« ការចាប់ផ្តើមថ្មីមួយ » ប្រិយមិត្ត ខែមករា ឆ្នាំ២០២៦ ទំព័រ ៣៨–៣៩ ។
ការចាប់ផ្តើមថ្មីមួយ
« តើខ្ញុំអាចបន្តនៅស្អាតបន្ទាប់ពីខ្ញុំបានធ្វើបុណ្យជ្រមុជទឹកដោយរបៀបណា ? »
ដំណើររឿងពិតមកពីប្រទេសបារាំង
អាឡិចសាន់ឌឺ នៅតែប៉ុន្មានថ្ងៃទៀតប៉ុណ្ណោះគ្រប់អាយុប្រាំបីឆ្នាំហើយ ! គាត់រំភើបខ្លាំងណាស់ព្រោះគាត់ និងឪពុកកំពុងរៀបចំអាហារសម្រន់សម្រាប់បុណ្យខួបកំណើតដ៏ពិសេសមួយ សម្រាប់ឲ្យគាត់ញ៉ាំក្រោយពេលចេញពីរៀន ។ នៅពេលដែលពួកអ្នកផ្សព្វផ្សាយសាសនាបានមកដល់សម្រាប់អាហារពេលល្ងាច នោះ អាឡិចសាន់ឌឺ បានប្រាប់ពួកគេទាំងអស់អំពីនំសូកូឡាដ៏ឆ្ងាញ់ដែលគាត់បានជ្រើសរើស ។
« យើងនឹងមានទានមួយនៅលើនំទាំងប្រាំបី ជាជាងមានទៀនប្រាំបីនៅលើនំមួយ ! »
អែលឌើរ ឡូវណើរ សើច ។ « ស្តាប់ទៅអស្ចារ្យណាស់ ទុកឲ្យខ្ញុំខ្លះផង ! »
បន្ទាប់ពីអាហារពេលល្ងាចរួច ពួកអ្នកផ្សព្វផ្សាយសាសនាបានបង្រៀនមេរៀនមួយអំពីបុណ្យជ្រមុជទឹក ។ អែលឌើរ ដូយ៉ុន ងាកទៅរក អាឡិចសាន់ឌឺ ។ « នៅពេលប្អូនបានទទួលបុណ្យជ្រមុជទឹក ប្អូនបានជ្រើសរើសដើរតាមព្រះយេស៊ូវគ្រីស្ទ » ។ គាត់បានប្រាប់ អាឡិចសាន់ឌឺ អំពីពិធីបុណ្យជ្រមុជទឹករបស់គាត់ និងចែកចាយទីបន្ទាល់របស់គាត់ផងដែរ ។ « ព្រះវិញ្ញាណបរិសុទ្ធបានជួយខ្ញុំឲ្យមានអារម្មណ៍សប្បាយរីករាយណាស់ ពីព្រោះថ្ងៃនោះខ្ញុំបានជ្រើសរើសធ្វើតាមព្រះយេស៊ូវគ្រីស្ទ » ។
អាឡិចសាន់ឌឺ ទន្ទឹងរង់ចាំសម្រាប់ថ្ងៃបុណ្យជ្រមុជទឹករបស់គាត់ !
ប៉ុន្តែនៅពេលដែលគាត់ចូលគេងពេលយប់នោះ គាត់បែរជាគេងរសេះរសោះមិនលក់សោះ ។ គាត់ចូលចិត្តគំនិតនៃការស្អាត និងថ្មីនេះ ។ ប៉ុន្តែតើគាត់នឹងនៅស្អាតក្រោយពីពិធីបុណ្យជ្រមុជទឹកដោយរបៀបណា ?
នៅព្រឹកបន្ទាប់ អាឡិចសាន់ឌឺ ដើរទៅសាលារៀនជាមួយលោកប៉ា ។ លោកប៉ាបាននិយាយថា « កូនពិតជាស្ងប់ស្ងាត់ណាស់នៅព្រឹកនេះ » ។ « តើមានរឿងអី ? »
អាឡិចសាន់ឌឺ ដកដង្ហើមធំ « ខ្ញុំប្រាថ្នាថា ខ្ញុំអាចទទួលបុណ្យជ្រមុជទឹកច្រើនដងបាន » ។
« ហេតុអ្វី ? » លោកប៉ាសួរ ។
« តើខ្ញុំអាចនៅរក្សាភាពស្អាតដោយរបៀបណាក្រោយពីខ្ញុំបានទទួលបុណ្យជ្រមុជទឹកហើយ ? » អាឡិចសាន់ឌឺ សួរ ។ « ខ្ញុំភ្លេចអ្វីៗគ្រប់ពេល—ដូចជាការនិយាយជំរាបសួរ និងអរគុណដល់មនុស្សធំ និងការអត់ធ្មត់ជាមួយប្អូនប្រុសរបស់ខ្ញុំ ។ ខ្ញុំដឹងថា ខ្ញុំនឹងនៅតែធ្វើកំហុស ។ យើងទទួលបុណ្យជ្រមុជទឹកបានតែម្តងប៉ុណ្ណោះ ដូច្នេះខ្ញុំនឹងមិនអាចស្អាតម្តងទៀតបានទេ » ។
លោកប៉ាឈប់ ហើយបានមើលទៅកែវភ្នែករបស់ អាឡិចសាន់ឌឺ ។ « អស្ចារ្យណាស់ ! នោះប្រហែលជាមានអារម្មណ៍ដ៏ច្រើនលើសលប់បន្តិចហើយមើលទៅ ។ តើកូននៅចាំទេ នៅពេលដែលយើងនិយាយអំពីការសន្យានៅឯពិធីបុណ្យជ្រមុជទឹក ? »
