Ako Fakataukei Hono 10
Fakatupulaki ha Ngaahi Sīpinga Fakakaukau Lelei
ʻE lava ke tākiekina mālohi kitautolu ʻe heʻetau ngaahi fakakaukaú, ʻo tatau ai pē pe ʻoku lelei pe kovi. ʻE lava ke fakalakalaka ʻetau vakai ki he moʻuí mo ʻetau malava ke fai e ngāue ʻa e ʻEikí ʻi hono fakatupulaki ha ngaahi sīpinga fakakaukau ʻoku leleí.
Taki fealēleaʻakí: Feinga ke fakamatala nounou ʻa e konga “Fakaʻuhingaʻí” mo e “Fakatātaaʻí” koeʻuhí ke maʻu ʻe he kau akó ha taimi lahi ke akoako.
Fakaʻuhingaʻí
Taki fealēleaʻakí: Fakafeʻiloaki ʻa e tefito ki he ako fakataukei ko ʻení ʻaki hono vahevahe ʻa e ngaahi meʻa ko ʻení. Te ke lava foki ʻo fakakaukau ke ako fakataha ʻa e Tokāteline mo e Ngaahi Fuakava 6:36. Fakaafeʻi e kau akó ke vahevahe e founga ʻe lava ke tokoniʻi ai ʻenau moʻuí ʻi he muimui ki he faleʻi ʻa e ʻEikí ʻi he veesi ko ʻení.
ʻOku tākiekina ʻe heʻetau ngaahi fakakaukaú ʻa e ongo ʻoku tau maʻú mo e meʻa ʻoku tau faí (vakai, Lea Fakatātā 23:7). ʻE lava ke iku e ngaahi fakakaukau fakaholomuí ki he loto-foʻí, veiveiua pē ʻiate kitá, manavasiʻí, ʻitá, mo e ongoʻi siva e ʻamanakí. ʻE lava ke iku e ngaahi fakakaukau leleí ki he fakatuʻamelié, loto-falalá, mo e ʻamanaki leleí.
Ko e founga ʻe taha te tau lava ai ʻo fakatupulaki e ngaahi sīpinga fakakaukau leleí ko hono lekooti ʻetau ngaahi fakakaukau ʻoku ʻikai leleí pea toe hiki ia koeʻuhí ke:
-
Lahi ange e ʻamanaki leleí.
-
Lahi ange moʻoní.
-
Fakahaaʻi e tui kia Sīsū Kalaisí.
Taki fealēleaʻakí: Fakakaukau ke hiki ʻa e ngaahi fakahinohino ʻe tolu ko ʻení ʻi he palakipoé.
Fakatātaaʻi
Taki fealēleaʻakí: Fakatātaaʻi ʻa e taukei ko ʻení ʻaki hono fakaʻaliʻali mo aleaʻi ha niʻihi ʻo e ngaahi sīpinga ko ʻení naʻe toʻo mei he “Liliu ʻo e Fakakaukau Halá” ʻi he Ko e Fakaangaanga ki he Moʻui Fakafaifekaú ([2013], 21). Te ke lava ʻo fakaafeʻi ha kau mēmipa kehekehe ʻo e kalasí ke nau lau leʻolahi ʻa e sīpinga takitaha ki he kalasí.
