សម័យប្រជុំល្ងាចថ្ងៃសៅរ៍
ទ្រង់ជាព្រះគ្រីស្ទ
សេចក្តីដកស្រង់
អ្វីដែលទ្រង់បានអធិស្ឋាន មិនអាចយកមកសរសេរបានឡើយ ដោយ ខាស៊ី ឆាលស៍
នៅពេលកូនប្រុសរបស់យើង អ៊ីឡាយរៀនថ្នាក់ទីបួន ថ្នាក់របស់គាត់បានបង្កើតរដ្ឋាភិបាលសាកល្បងមួយ ដែលគាត់ត្រូវបានបោះឆ្នោតដោយមិត្តភក្តិរបស់គាត់ឲ្យបម្រើជាចៅក្រមក្នុងថ្នាក់ ។ ថ្ងៃមួយ ចៅក្រមមួយរូបមកពីតុលាការមណ្ឌលទី២ រដ្ឋយូថាហ៍បានមកធ្វើទស្សនកិច្ច ហើយយកឯកសណ្ឋានផ្លូវការរបស់គាត់ពាក់ឲ្យអ៊ីឡាយ ហើយបន្ទាប់មកបានប្រកាសពីការចូលកាន់តំណែងសម្រាប់ថ្នាក់របស់ពួកគេ ។ រឿងនេះបានបញ្ឆេះចំណាប់អារម្មណ៍នៅក្នុងព្រលឹងដ៏ក្មេងខ្ចីរបស់អីឡាយ ឲ្យមានចំណង់សិក្សាផ្នែកច្បាប់ ហើយព្រះយេស៊ូវគ្រីស្ទទ្រង់ផ្ទាល់ជាអង្គបង្កើតច្បាប់ ។
បន្ទាប់ពីការខិតខំប្រឹងប្រែងសិក្សាជាច្រើនឆ្នាំ អ៊ីឡាយបានទទួលការអញ្ជើញឲ្យសម្ភាសជាមួយសាលាច្បាប់ជម្រើសកំពូលមួយ ។ គាត់បាននិយាយថា « …សំណួរចុងក្រោយគឺ ‹ តើអ្នកទទួលបានត្រីវិស័យដែលដឹកនាំអ្នកឲ្យដឹងខុសត្រូវនៅឯណា ? › … ខ្ញុំបានថ្លែងថា ប្រសិនបើមនុស្សជាតិទាំងអស់គោរពតាមការបង្រៀនរបស់ព្រះយេស៊ូវគ្រីស្ទនៅក្នុងទេសនកថានៅលើភ្នំនោះពិភពលោកនឹងក្លាយជាកន្លែងដ៏ល្អប្រសើរជាង មានភាពសុខសាន្ដជាងមុន » ។ បន្ទាប់មកបទសម្ភាសនោះបានបញ្ចប់ ហើយគាត់បានគិតក្នុងចិត្តថា « ក្ដីសុបិនពីកុមារភាពរបស់ខ្ញុំរលាយអស់ហើយ ។ គ្មាននរណាម្នាក់នៅក្នុងវិស័យសិក្សាអប់រំខាងលោកិយចង់ឮអំពីព្រះយេស៊ូវគ្រីស្ទនោះទេ » ។
ពីរសប្តាហ៍ក្រោយមកអ៊ីឡាយ ត្រូវបានសាលាផ្ដល់អាហារូបករណ៍ឲ្យចូលសិក្សា ។ មុនចូលរៀន ពួកយើងបានទៅមើលបរិវេណសាលា ។ … អ្វីគួរឲ្យកត់សម្គាល់នោះ គឺនៅពេលដែលយើងដើរឆ្លងកាត់បណ្ណាល័យដ៏ស្កឹមស្កៃ និងច្រករបៀងដ៏វែង យើងបានឃើញនៅលើបដា និងចម្លាក់នៅលើថ្មគឺមាននូវកាយវិការដកស្រង់ចេញពីទេសនកថាលើភ្នំ ។
ទេសនកថាលើភ្នំគឺជាសុន្ទរកថាពិសេសដ៏គួរឲ្យកត់សម្គាល់ដែលមិនធ្លាប់មានពីមុនមក ។ ជាទេសនកថាបង្រៀនដ៏វិសេសបំផុត ។ គ្មានទេសនកថាណាផ្សេងទៀតអាចជួយយើងឲ្យយល់កាន់តែច្បាស់អំពីបុគ្គលិកលក្ខណៈរបស់ព្រះយេស៊ូវគ្រីស្ទ គុណលក្ខណៈដ៏ទេវភាពរបស់ទ្រង់ និងគោលបំណងដ៏ធំរបស់យើងដើម្បីក្លាយដូចជាទ្រង់ឡើយ ។ …
យើងត្រូវបញ្ចូលពន្លឺនៃព្រះយេស៊ូវគ្រីស្ទនៅគ្រប់ជ្រុងទាំងអស់ក្នុងជីវិតរបស់យើង ។ …