អាឡិចសាន់ឌឺ បានងក់ក្បាល ។ « កូនគិតថាកូនចាំ » ។
« នៅពេលកូនជ្រមុជទឹក កូនធ្វើការសន្យា ឬចុះសេចក្តីសញ្ញាជាមួយនឹងព្រះវរបិតាសួគ៌ ។ កូនសន្យាថានឹងរក្សាបញ្ញាតិរបស់ទ្រង់ និងធ្វើតាមព្រះយេស៊ូវគ្រីស្ទ ។ បន្ទាប់ពីនោះ រាល់ពេលដែលកូនទទួលទានសាក្រាម៉ង់ នោះកូនអាចនឹកចងចាំព្រះយេស៊ូវ និងរបៀបដែលទ្រង់អាចជួយកូនឲ្យប្រែចិត្តផងដែរ » ។
អាឡិចសាន់ឌឺបានបើកភ្នែកធំៗ ។ « ដូច្នេះ ខ្ញុំអាចមានអារម្មណ៍ថាស្អាតដូចនៅពេលដែលខ្ញុំបានទទួលបុណ្យជ្រមុជទឹកឬ ? »
លោកប៉ាបាននិយាយ « ប្រាកដណាស់ » ! « ព្រះវរបិតាសួគ៌ជ្រាបដឹងថា កូនមិនល្អទេហើយពេលខ្លះកូននឹងធ្វើការជ្រើសរើសខុស ។ ប៉ុន្តែនៅពេលដែលកូនមានបាប នោះកូនអាចប្រែចិត្ត និងបន្តព្យាយាមធ្វើតាមព្រះយេស៊ូវគ្រីស្ទបាន ។ តើស្តាប់ទៅដូចជាអ្វីដែលកូនអាចធ្វើបានដែរឬទេ ? »
អាឡិចសាន់ឌឺ ញញឹម ។ « បាទ ! កូនគិតថា កូនអាចធ្វើកិច្ចការនេះបាន » ។
នៅពេលថ្ងៃខួបកំណើតរបស់ អាឡិចសាន់ឌឺ មកដល់ គ្រួសាររបស់គាត់បានរៀបចំអាហារសម្រន់សម្រាប់ខួបកំណើតរបស់គាត់ក្រោយពីចេញពីសាលារៀន ។ វាឆ្ងាញ់ណាស់ ! ហើយនៅឯពិធីបុណ្យជ្រមុជទឹករបស់គាត់ អាឡិចសាន់ឌឺ មានអារម្មណ៍ល្អបន្ថែមទៀតនៅខាងក្នុងចិត្ត នៅពេលដែលគាត់ងើបឡើងពីទឹកវិញ ។ គាត់បានសន្យាថានឹងធ្វើតាមព្រះយេស៊ូវគ្រីស្ទ ហើយនោះធ្វើឲ្យមានអារម្មណ៍អស្ចារ្យណាស់ !
សប្តាហ៍នោះ អាឡិចសាន់ឌឺ បានព្យាយាមដោយអស់ពីសមត្ថភាព ដើម្បីរក្សាសេចក្តីសញ្ញាថ្មីរបស់គាត់ និងមានចិត្តសប្បុរសចំពោះប្អូនប្រុសរបស់គាត់ ។ ប៉ុន្តែនៅពេលថ្ងៃអាទិត្យបន្ទាប់មកដល់ គាត់បានមានការខកចិត្តបន្តិច ។ គាត់មានអារម្មណ៍ថា គាត់អាចធ្វើការជ្រើសរើសប្រសើរជាងមុននៅសប្តាហ៍នោះ ។
ខណៈពេលចែកពិធីសាក្រាម៉ង់ អាឡិចសាន់ឌឺ អោបដៃរបស់គាត់ និងបានឱនក្បាលរបស់គាត់ ។ គាត់បានទូលសួរព្រះវរបិតាសួគ៌ដោយស្ងៀមស្ងាត់ ដើម្បីជួយគាត់ឲ្យធ្វើកាន់តែប្រសើរឡើងនៅសប្តាហ៍ក្រោយ ។ គាត់បានគិតអំពីរបៀបដែលព្រះយេស៊ូវស្រឡាញ់គាត់ និងរបៀបដែលគាត់ចង់ក្លាយឲ្យកាន់តែដូចជាទ្រង់ ។
នៅពេលដែលគាត់បានយកនំបុ័ងមួយដុំពីថាសសាក្រាម៉ង់ អាឡិចសាន់ឌឺ មានអារម្មណ៍កក់ក្តៅ និងពោរពេញដោយភាពសុខសាន្តនៅក្នុងចិត្ត ។ គាត់មានអារម្មណ៍ដូចកាលនៅពេលដែលគាត់បានទទួលបុណ្យជ្រមុជទឹករបស់គាត់អ៊ីចឹងដែរ ! លោកប៉ាបានកៀកស្មារបស់ អាឡិចសាន់ឌឺ ហើយបានញញឹមដាក់គាត់ ។
ថ្ងៃនេះគឺជាការចាប់ផ្តើមនៃសប្តាហ៍ថ្មី ហើយ អាឡិចសាន់ឌឺ នឹងធ្វើអោយអស់ពីសមត្ថភាពរបស់គាត់—ដោយមានជំនួយពីព្រះវរបិតាសួគ៌ ។
រចនារូបភាពដោយ ថូប៊ី ញ៉ូវសាំ