សម័យប្រជុំរសៀលថ្ងៃអាទិត្យ
គារវភាពចំពោះកិច្ចការពិសិដ្ឋ
សេចក្តីដកស្រង់
ក្នុងនាមជាសិស្សរបស់ព្រះយេស៊ូវគ្រីស្ទ យើងត្រូវបានអញ្ជើញឲ្យបណ្ដុះអំណោយទាននៃគារវភាពនៅក្នុងជីវិតរបស់យើង ដើម្បីបើកខ្លួនយើងទៅកាន់ទំនាក់ទំនងដ៏កាន់តែជ្រាលជ្រៅជាមួយព្រះ និងព្រះរាជបុត្រារបស់ទ្រង់គឺព្រះយេស៊ូវគ្រីស្ទ ក្នុងពេលជាមួយគ្នានោះ ក៏ពង្រឹងបុគ្គលិកលក្ខណៈខាងវិញ្ញាណរបស់យើងផងដែរ ។ ប្រសិនបើយើងមានអារម្មណ៍បែបនេះកាន់តែច្រើននៅក្នុងដួងចិត្តយើង នោះនឹងមានអំណរ និងសេចក្តីរីករាយកាន់តែច្រើននៅក្នុងជីវិតយើង ហើយនឹងមានកន្លែងតិចតួចសម្រាប់ទុក្ខព្រួយ និងភាពសោកសៅ ។ …
គួរឲ្យស្ដាយ យើងរស់នៅក្នុងពិភពលោកមួយដែលការបង្ហាញគារវភាពចំពោះកិច្ចការពិសិដ្ឋ កំពុងតែក្លាយជារឿងកាន់តែមិនពេញនិយមខ្លាំងឡើងៗ ។ …
… ការគ្មានគារវភាពចំពោះកិច្ចការពិសិដ្ឋ គឺជាជំនួយដល់គោលបំណងរបស់មារសត្រូវ ដោយការបង្អាក់នូវរបៀបដែលយើងទទួលវិវរណៈ ដែលសំខាន់ចំពោះការរស់រានខាងវិញ្ញាណនៅក្នុងសម័យរបស់យើង ។ …
បងប្អូនប្រុសស្រីរបស់ខ្ញុំអើយ ការមានគារវភាពចំពោះភាពពិសិដ្ឋជំរុញឲ្យមានការដឹងគុណដោយស្មោះ ពង្រីកសុភមង្គលពិតប្រាកដ ដឹកនាំគំនិតរបស់យើងទៅរកវិវរណៈ ហើយនាំមកនូវអំណរដ៏ធំដល់ជីវិតរបស់យើង ។ វានាំឲ្យយើងឈរនៅលើទីដ៏បរិសុទ្ធ ហើយលើកដួងចិត្តរបស់យើងទៅរកព្រះ ។
ខ្ញុំសូមថ្លែងទីបន្ទាល់ទៅកាន់បងប្អូនថា នៅពេលយើងខិតខំបញ្ចូលគុណធម៌បែបនេះទៅក្នុងជីវិតប្រចាំថ្ងៃរបស់យើង យើងនឹងអាចបង្កើនភាពរាបសារបស់យើង ពង្រីកការយល់ដឹងរបស់យើងអំពីឆន្ទៈរបស់ព្រះសម្រាប់យើង និងពង្រឹងទំនុកចិត្តរបស់យើងនៅក្នុងការសន្យានៃសេចក្តីសញ្ញាដែលយើងបានធ្វើជាមួយព្រះអម្ចាស់ ។ ខ្ញុំសូមធ្វើជាសាក្សីថា នៅពេលយើងឱបក្រសោបអំណោយទាននៃគារវភាពនេះចំពោះរឿងពិសិដ្ឋៗ—មិនថានៅក្នុងដំណាក់របស់ព្រះអម្ចាស់ នៅក្នុងសាលាប្រជុំ ឬនៅក្នុងផ្ទះរបស់យើងផ្ទាល់នោះទេ—យើងនឹងពោរពេញដោយការភ្ញាក់ផ្អើល និងការស្ញប់ស្ញែង នៅពេលយើងភ្ជាប់ទៅនឹងសេចក្តីស្រឡាញ់ដ៏ឥតខ្ចោះរបស់ព្រះវរបិតាសួគ៌របស់យើង និងព្រះយេស៊ូវគ្រីស្ទ ។