E Lē o le Atua Lena
Upumoni e 5 e uiga i lo Tatou Tama Faalelagi
E mafai ona tatou aoaoina le tele o mea e uiga i le Atua pe a tatou malamalama i i vaega e le patino ia te Ia.
Ata na tusia e Camila Gray
O se tasi o faamanuiaga sili o le Toefuataiga o le toe faaali mai lea e le Atua o Ia lava ma Lona uiga o se Tama Faalelagi alofa. Ae o nisi taimi e i ai o tatou mafaufau po o manatu e uiga i le Atua lea e le moni. A tupu lenei mea, e mafai ona tatou aoaoina le tele o mea e uiga i le Atua e ala i malamalama i vaega e lē patino ia te Ia.
O le Atua e lē o se tagata ese i se nofoālii mamao, mamao lava.
O Ia o lo tatou Tama, e sili atu ona matagofie nai lo le tama sili ona lelei faalelalolagi e mafai ona e mafaufauina. E ui lava tatou te le manatuaina lo tatou muai olaga faatasi ma Ia, ae na te silafia i tatou taitoatasi ma le atoatoa. E i ai Lona tino atoatoa o aano ma ivi, ma o i tatou o Lona faatusa.
Afai e te tauivi e vaai faalemafaufau pe faapei le Atua, o loo i ai se faataitaiga atoatoa: O Lona Alo, o Iesu Keriso. Na fetalai Keriso, “O A’u nei o le ala, upu moni, ma le ola; e le alu atu lava se tasi i le Tama, pe a le ui mai ia te aʼu. Ana iloa e outou o a’u, po ua iloa foi e outou lo’u Tamā.” (Ioane 14:6–7). I se isi faaupuga, afai tatou te fia iloa pe faapei le Tama Faalelagi, e mafai ona tatou aoao pe faapei Iesu Keriso! Ua La autasi atoatoa i le faamoemoega.
O le Atua e lē o se isi e pisi tele mo oe.
O le mea moni, o le fesoasoani ia te oe ia maua le ola e faavavau o Lana galuega ma Lona mamalu lea. O oe o Lana taulaiga #1! E le o noatia o Ia i le taimi e pei ona tatou i ai nei. Aapa atu ia te Ia i le tatalo i soo se taimi. Ona faalogo lea mo le tele o auala o loo Ia tali mai ai.
O le Atua e lē o se tasi e faamalosia oe e mulimuli ia te Ia.
Na aoao mai Elder Dale G. Renlund o le Korama a Aposetolo e Toasefululua, “O le sini a lo tatou Tama Faalelagi i tulaga faamatua, e le o le tatau lea i Lana fanau ona fai le mea sao; o le tuu atu i Lana fanau e filifili e fai le mea sao ma mulimuli ane avea e faapei o Ia.” O le a Ia valaauliaina oe, fefautuaai ma oe, ma aoao oe i le upumoni, ae o le a Ia le aveesea lou faitalia e ala i le faamalosia o oe e mulimuli ia te Ia.
O le Atua e lē o se tasi o loo taumafai ia maua oe o faia se mea sese ina ia mafai ona Ia faasalaina oe.
Nai lo lena, e pei ona faaupuina e Elder Patrick Kearon o le Korama a Aposetolo e Toasefululua, “O loo saili pea lava pea oe e le Atua,” o lona uiga o le a le fiu lava o Ia i le taumafai e fesoasoani ia te oe e toe foi atu ia te Ia. Na te silafia o le a tatou feagai uma lava ma mea faigata pe a tatou faia ni mea sese. O lea ua Ia saunia ai se auala mo i tatou e faamamaina ai mai agasala ma maua ai le malosi e ala i le Togiola a Lona Alo.
O le Atua e lē o se tasi o loo faatalitali mo oe ina ia “lava” pe “atoatoa” ao le’i alofa o Ia ia te oe.
O Lona alofa mo oe e lē gata. E alofa o Ia ia te oe i le taimi nei, e ui lava ina ‘e lē lelei atoatoa! Na tuuina mai e Peresitene Jeffrey R. Holland, o le Sui Peresitene o le Korama a Aposetolo e Toasefululua, se faamaninoga mamana e uiga i lenei upumoni: “‘O mai e pei ona outou i ai,’ o le tala lea a se Tama alofa ia i tatou taitoatasi, ae na Ia faaopoopo mai, ‘Aua le fuafua e tumau ia pea e pei ona outou i ai nei.’ Tatou te ataata ma manatua o loo naunau lava le Atua ia faia i tatou ia sili atu i lo tagata ua tatou mafaufau e mafai ona avea ai i tatou.” Faatasi ai ma le alofa atoatoa ma le faamalosiau, o loo taumafai le Tama Faalelagi e fesoasoani ia te oe ia avea e faapei o Ia ma maua mea uma ua Ia maua, i le la’a e tasi i le taimi.
O AI le Atua
O le auala sili e iloa ai lou Tama Faalelagi o le faaauau pea ona maua ni aafiaga ma Ia. E faapefea? Aoao e uiga ia te Ia ma Lona Alo mai tusitusiga paia ma upu a perofeta soifua. Tatalo atu ia te Ia. Tausi Ana poloaiga. Faaalu se taimi filemu, patino e tapuai ai ia te Ia i le lotu, i le malumalu, ma isi nofoaga paia. Osia ma tausia feagaiga ma Ia. O le a fesoasoani o Ia ia te oe ia iloa po o ai o Ia ma ona lagona e uiga ia te oe.