mai ai.
I taimi o le Tusi Paia, sa lē faatagaina le pa’i atu i lepela ona sa manatu ia te i latou o ni tagata lē mamā. Ae ina ua faamalolo e Iesu se lepela, sa Ia pai atu ia te ia ona faamaloloina lea o ia. E ui o le faamaloloina o se vavega ofoofogia, ae atonu na lagona e le lepela le alofagia tele atu i le iloaina e le’i fefe Iesu e pai atu ia te ia (tagai i le Mareko 1:40–42).
Ia Faataitai Loa:
-
A taumafai se tasi e talanoa atu ia te oe, ia tuu ese soo se mea faalavefau e pei o lau telefoni, meaaoga, po o le masini taalo.
-
Liliu atu e faafesagai ma le isi tagata pe a talanoa atu ia i latou, ma tilotilo atu i o latou mata.
Faia o Talanoaga Faigata
E le mafai ona aloese mai feteenaiga, ae ua faamanino mai e le Faaola e tatau ona tatou aloese mai finauga (tagai i le 3 Nifae 11:29–30). E ona faigata ona tumau i le onosai i taimi o se talanoaga faigata, aemaise lava pe afai e amata ona amio faatamaititi pe ita le isi tagata.
Ia Faataitai Loa:
-
Ia Faaaloalo. O le taumafai e faia mea uma e faamaonia ai e sa’o oe e le o le ala lea a le Faaola. E tusa lava pe o e tu atu mo le upumoni, e mafai ona e “faaaoga le lotoa, ae le o le faafiamalosi” (Alema 38:12).
-
Fai se malologa pe afai ua matua vevela tele le talanoaga. O nisi taimi tatou te manaomia ai sina taimi na o i tatou e faato’ato’a ai ma mafaufau na o i tatou. E le faapea la ua e “fiu”—ua na ona e sefeina o le talanoaga mo se isi taimi, pe a to’a tagata uma.
Faalogo
O le faalogo o se mataupu faavae taua i le talalelei. Tatou te taumafai e faalogo i le Faaola, i le Agaga, i perofeta ma aposetolo.
E taua foi le faalogo i a tatou mea e fai i aso taitasi! Na aoao mai Elder Jeffrey R. Holland: “E sili atu le taua o le faalogo nai lo le tautala. … Afai tatou te faalogo ma le alofa, e le tatau ona tatou tau manatunatu pe o le a le tala e fai. O le a tuuina mai ia i tatou—e ala i le Agaga faapea ma a tatou uo” (“konafesi aoao Ape. 2001 [Ensign, Me 2001, 15]).
Ia Faataitai Loa:
-
Aloese mai le faalavelave i isi tagata a o latou talanoa.
-
A o talanoa le isi tagata, aua le fuafuaina i lou mafaufau le mea o le a sosoo ai (tagai i le Tala’i La’u Talalelei: O Se Taiala i le Faasoaina Atu o le Talalelei a Iesu Keriso [2023], 192).
-
Fesili i le tagata pe na o lo latou manaomia se tasi e faalogo atu pe latou te mananao foi i se fautuaga.