O LooE Faia le Talafaasolopito—O Le Auala Lenei e Faamaumau ai!

Afai e te le fiafia e tusitusi, aua le popole! O le tusiaina o tusiga uumi e le na o le pau lea o le auala e tausia ai se api talaaga. Faataitai i faiga eseese e saili ai po o le a le mea e sili ona aoga mo oe. O nisi nei o manatu:

• Tusi se ata pe tusi ni ata komi e faamatala pe faapupula ai lou aso.

• Faaaoga leo (otiō) ua pueina.

• Fai se api e faapipii i ai ni mea faitino mai ni vaega tāua lava o lou olaga , e pei o ata po o ni ulu o pepa ulufale.

• Ta i totonu au tusiga i lau api talaaga.

• Fai ni lisi, e pei o au sini o aso taitasi po o mea e te lotofaafetai ai.

O le mea muamua ma o le vaega sili foi lea ona tāua, o lau api talaaga e mo oe! Aua le popole i le faia ia atoataoa lelei.

O se vaega o le lē faamasinoina o lau api talaaga o le tusia lea o soo se mea e oo mai i lou mafaufau. Afai e te lagona e tusia se mea ae popole ona e faapea e le manaia tele pe e le’i fuafuaina, ia faamaumau pea! E te le iloa lava po o le a se mea e ono tāua ia te oe i se taimi mulimuli ane. E pei ona saunoa Presitene Spencer W. Kimball (1895–1985), “O oe e tulaga ese, ma atonu e i ai mea e tutupu i ou aafiga e sili atu ona tamalii ma tauleleia i o latou ala nai lo o mea ua faamaumauina i soo se isi lava olaga.”

Aua e te faamasinoina oe lava pe afai e te misia se aso—pe sili atu! Toe amata i le mea ua e i ai nei ma faatumu mea na e misia pe a mafai. E le afaina le tusitusi e uiga i mea na tutupu e aunoa ma se faasologa sa’o.

Afai e te le o mautinoa po o le a le mea e tusi, amata i se uunaiga. Sa faaaoga e Henry B. Eyring o le Au Peresitene Sili se uunaiga e tausia ai lana api talaaga i aso taitasi:

“Ae ou te lei tusia se mea, ou te mafaufau lava i le fesili lenei: ‘Pe na ou vaaia le aao o le Atua o aapa mai e pai mai ia i maua po o le ma fanau po o le matou aiga i le asō?’… A o faasolo lou mafaufau i le aluga o le aso, ou te vaaia faamaoniga o mea na faia e le Atua mo se tasi o i matou. … Sa ou iloaina o le taumafai e manatua na mafai ai e le Atua ona faaali mai ia te a’u le mea na Ia faia.”

O le amata i se fesili e mafai ona fesoasoani ia te oe e taulai atu ai ma tuuina atu ia te oe se vaaiga fou, e pei ona sa iai mo Peresitene Eyring. O nisi nei o uunaiga o api talaaga e taumafai ai:

• Tusi e uiga i se upusii po o se mau na faaosofia ai oe.

• Tusi se tusi i se tasi i lou olaga (e te le tau lafoina atu).

• Tali fesili e pei o le, “Afai e mafai ona e malaga i soo se mea i le lalolagi, o fea o le a e alu i ai?” po o le “O le a se mea e te manao e avea ai pe a e matua?”

• Faamatala se aafiaga faaleagaga na faamalosia ai lau molimau.

• Tusi e uiga i se mea na aumaia ia te oe le olioli i le asō.

Pe na e iloa o le api talaaga e mafai ona fesoasoani ia te oe e faaleleia ai lou manatua, aveesea ai le atuatuvale, ma pulea ai ou lagona? O ni mafuaaga maoae nei e amata ai se api talaaga!

Ae o faamanuiaga e sili atu ona loloto. O le tausia o se api talaaga na fesoasoani ia Peresitene Thomas S. Monson (1927–2018) e mafaufau ai i lona olaga i se auala ese. Sa ia saunoa:

“Afai tatou te toe tepa tasi i tua ma mafaufau i faamanuiaga i o tatou olaga, e aofia ai faamanuiaga iti, po o faamanuiaga tatou te le o iloa, ona mafai lea ona tatou maua se fiafiaga sili atu. …

“… O le mau aafiaga e tele sa ou oo i ai, e le ono faitaulia e se tasi o se mea e matua maoae. … Ae, a toe tepa i ai, na faamauoaina ai ma faamanuiaina ai olaga—e aofia ai ma lo’u lava olaga.”

A o e tausia se api talaaga, o le a e atiina ae se vaaiga fou i lou olaga. O le toe tepa i tua ma le faamoemoega o le vaai pe na faapefea ona taitai oe e le Alii e faatagaina ai ona e iloa faamanuiaga ma e oo lava i vavega atonu na e misia muamua. O le a sili atu lou mauaina o manatuaga mamana faaleagaga lea o le a faamalosia ai oe i taimi faigata. O se faamanuiaga lena e te le manao e misia!