Ae a pe a Ou Tauivi ma le Faamaualuga po o le Ita?

E faigofie ia ona ou ita. Sa ou faalogologo i le tele o sāvali o le konafesi lea e talanoa e uiga i le ita ma aoaoina ai a tatou feita, e masani lava ona tatou faamaualuga. Ma o le faamaualuga e tuueseeseina ai i tatou mai le Atua. O le ita o se luitau o loo ou taumafai e faatoilalo.

Sa ta’u mai e se faiaoga seminare ia te au e faapea, ina ia faatoilaloina le ita, e mafai ona ou taumafai e sui i se uiga faaKeriso. Sa ou filifili e taumafai e sui lo’u ita i le gafatia e faamagalo atu ai.

I le taimi o la’u vasega seminare, sa togi ai e se tasi o la’u vasega ni tusitusiga paia i luga o lo’u vae. Sa ou ita i lena taimi, ma sa ou ee atu ia te ia. Ae na ou manatuaina le faamagaloga faaKeriso. Ina ua uma le vasega, sa ou alu atu ia te ia ma fai atu ia te ia ou te faamalie atu ona o lo’u ee atu ia te ia. Sa ou faamagaloina o ia, ona ia faatoese mai foi lea.

A o ou faataitaia le vaavaai atu ia Keriso e ala i le faamagalo atu, ua ou vaai ia te au lava ua suia. Ou te taumafai e vaai i mea i se vaaiga e faavavau nai lo le ita. Pe a ou taulai atu ia Keriso ma auai i le seminare, e faamalosia ai la’u molimau ia te Ia, ma e mafai foi ona ou fesoasoani i isi e faamalosia a latou lava molimau.