Sa Masani ona Ou Fefe i Teine

I ni nai tausaga ua mavae, ou te lei talanoa i se tasi i fafo atu o lo’u aiga, a’u uo mamae e toalima pe toaono, ma ni nai tagata masani. E leai se tasi o a’u uo o se teine, ma o uo sa ou faia sa talitutusa lava ma a’u. Ou te le talanoa i teine ona sa ou fefe ia i latou. Ou te lei manao e talanoa i se tasi e ese mai ia te a’u. Ou te lei iloa pe faapefea ona faia se talanoaga pe afai e le tutusa mea matou te fiafia i ai.

I lena taumafanafana, sa ou alu ai i la’u uluai konafesi a le MMA. Sa ou taumafai e aua le talanoa i teine o la’u kamupani mo aso muamua e lua ona ou te lei iloa pe faapefea. Ae na iu lava ina amata ona latou talanoa mai ia te a’u ma faauo mai ia te a’u, ma sa ou iloaina o i latou o ni tagata lelei.

I le amataga o lo’u tausaga aoga na sosoo ai, sa ou i ai i le tulaga o le “faamalosia o taaga a tupulaga” e alu ai i la’u siva muamua i le aoga. Sa ou fesili i se teine sa ou talanoa muamua i ai i se vasega. Atonu sa ia tau le iloa po o ai a’u, ae sa ia fai mai o le a ma o. O lenei mea na faamalosia ai a’u e talanoa atu ia te ia. Sa ou fiafia lava i le tafaoga faamasani a le vaega ma sa avea ai o se uo lelei le teine lea sa ma o faatasi i le siva.

Ina ua mavae lena, sa ou iloaina o teine o ni tagata masani foi. O tagata uma e ese mai ia te a’u ua na o se isi lava tagata, e pei lava o a’u nei. O i tatou uma o fanau a le Atua, aisea la o le a ou aloese ai mai se tasi ona o o latou foliga, uiga, po o mea e fiafia i ai?

O le taimi nei, o nisi o a’u uo mamae o ni teine, ma o le toatele o a’u uo e matuai ese lava mai soo se tasi ou te manatu o le a ou faaaluina se taimi i le lua tausaga talu ai.

Manatua, e eseese tagata uma mai ia te oe, ma o se mea lelei lena. Aua le taulai atu na o na eseesega, ae taumafai e faauo atu i tagata o siomia oe.