Fakaʻaongaʻi ʻa e Mālohi ʻo e Tohi ʻa Molomoná

• ʻOku fakafaingofuaʻi fēfē ʻe he meʻangāue ko ʻení hoʻo moʻuí?

• Ko e hā ha ngaahi meʻangāue kuo foaki mai ʻe he ʻOtuá ke tau fai ʻaki ʻEne ngāué?

Naʻe akoʻi ʻe ʻEletā Tēvita A. Petinā:

Ko e Tohi ʻa Molomoná ko ha fakamoʻoni ia ʻe taha ʻo Sīsū Kalaisi mo ha meʻangāue lelei ʻo e fakauluí ʻi he ngaahi ʻaho kimui ní. “ʻAki e Mālohi ʻo e ʻOtuá ʻi he Fuʻu Nāunau Lahi,” Liahona, Nōvema 2021, 29–30)

Naʻe fakamoʻoni ʻa ʻEletā ʻUlise Soālesi:

Ko e Tohi ʻa Molomoná ko e meʻangāue ia ʻa e ʻOtuá ki hono fakahoko ʻo e tānaki ʻo ʻIsileli ʻi hotau kuongá mo tokoni ki he kakaí ke nau ʻiloʻi Hono ʻAlo, ko Sīsū Kalaisí. (“Ko Hono ʻOmi ʻo e Tohi ʻa Molomoná,” Liahona, Mē 2020, 34)

Fili ha konga mei he vahe 5 ʻo e Malanga ʻAki ʻEku Ongoongoleleí (peesi 127–37) ke ako. ʻI hoʻomou lau iá, kumi ha ngaahi ʻuhinga lahi ange ʻoku hoko ai ʻa e Tohi ʻa Molomoná ko ha meʻangāue mahuʻinga pe founga ki hono vahevahe ʻo e ongoongolelei ʻa e Fakamoʻuí.

• Ko e hā ha ngaahi aʻusia kuó ke maʻu ʻi hono vahevahe ʻo e ngaahi moʻoni mei he Tohi ʻa Molomoná mo e niʻihi kehé?

• Kuó ke fakatokangaʻi nai hono tokoniʻi koe pe ha kakai kehe ʻe he ngaahi moʻoni ʻo e Tohi ʻa Molomoná ke ke ofi ange kia Sīsū Kalaisi?

1. Kumi ʻa e konga ʻoku ui ko e “ʻOku Fakamatalaʻi ʻe he Tohi ʻa Molomoná ʻa e Ngaahi Fehuʻi ʻo e Lotó” ʻi he vahe 5 ʻo e Malanga ʻAki ʻEku Ongoongoleleí (peesi 132–33).

2. Fili ha fehuʻi mei he konga ko iá ʻokú ke fie tokanga taha ki aí.

3. Lau ʻa e ngaahi potufolofola ʻoku nau fekauʻaki mo iá pea fakakaukau ki he founga ʻe ala tokoni ai ʻa e ngaahi potufolofola ko iá ki he fehuʻi naʻá ke filí.

4. Teuteu ke vahevahe ha taha ʻo e ngaahi veesi naʻá ke akó mo fakamatalaʻi ʻa e founga ʻokú ne tali ai ʻa e fehuʻí.

ʻOku ou fakaafeʻi kimoutolu, ʻi he ʻahó ni, ke foaki ha Tohi ʻa Molomona ki hoʻo ngaahi kaungāmeʻá mo e fāmilí, kaungāngāué, ki hoʻo faiako soká, pe tangata fakatau vesitapolo ʻi homou māketí. ʻOku nau fiemaʻu e ngaahi folofola ʻa e ʻEikí ʻoku maʻu ʻi he tohí ni. ʻOku nau fiemaʻu ha tali ki he ngaahi fehuʻi fakaʻahó mo e moʻui taʻengata ʻe hoko maí. ʻOku nau fiemaʻu ke ʻilo ki he hala ʻo e fuakavá kuo tuku mai maʻanautolú pea mo e ʻofa tuʻu maʻu ʻa e ʻEikí maʻanautolú. ʻOku maʻu kotoa ia ʻi heni ʻi he Tohi ʻa Molomoná. ʻOku ʻi heni kātoa ia ʻi he Tohi ʻa Molomoná.

ʻI he taimi ʻokú ke foaki ai kiate kinautolu ha Tohi ʻa Molomoná, ʻokú ke ʻoange ai hanau faingamālie ke nau ako mo ongoʻi e folofola ʻa e ʻOtuá. ʻOku ʻikai fiemaʻu ia ke ke toʻo holo ha ngaahi tatau ʻo e tohi kuo pākí. ʻE faingofua pē haʻo vahevahe ia mei hoʻo telefoni toʻotoʻó, mei he konga ʻo e ngaahi folofolá ʻi he polokalama Gospel Library. (“ʻI He ʻAho Ní,” Liahona, Nōvema 2022, 27)

Fakakaukauʻi ʻi he faʻa lotu pe ko hai ha taha te ke lava ʻo vahevahe mo ia e Tohi ʻa Molomoná. Fakapapauʻi ʻa e meʻa te ke lava ʻo akoʻi ange fekauʻaki mo e Tohi ʻa Molomoná mo ha meʻa pē te ke lava ʻo lea ʻaki. Lekooti hoʻo palaní.

