O Oa Natia

Afai o le Ekalesia o se masini, o le a avea ma se masini tele e tele ona vaega. O nisi vaega o le a sili atu ona iloagofie ma foliga mai e sili atu ona “taua” nai lo isi, ae e oo lava i tamai vaega ma nati natia o le a i ai se matafaioi.

Ua fetalai mai le Alii: “O lea, ia tuu atu i tagata taitoatasi ia tu i lona lava tofi, ma galue i lona lava valaaulia, ma ia lē tuu atu i le ulu e fai atu i vae ua lē manaomia e ia vae; aua a aunoa ma vae o le a mafai faapefea e le tino ona tu? E faapea foi ona manaomia e le tino itutino taitasi uma, ina ia mafai ona faagaeetia uma faatasi, ina ia mafai ona tausi i le atoatoa le faatulagaga” (MF&F 84:109–10).

E manaomia e a tatou uarota ma paranesi ni tagata e lelei le tautala faapea foi ma tagata e lelei le faalogo. Tatou te manaomia epikopo ma peresitene o le Aualofa faapea foi failautusi o le Aoga Sa ma taitai o vasega pepe. Tatou te manaomia tagata filemu, tagata lototoa, tagata malie, tagata faanoanoa; tagata e fiafia e fai lava lana ia galuega, tagata e fiafia fai fai mea ma galulue ma isi tagata, inisinia, tusiata. E manaomia e le Ekalesia taleni ma malosiaga eseese o tagata uma.

E le afaina pe o le a le “iloga” o le galuega. O matafaioi taitasi i le Ekalesia e tāua i le Alii.

Ina ua faaali mai e le Alii e faapea “o le a liligi ifo taua i luga o atunuu uma” (Mataupu Faavae ma Feagaiga 87:3), sa Ia ta’u atu foi i le Au Paia le mea e fai e uiga i ai:

“Ia outou tutula’i ai i nofoaga paia, ma aua le masi’i ese” [Mataupu Faavae ma Feagaiga 87:8).

O a “nofoaga paia”? O malumalu, ioe (pe afai tatou te ulufale atu ma le agavaa). E faapena foi i falesa. Ua ta’u mai e o tatou taitai ia i tatou ia avea foi o tatou fale ma nofoaga paia. Tatou te faia lena mea e ala i le faaalia o le alofa ma le lotogatasi i le aiga, suesue i le talalelei, ma valaaulia le Agaga.

Ae e le finagalo le Alii tatou te lalafi i o tatou fale, falesa, ma malumalu i taimi uma. E finagalo o Ia ia tatou o atu i le lalolagi e faasalalau atu le olioli ma auauna atu i isi.

O le mafuaaga lena ua tatou maua ai le Agaga Paia: toetoe lava o soo se nofoaga e mafai ona avea ma se “nofoaga paia” pe afai e mafai ona nofo ai le Agaga iina.

E aofia ai o tatou potuaoga, malae taalo, ofisa, taavale, potu faatalitali, faletaalo—soo se mea lava e te alu i ai e mafai ona avea ma se nofoaga o musumusuga pe afai e te lotomaualalo, faatuatua, ma faamaoni.

O le mea moni, e mana’omia ona tatou atamamai ma aua ne’i saili ni siosiomaga lē lelei pe i ai i se tulaga lamatia. Ae o le manatu o le Alii e faapea, e le manaomia ona tatou popole tele i mala o aso e gata ai. E mafai ona tatou faia a tatou pisinisi—aoga, galuega, faafiafiaga, olaga—a o puipuia pea pe afai tatou te mulimuli i le taitaiga a le Agaga.

Pe na e aoaiina ea se tasi e te alofa i ai? E faigata! E pei o le tele o mea, e mafai ona tatou vaai atu i le faataitaiga a le Faaola. E faia e le Alii le tele o aoaiga i le Mataupu Faavae ma Feagaiga, ae ia faia pea lava pea ma le alofa.

Mo se faataitaiga, o loo i ai le vaega 93. Sa manaomia uma ona faasa’oina Iosefa Samita, Feterika G. Viliamu, ma Sini Rikitone i nisi o mea. Na fetalai mai le Alii ia i latou o ni “auauna” (fuaiupu 41, 44, 45), ona Ia faamanino mai lea: “Po o i nisi upu, o le a Ou ta’ua outou o ni uo, ona o outou o a’u uo, ma o le a outou maua se tofi faatasi ma a’u” (fuaiupu 45). Mulimuli ane, na ta’ua e le Faaola le vaega atoa o Ana “uo” (i le fuaiupu 51).

Aisea e tāua ai lea mea? Ia, e tiga le aoaiina, a ea? Ua faaalia e le Alii le faateleina o le alofa e ala i le faamanatu atu ia Iosefa ma isi, e ui lava i o latou mea sese ma vaivaiga, ae o i latou lava, o Ana uo.

Ana uo! Tagata e fiafia i ai o Ia ma e manao e faatasitasi! E faapena fo’i Ona lagona e uiga ia te oe. O i tatou uma o Ana uo.