Toko 9
I Jesoa Fony Zazalahy kely
Lehibe tao amin’ny tanànan’i Nazareta i Jesoa. Nianatra zavatra maro Izy ka “nihanahery, … ary ny fahasoavan’Andriamanitra dia tao aminy.”
Lioka 2:39–40
Rehefa feno 12 taona i Jesoa, dia niaraka tamin’i Josefa sy i Maria tao anatin’ny vondron’olona iray handeha hanatrika andro firavoravoana tany Jerosalema. Tany izy ireo nandritra ny andro maromaro.
Lioka 2:41–43
Rehefa nandeha nody i Josefa sy i Maria, dia nieritreritra izy ireo fa niara-dia taminy niverina tany Nazareta niaraka tamin’ny namany i Jesoa. Kanefa dia nijanona tany Jerosalema i Jesoa.
Lioka 2:43–44
Rehefa nitady an’i Jesoa i Josefa sy i Maria, dia tsy nahita Azy. Tsy nisy na iray aza tamin’ireo olona niara-dia taminy nahita Azy. Ary dia niverina tany Jerosalema i Josefa sy i Maria. Nitady an’i Jesoa nandritra ny hateloana izy ireo. Tena nalahelo izy ireo.
Lioka 2:44–46
Nony farany dia nahita an’i Jesoa tany amin’ny tempoly izy ireo, niresaka tamin’ny mpampianatra maromaro. Namaly ny fanontanian’izy ireo Izy. Gaga tamin’ny fahalalana maro nananan’i Jesoa ireo mpampianatra.
Lioka 2:46–47
Nolazain’i Maria i Jesoa fa niahiahy ny momba Azy izy sy i Josefa. Novalian’i Jesoa izany nanao hoe nanao ny Asan’ny Rainy Izy, ny asan’Andriamanitra. Tsy azon’i Josefa sy i Maria ny tiany nolazaina.
Lioka 2:48–50
Nandeha nody niaraka tamin’i Josefa sy i Maria i Jesoa ary nankatò azy ireo.
Lioka 2:51
Nianatra bebe kokoa hatrany ny momba ny asan’ny Rainy any an-danitra i Jesoa.
Lioka 2:52
Nihalehibe sy natanjaka Izy.
Lioka 2:52
Tia Azy ny olona. Nanao izay tian’Andriamanitra hataony Izy.
Lioka 2:52
Tia Azy Andriamanitra.
Lioka 2:52