« អ៊ីចឹងក្មួយបានទទួលបុណ្យជ្រមុជទឹករួចហើយ ។ ឥឡូវត្រូវធ្វើដូចម្តេចទៀត ? » ប្រិយមិត្ដ ខែមករា ឆ្នាំ២០២៦ ទំព័រ ៣៦–៣៧ ។
អ៊ីចឹងក្មួយបានទទួលបុណ្យជ្រមុជទឹករួចហើយ ។ ឥឡូវត្រូវធ្វើដូចម្តេចទៀត ?
តើក្មួយបានទទួលបុណ្យជ្រមុជទឹករួចហើយឬនៅ ? នោះល្អណាស់ ! ព្រះវរបិតាសួគ៌ និងព្រះយេស៊ូវគ្រីស្ទមានសេចក្តីរីករាយណាស់ ដែលក្មួយបានធ្វើការជ្រើសរើសបែបនោះដើម្បីធ្វើតាមទ្រង់ទាំងទ្វេ ។
ពិធីបុណ្យជ្រមុជទឹកគឺគ្រាន់តែជាជំហានដំបូងមួយប៉ុណ្ណោះក្នុងដំណើររបស់ក្មួយ ឆ្ពោះទៅកាន់ទំនាក់ទំនងនៃសេចក្តីសញ្ញាដ៏អស្ចារ្យមួយជាមួយនឹងព្រះវរបិតាសួគ៌ និងព្រះអង្គសង្រ្គោះរបស់ក្មួយ ។ នេះគឺជារឿងមួយចំនួនដែលក្មួយបន្តធ្វើ ឬចាប់ផ្តើមធ្វើនៅពេលឥឡូវនេះក្រោយពីក្មួយបានទទួលបុណ្យជ្រមុជទឹករួចហើយ ។
ចូលស្តាប់តាមព្រះវិញ្ញាណបរិសុទ្ធ
នៅចាំពេលដែលក្មួយបានទទួលអំណោយនៃព្រះវិញ្ញាណបរិសុទ្ធ បន្ទាប់ពីពិធីបុណ្យជ្រមុជទឹករបស់ក្មួយដែរឬទេ ? ឥឡូវនេះ ទ្រង់អាចគង់នៅជាមួយក្មួយជានិច្ច នៅពេលដែលក្មួយជ្រើសរើសធ្វើល្អ ។ ព្រះវិញ្ញាណបរិសុទ្ធ ជាញឹកញាប់ទាក់ទងជាមួយយើងតាមរយៈគំនិត និងអារម្មណ៍ ។ ការស្តាប់តាមព្រះវិញ្ញាណបរិសុទ្ធនឹងជួយក្មួយធ្វើការជ្រើសរើសល្អ និងស្វែងរកសេចក្តីអំណរដ៏ពិតប្រាកដ ។
គិតអំពីវា ៖ តើក្មួយមានអារម្មណ៍នៃព្រះវិញ្ញាណបរិសុទ្ធនៅពេលណា ? វាអាចជាបទពិសោធន៍ធំ ឬតូចមួយ !
ប្រែចិត្ត
នៅពេលដែលព្រះយេស៊ូវគ្រីស្ទបានធ្វើដង្វាយធួនសម្រាប់អំពើបាបរបស់យើង ទ្រង់បានធ្វើឲ្យវាអាចធ្វើទៅបានសម្រាប់យើងទាំងអស់គ្នាដើម្បីប្រែចិត្ត ។ ការប្រែចិត្តមានន័យថា ការងាកចេញពីការជ្រើសរើសធ្វើខុស ហើយបែរទៅរកព្រះវរបិតាសួគ៌ និងព្រះយេស៊ូវគ្រីស្ទ ។ ទ្រង់ទាំងទ្វេសព្វព្រះទ័យណាស់ នៅពេលដែលយើងជ្រើសរើសដើម្បីប្រែចិត្ត ពីព្រោះវាជួយឲ្យយើងកាន់តែខិតទៅជិតជាមួយនឹងទ្រង់ទាំងទ្វេ ។
គិតអំពីវា ៖ តើរឿងអ្វីមួយដែលប្អូនអាចធ្វើបាន ដែលនឹងជួយក្មួយបែរទៅរកព្រះវរបិតាសួគ៌ និងព្រះយេស៊ូវគ្រីស្ទ ?
ការទទួលទានសាក្រាម៉ង់
ក្រោយពីពិធីបុណ្យជ្រមុជទឹករបស់ក្មួយ ពិធីសាក្រាម៉ង់គឺកាន់តែពិសេសទៅទៀត ។ ឥឡូវនៅពេលដែលក្មួយទទួលទានសាក្រាម៉ង់ នោះក្មួយកំពុងបន្តសេចក្តីសញ្ញាដែលក្មួយបានធ្វើនៅឯពិធីបុណ្យជ្រមុជទឹក ដើម្បីរក្សាបញ្ញាត្តិទាំងឡាយ និងធ្វើតាមព្រះយេស៊ូវគ្រីស្ទ ។ នៅពេលក្មួយមិនរក្សាបញ្ញាត្តិទាំងនេះឲ្យបានល្អឥតខ្ចោះទេ នោះពិធីសាក្រម៉ង់ គឺជាការរំឭកប្រចាំសប្តាហ៍ថា ដោយសារតែព្រះយេស៊ូវគ្រីស្ទ នោះយើងអាចប្រែចិត្ត ហើយត្រូវបានអភ័យទោស ។
គិតអំពីវា ៖ តើវិធីមួយដែលក្មួយអាចធ្វើឲ្យពិធីសាក្រាម៉ង់ពិសេសនៅក្នុងសប្តាហ៍នេះគឺជាអ្វី ?
រៀបចំខ្លួនទៅព្រះវិហារបរិសុទ្ធ
ព្រះវិហារបរិសុទ្ធគឺជាដំណាក់ដ៏បរិសុទ្ធរបស់ព្រះ ។ នៅឆ្នាំដែលក្មួយមានអាយុ១២ឆ្នាំ នោះក្មួយអាចទៅព្រះវិហារបរិសុទ្ធបាន និងអាចជួយអ្នកដទៃតាមរយៈការធ្វើបុណ្យជ្រមុជទឹកសម្រាប់មរណជន ។ ក្រោយមកទៀត ក្មួយអាចធ្វើសេចក្តីសញ្ញាផ្ទាល់ខ្លួនបន្ថែមទៀតជាមួយនឹងព្រះវរបិតាសួគ៌បាន ។ អ្វីដែលក្មួយរៀននៅក្នុងព្រះវិហារបរិសុទ្ធ នឹងជួយក្មួយឲ្យក្លាយកាន់តែដូចជាព្រះវរបិតាសួគ៌ និង ព្រះយេស៊ូវគ្រីស្ទ !
គិតអំពីវា ៖ តើរឿងអ្វីមួយដែលក្មួយអាចធ្វើបាននៅពេលឥឡូវនេះ ដើម្បីរៀបចំខ្លួនទៅព្រះវិហារបរិសុទ្ធ ?
រចនារូបភាពដោយ អាលីហ្សា ភីធើរសិន