សម័យប្រជុំរសៀលថ្ងៃសៅរ៍
« គេនឹងដឹងថាអ្នករាល់គ្នាជាសិស្សរបស់ខ្ញុំ ដោយសារសេចក្ដីនេះឯង »
សេចក្តីដកស្រង់
ព្រះយេស៊ូវបានមានព្រះបន្ទូលថា « ចូរស្រឡាញ់គ្នាទៅវិញទៅមក » ។ « គេនឹងដឹងថាអ្នករាល់គ្នាជាសិស្សរបស់ខ្ញុំ ដោយសារសេចក្ដីនេះឯង » ។ ជាញឹកញាប់ ទីបន្ទាល់ ដំបូងរបស់មនុស្សម្នាក់អំពីព្រះយេស៊ូវគ្រីស្ទកើតមាននៅពេលគាត់ ឬនាងទទួលអារម្មណ៍ក្ដីស្រឡាញ់នៅក្នុងចំណោម ពួកសិស្ស របស់ព្រះយេស៊ូវគ្រីស្ទ ។ …
នរណាដែលកំពុងស្វែងរកជំនឿកាន់តែខ្លាំងទៅលើព្រះគ្រីស្ទ ឬមានទំនាក់ទំនងកាន់តែជិតស្និតទៅនឹងព្រះវរបិតាសួគ៌ គួរតែដឹងថាវាមាននៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ …
ដូច្នេះខណៈដែលយើងកាន់តាមបទដ្ឋានដ៏ខ្ពស់របស់ព្រះអម្ចាស់ ចូរយើងអត់ធ្មត់ចំពោះគ្នាទៅវិញទៅមកផងដែរ ។ …
… ដើម្បីមានដួងចិត្ត តែមួយ នោះយើងត្រូវតែមានដួងចិត្ត បរិសុទ្ធ ហើយវាតម្រូវឲ្យមាន ការផ្លាស់ប្ដូរក្នុងដួងចិត្តដ៏ធំ ។
ប៉ុន្តែនោះពុំមានន័យថាត្រូវផ្លាស់ប្ដូរដួងចិត្តរបស់ខ្ញុំដើម្បីឲ្យត្រូវនឹងបងប្អូននោះទេ ។ ហើយក៏ពុំមានន័យថាត្រូវផ្លាស់ប្ដូរដួងចិត្តរបស់បងប្អូនឲ្យត្រូវនឹងខ្ញុំនោះដែរ ។ វាមានន័យថាយើងទាំងអស់គ្នាផ្លាស់ប្ដូរដួងចិត្តរបស់យើងដើម្បីឲ្យត្រូវទៅនឹងព្រះអង្គសង្គ្រោះ ។ …
ហើយបើសិនជាបងប្អូនមានអារម្មណ៍ថាបងប្អូនមិនចុះចំណោមគេ សូមដឹងថាបងប្អូនពុំឯកោឡើយ ។ …
… យើងរួបរួមគ្នាតែមួយ ពុំមែនដោយសារតែកន្លែងដែលយើងធ្លាប់នៅនោះទេ ប៉ុន្តែជាកន្លែងដែលយើងកំពុងព្យាយាមទៅ ពុំមែនព្រោះតែយើងជានរណាទេ ប៉ុន្តែជាមនុស្សដែលយើងព្យាយាមប្រែក្លាយ ។
នោះហើយគឺជាសាសនាចក្រពិតរបស់ព្រះគ្រីស្ទ ។ …
ហើយចុះបើបងប្អូនខុសប្លែកពីមនុស្សដែលនៅជុំវិញបងប្អូនវិញនោះ ? រឿងនោះពុំធ្វើឲ្យបងប្អូនពុំសមនោះឡើយ—វាធ្វើឲ្យបងប្អូនក្លាយជាផ្នែកដ៏សំខាន់មួយនៃរូបកាយរបស់ព្រះគ្រីស្ទវិញ ។ …
នោះពុំមានន័យថា ការងាររបស់បងប្អូនគឺត្រូវផ្លាស់ប្ដូរមនុស្សគ្រប់រូបដើម្បីឲ្យក្លាយដូចជាបងប្អូននោះទេ ។ ប៉ុន្តែវាមានន័យថា បងប្អូនមានអ្វីមួយសំខាន់ដើម្បីចូលរួមចំណែក—ហើយថាបងប្អូនមានអ្វីមួយសំខាន់ដើម្បីរៀនសូត្រ !