សម័យប្រជុំព្រឹកថ្ងៃអាទិត្យ
គ្រាតាំងរបស់ទាំងអស់ឡើងវិញ
សេចក្តីដកស្រង់
ការបង្កើតឡើងជាផ្លូវការនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ គឺជាលំដាប់លំដោយនៃបទពិសោធន៍ដ៏អព្ភូតហេតុ ។ …
ការបង្ហាញព្រះកាយនៃព្រះវរបិតា និងព្រះរាជបុត្រាចំពោះ យ៉ូសែប ស្ម៊ីធ ការបកប្រែ និងការលេចចេញមកនៃព្រះគម្ពីរមរមន និងការស្ដារឡើងវិញនៃកូនសោ និងសិទ្ធិអំណាចបព្វជិតភាព គឺជាតម្រូវការចាំបាច់ដើម្បីបង្កើតសាសនាចក្រដែលបានស្ដារឡើងវិញរបស់ព្រះអម្ចាស់កាលពី ១៩៥ ឆ្នាំកន្លងទៅ មកទល់នឹងសព្វថ្ងៃនេះ ។
… មួយឆ្នាំបន្ទាប់ពីការបង្កើតសាសនាចក្រ ព្រះអម្ចាស់បានណែនាំ យ៉ូសែប ស្ម៊ីធ ថាកូនសោនគរនៃព្រះ « ត្រូវបានផ្ទុកផ្ដាក់ដល់មនុស្សនៅលើផែនដី » ហើយ « ដំណឹងល្អ [ នៃព្រះយេស៊ូវគ្រីស្ទនឹង ] ត្រូវរមៀលចេញទៅដល់ទីបំផុតផែនដី ដូចជាថ្មដែលដាប់ផ្ដាច់ចេញពីភ្នំឥតដៃណាធ្វើ នឹងរមៀលចេញទៅរហូតដល់បានពេញផែនដីទាំងមូល » ជាថ្មីម្តងទៀត ។
ខ្ញុំសូមថ្លែងទីបន្ទាល់ថា ៖ ព្រះអម្ចាស់បានបំពេញការសន្យារបស់ទ្រង់ ។ …
… ដោយជាផ្នែកនៃការស្ដារឡើងវិញដែលបានព្យាករនៃអ្វីៗទាំងអស់នៅក្នុងថ្ងៃចុងក្រោយ ពួកព្យាការី និងពួកសាវកពីបុរាណ បានប្រគល់សិទ្ធិអំណាចដល់ យ៉ូសែប ស្ម៊ីធ ដោយផ្ទាល់ ហើយបានប្រគល់ឲ្យនូវកូនសោបព្វជិតភាពដល់លោក ។ …
កិច្ចការនៅថ្ងៃចុងក្រោយរបស់ព្រះអម្ចាស់ « គឺជាបុព្វហេតុដែលប្រជារាស្ត្ររបស់ព្រះចាប់អារម្មណ៍នៅក្នុងគ្រប់សម័យកាល វាគឺជាប្រធានបទមួយដែលព្យាការី សង្ឃ និងស្តេចបានរស់នៅក្នុងគ្រាដ៏រីករាយអស្ចារ្យ ពួកគេបានទន្ទឹងចាំដោយអំណរនាជំនាន់ដែលពួកយើងរស់នៅ ហើយបានរីករាយដោយអំណរ និងសេចក្ដីសង្ឃឹមពីសួគ៌ារហូតដល់ពួកគេបានច្រៀង ហើយសរសេរ ព្រមទាំងបានព្យាករពីជំនាន់របស់យើងនេះ » ។ …
« ដំណឹងល្អ » ដ៏សំខាន់ និងរុងរឿងបំផុត គឺជាសារលិខិតដែលព្រះអម្ចាស់ព្រះយេស៊ូវគ្រីស្ទបានស្ដារដំណឹងល្អ និងសាសនាចក្ររបស់ទ្រង់ឡើងវិញនៅក្នុងថ្ងៃចុងក្រោយនេះ ។
សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ គឺជាសាសនាចក្ររបស់ព្រះគ្រីស្ទនៅក្នុងគម្ពីរសញ្ញាថ្មីដែលបានស្ដារឡើងវិញ ។