|
Ko ʻeku ngaahi fakakaukau halá |
Ko ʻeku toe tohi ke fakatupulaki ʻa e fakakaukau leleí |
|---|---|
|
ʻOku ou fehiʻa he ʻā hengihengí. |
ʻOku ʻikai fiemaʻu ke u saiʻia ai. ʻOku ou tui te u lava ʻo fai ʻeni. ʻI heʻeku ʻā ke kamata fai ha meʻá, mahalo te u ongoʻi lelei ange. Te u lava ʻo lotua e tokoni ʻa e ʻOtuá. |
|
He ʻikai ke u teitei ikunaʻi ʻa e ʻahó ni. |
Kuó u lavaʻi ʻa e ʻaho kotoa pē, pea te u toe lavaʻi ʻa e ʻahó ni. Ko e meʻa pē ke u fai he taimi ní ke u fakahoko taha taha ʻa e meʻa ʻoku hoko maí. ʻI heʻeku tafoki ki he Fakamoʻuí, te Ne tokoniʻi au ke u lavaʻi ʻa e ʻaho ko ʻení. |
|
Naʻe kovi ʻa e lēsoni ko ʻení. |
ʻOku lelei ange e ngaahi lēsoni ʻe niʻihi ʻi he toengá. Ko ha meʻa lelei ʻa ʻeku fie fakalakalaká. ʻOku ou ʻilo ʻe tali ʻe he ʻOtuá ʻeku ngaahi ngāue lelei tahá. Mahalo pē ʻe lava hoku hoá ʻo tokoni mai ke u fakalakalaka. |
Taki fealēleaʻakí: Fakaafeʻi e kau akó ke vahevahe ʻa e founga ne nau mamata ai ki he ngaahi fakahinohino ʻe tolu naʻe fakatātaaʻi ʻi he ngaahi sīpinga ko ʻení. Te mou lava foki ʻo aleaʻi ha ngaahi fehuʻi hangē ko ʻení:
-
Ko e hā e meʻa naʻe makehe kiate koe mei he ngaahi sīpinga ko ʻení?
-
ʻE lava fēfē ʻe he faʻahinga tōʻonga fakakaukau ko ʻení ʻo tokoniʻi hoʻo moʻuí?
Ako Fakahoko
Taki fealēleaʻakí: ʻOange ha faingamālie ki he kau akó ke nau akoako fakahoko ʻa e taukei ko ʻení mo hanau hoa. Fakakaukau ke fakaʻaliʻali ʻa e ngaahi fakahinohino ko ʻení:
Toe hiki ʻa e ngaahi fakakaukau hala ko ʻení ki ha ngaahi fakamatala ʻoku fakatupu ʻamanaki lelei mo moʻoni ange, pea ʻokú ne fakahaaʻi ʻa e tui kia Sīsū Kalaisí:
-
“ʻOku lelei ange ʻa e taha kotoa ʻi he meʻá ni ʻiate au. ʻOku ʻikai pē totonu ke u kau heni.”
-
“ʻOku ʻikai ke u lava ʻo talanoa ki ha sola. ʻOku fuʻu fakailifia ia!”
-
“ʻOku ou mātuʻaki taʻemaau maʻu pē.”
Taki fealēleaʻakí: Fakaafeʻi ha niʻihi tokosiʻi ʻo e kau mēmipa ʻo e kalasí ʻe loto-fiemālié ke nau vahevahe ʻa e founga ne nau toe fakamatalaʻi ai ha taha ʻo e ngaahi fakakaukau halá. Ke akoako lahi ange, fakakaukau ke fakaafeʻi e kau akó ke nau hiki ha ngaahi fakakaukau hala ne nau maʻu kimuʻa. ʻOange ha taimi ke nau akoako toe hiki ai e ngaahi fakakaukau ko ʻení ke fakatupu ʻamanaki lelei ange, moʻoni, mo fonu ʻi he tuí.
Fakaʻaongaʻí
Taki fealēleaʻakí: Vahevahe ʻeni ke tokoni ki he kau akó ke nau fakaʻaongaʻi ʻa e taukei ko ʻení:
ʻI he ʻaho ʻe fitu hono hokó, tuku ha taimi ke hiki ai ha niʻihi ʻo e ngaahi fakakaukau hala ʻokú ke maʻú. Toe hiki ia ke nau hoko ʻo ʻamanaki lelei mo moʻoni ange pea ke fakahaaʻi hoʻo tui kia Sīsū Kalaisí. Tokanga ki he founga ʻoku tākiekina ai koe ʻe he founga ko ʻení.