« រៀបចំខ្លួនដើម្បីដើរជាមួយនឹងព្រះយេស៊ូវ » ប្រិយមិត្ត ខែមករា ឆ្នាំ២០២៦ ទំព័រ ៤–៥ ។
រៀបចំខ្លួនដើម្បីដើរជាមួយនឹងព្រះយេស៊ូវ
ជម្រាបសួរ !
យើង ហៃលី និង វ៉ាយអូឡែត ជាបងប្អូនស្រីភ្លោះមកពីរដ្ឋអារីហ្សូណា សហរដ្ឋអាមេរិក ។ យើងចង់ធ្វើតាមគំរូរបស់ព្រះអង្គសង្គ្រោះ ដូច្នេះយើងកំពុងរៀបចំខ្លួនដើម្បីទទួលបុណ្យជ្រមុជទឹក !
យើងចូលចិត្តដើរតាមដងទន្លេនៅជិតផ្ទះរបស់យើង ។ នៅពេលយើងបានទទួលបុណ្យជ្រមុជទឹក នោះយើងនឹងចាប់ផ្តើមការដើរខាងវិញ្ញាណថ្មីមួយជាមួយនឹងព្រះយេស៊ូវ ! ព្រះវិញ្ញាណបរិសុទ្ធនឹងគង់នៅជាមួយយើង នៅពេលដែលយើងព្យាយាមធ្វើតាមព្រះអង្គសង្គ្រោះជារៀងរាល់ថ្ងៃ ។
ពេលខ្លះយើងប្រមូលសំបកខ្យងខ្ចៅពណ៌សតូចៗនៅតាមដងទន្លេ ។ សំបកទាំងនេះរំឭកយើងអំពីអ្វីមួយដែលព្រះអង្គសង្គ្រោះបានសន្យា ៖ « ទោះបើអំពើបាបរបស់ឯងដូចជាពណ៌ក្រហមទែងក៏ដោយ គង់តែនឹងបានសដូចហិមៈ » ( អេសាយ ១:១៨ ) ។ ដោយសារតែព្រះយេស៊ូវគ្រីស្ទ នោះយើងអាចប្រែចិត្ត ហើយបានស្អាតស្អំម្ដងទៀត ក្រោយពីយើងធ្វើការជ្រើសរើសខុស ។ យើងនឹងស្លៀកពាក់ពណ៌សនៅថ្ងៃបុណ្យជ្រមុជទឹករបស់យើងដើម្បីចងចាំរឿងនេះផងដែរ ។
ឪពុករបស់យើងពិតជាពូកែក្នុងការគប់ដុំថ្មប៉ប្រះនៅលើទឹកទន្លេ ! គាត់កំពុងបង្រៀនយើងពីរបៀបគប់វា ហើយយើងគប់កាន់តែប្រសើរឡើងបន្តិចម្តងរាល់ពេលដែលយើងព្យាយាម ។ ការណ៍នេះគឺដូចជារបៀបដែលព្រះយេស៊ូវគ្រីស្ទគឺជាគ្រូដ៏ល្អឥតខ្ចោះ ។ ទ្រង់សព្វព្រះទ័យចង់ជួយយើងឲ្យរៀន និងរីកចម្រើន ។
ថ្មនៅក្នុងទន្លេនេះគឺរអិលណាស់ ហើយការកាន់ដៃម្តាយរបស់យើងជួយកុំឲ្យរអិល ។ ព្រះយេស៊ូវគឺតែងតែគង់នៅទីនោះជាមួយយើង នៅពេលដែលយើងត្រូវការជំនួយ ។ ហើយនៅពេលដែលយើងទទួលបុណ្យជ្រមុជទឹក នោះយើងនឹងសន្យាជួយដល់អ្នកដទៃតាមរបៀបដែលទ្រង់នឹងធ្វើដែរ !
យើងចូលចិត្តដើរតាមដងមាត់ទន្លេជាមួយគ្រួសាររបស់យើង ។ នៅពេលដែលយើងទទួលបុណ្យជ្រមុជទឹក យើងនឹងដើរនៅលើផ្លូវនៃសេចក្តីសញ្ញា ដែលដឹកនាំត្រឡប់ទៅរកផ្ទះស្ថានសួគ៌របស់យើង ។ យើងអាចរស់នៅជាមួយក្រុមគ្រួសាររបស់យើងជានិរន្តរបាន !
ខ្ញុំរំភើបចិត្តណាស់ដែលបានទទួលបុណ្យជ្រមុជទឹក ពីព្រោះខ្ញុំចង់ធ្វើតាមគំរូរបស់ព្រះយេស៊ូវ ។ ខ្ញុំអាចបង្ហាញព្រះវរបិតាសួគ៌ថា ខ្ញុំចង់រក្សាព្រះបញ្ញត្តិទាំងឡាយ ។
វ៉ាយអូឡែត ដ័បុលយូ អាយុ៧ឆ្នាំ រដ្ឋអារីហ្សូណា ស.រ.អា.
ខ្ញុំចង់ធ្វើតាមព្រះយេស៊ូវគ្រីស្ទ ។ ក្រោយពីខ្ញុំបានទទួលបុណ្យជ្រមុជទឹក ខ្ញុំអាចមានព្រះវិញ្ញាណបរិសុទ្ធ ហើយព្រះវិញ្ញាណបរិសុទ្ធអាចជួយខ្ញុំឲ្យក្លាហាន ។
ហៃលី ដ័បុលយូ អាយុ៧ឆ្នាំ រដ្ឋអារីហ្សូណា ស.រ.អា.