“Ei, O oe o Matteo, le Mamona, E sa’o?”

E aunoa ma lo’u fai atu o se upu se tasi, sa vave ona sosolo atu le tala o la’u tapua’iga. Sa amata ona ou mauaina fesili i aso taitasi e uiga i lo’u faatuatuaga, lea e masani ona amata i le “Ei, o oe o Matteo, le Mamona, e sao?” O le tele o fesili sa moni, o nisi sa faate’ia ma i se tulaga le fetaui, o isi sa lotovale, ma o nisi sa na o le faatalasua.

Sa fesili mai se tasi o uo ia te a’u ma le faamaoni, “Pe le moni o outou e le ‘aai i moli?” lea na ou tali atu ai ma le faatausua, “Oi ioe, o moli e sau sa’o lava mai le tiapolo.” A o ma taliē, sa ou iloaina sa faamamaina lona popole lea sa i ai muamua, ma sa ma lagonaina se sootaga malosi atu o ni uo.

Talu ai sa le mafai ona ou solaese mai lo’u tulaga ta’uta’ua fou ua i ai nei, sa ou filifili ai e fatu ni avanoa o le a faaopoopo ai le talie i talanoaga e ono le lagolelei. Sa ou faaaogaina se avanoa ma alu ai (e ofu) o se faifeautala’i e faia sana pine, mo le Halloween (o se aso malolo o teuga e faamanatuina ia Oketopa). Sa ou iloaina o se taumafaiga lamatia lenei e mafai ona tauemuina atoa a’u, ae sa ou maua se lagona o le faia o lena mea o le a faaalia ai sa ou mautinoa o’u talitonuga.

Na tauia le tulaga lamatia. O le savalivali solo i le lotoa a o avea ma se faifeautalai na ataata ai tagata uma ma na faaosofia ai ni vasega e faatinoina ma le ola. Sa ou talepeina ni upu/faiga masani ma faia ni uo fou.

Ina ua mavae le Halloween, sa suia uiga faaalia o tagata ia te a’u, ma o fesili e uiga i lo’u faatuatuaga na tupuga mai i tupulaga na fesili mai ia te a’u mo se fautuaga e uiga i o latou lava olaga. I se tulaga na faate’ia ai a’u, o uo ma tagata masani o e na faamalamalamaina mai le uluai faate’ia i le iloaina ou te le inu, ulaula, pe faia fualaau faasaina ma o loo ou faatalitali se’i faaipoipo ona i ai lea o tulaga feusuai, sa latou liliu mai ia te a’u mo se taitaiga faapitoa i na autu.

Sa ou i ai i le tulaga o le faamautinoa atu i uo o e na lagonaina le faamalosia e faia feusuaiga, e faapea ua ia i latou le mana e filifili ai, uunaia nisi e o atu i le faufautua o le aoga e talanoa i ai e uiga i popolega o le soifua maloloina faalemafaufau ma vaisu, ma e oo lava i le faamafanafanaina o se tasi na faia se mea sese e ono taitai atu ai i le faateaeseina. Sa ou le mautonu i le auala na mafai ai e le toatele o a’u uo ona suia mai le faatauemu mai ia te a’u i le sailia o la’u fautuaga.

I le aluga o taimi, sa ou malamalama ai o le matuai to’a atoatoa lelei, tautala sao, ma le vaivai e uiga i le ituaiga tagata sa ou i ai, na tosina mai ai isi ia te a’u o ē sa sailia se nofoaga sa le i ai se tulaga faamasinoina ma se taliga e faalogo.

Ou te faafetai mo lesona taua e lua sa ou aoaoina i lena tausaga. O le mea muamua e faapea, o le talie maloloina e mafai ona soloia ai le popole ma finauga ma o se auala sili lea e tuufaatasia ai tagata. O le lona lua e faapea, o le filifili e talitonu i le ituaiga tagata o lo o e i ai e aumaia ai ni avanoa ofoofogia e fesoasoani ai i isi ia semanu e le oo mai lava.

Sa tele taimi sa ou manao ai e nana la’u tapuaiga ma ia lauiloa e ala i se isi mea. Ae o le i ai o se lagona malie ma le vaivai i le ituaiga tagata sa ou i ai, sa faatagaina ai tagata ia iloa o a’u o Matteo, ae le na o se tasi e ese talitonuga.