Siʻoku kāinga, ʻoku mahuʻinga fēfē kiate koe ʻa e Tohi ʻa Molomoná? Kapau ʻe foaki atu kiate koe ha taiamoni, makakoloa pe Tohi ʻa Molomona, ko e fē meʻa te ke filí? Ko hono moʻoní, ko e fē ʻoku mahuʻinga ange kiate koé? (“Ko e Tohi ʻa Molomoná: Naʻe Mei Fēfē Nai Hoʻo Moʻuí Ka Ne ʻIkai Ia?,” Liahona, Nōvema 2017, 61).

• Ko e hā ʻokú ne ʻai ʻa e Tohi ʻa Molomoná ke mahuʻinga ange ʻi he ngaahi koloa totongi mamafá, hangē ko e taiamoní pe maka-koloá?

Lau ʻa e ongo konga ʻoku ui ko e “ʻOku Fakamoʻoniʻi ʻe he Tohi ʻa Molomoná ʻa Kalaisi” mo e “ʻOku Tokoni ʻa e Tohi ʻa Molomoná ke Tau Toe Ofi Ange ki he ʻOtuá” ʻi he vahe 5 ʻo e Malanga ʻAki ʻEku Ongoongoleleí (peesi 129, 131). Kumi mo fakaʻilongaʻi ha sētesi ʻe tolu pe lahi ange ʻoku nau fakamatalaʻi ʻa e ʻuhinga ʻoku mahuʻinga ai e Tohi ʻa Molomoná.

• Kuo tokoniʻi fēfē koe ʻe hono ako ʻo e Tohi ʻa Molomoná mo hono fakaʻaongaʻi hono ngaahi akonakí ke ke ofi ange ki he ʻOtuá?

• Ko e hā kuó ke ʻilo fekauʻaki mo Sīsū Kalaisi mei hoʻo ako ʻo e Tohi ʻa Molomoná?

• Kuo faitokonia fēfē hoʻo fakamoʻoni kia Sīsū Kalaisí ʻi hoʻo lau ʻa e Tohi ʻa Molomoná?

Kumi ha ngaahi potufolofola ʻi he Tohi ʻa Molomoná ʻoku fakamoʻoni kia Sīsū Kalaisi. Te ke lava ʻo maʻu ha ngaahi veesi mei he ngaahi vahe kuo lisi ʻi he puha “Ako Fakatāutahá pe Ako Fakahoá” ʻi he vahe 5 ʻo e Malanga ʻAki ʻEku Ongoongoleleí (peesi 133–34, ʻi he ʻuluʻi tohi “ʻOku Fakamoʻoniʻi ʻe he Tohi ʻa Molomoná ʻa Kalaisi”). Pe te ke kumi ha ngaahi veesi kehe, ‘iate koe pē.

Ko e potufolofola kotoa pē te ke maʻu, lekooti hoʻo tali ki he ongo fehuʻi ko ʻení:

• Ko e hā ‘oku akoʻi mai ʻe he potufolofola ko ʻení fekauʻaki mo Sīsū Kalaisi?

• ʻE lava fēfē ke faitokonia au mo e niʻihi kehé ʻe he ʻiloʻi ʻeni fekauʻaki mo Sīsū Kalaisí?

Fokotuʻu ha taumuʻa ʻoku fekauʻaki mo e meʻa kuó ke akó. Fakaʻaongaʻi ha ngaahi fakakaukau hangē ko ʻení, pe fakakaukau pē ʻaʻau.

• Ako e tohi ʻa Molomoná he ʻaho kotoa pē. Tokanga makehe ki he meʻa ʻokú ke ako fekauʻaki mo Sīsū Kalaisí.

• Vahevahe mo ha taha ʻi he mītia fakasōsialé pe ha taha ʻokú ke ʻiloʻi, ha veesi mei he Tohi ʻa Molomoná kuo mātuʻaki mahuʻinga kiate koe. Fakamatalaʻi ʻa e ʻuhinga naʻá ke fili ai ke vahevahe iá.

• Vakaiʻi ʻa e ngaahi kupu ʻo e polokalama ʻi he Tohi ʻa Molomoná (hangē ko ʻení, ongó, ngaahi lea fakafonuá, fetuʻutaki mo e kau faifekaú). Vahevahe ʻa e polokalama ʻo e Tohi ʻa Molomoná mo ha taha.

Tau pehē ʻokú ke pōtalanoa mo hao kaungāmeʻa ʻoku ʻikai ko ha mēmipa ʻo e Siasí ki hoʻo ngaahi tui fakalotú. Hili ʻene ʻilo ʻokú ke tui ki he Tohi ʻa Molomoná, ʻoku ʻeke atu leva ʻe hoʻo kaungāmeʻá, “Ko e hā ha toe ʻaonga ʻo e Tohi ʻa Molomoná he kuo tau ʻosi maʻu ʻa e Tohi Tapú?”

Lau ʻa e konga ʻi he vahe 5 ʻo e Malanga ʻAki ʻEku Ongoongoleleí ʻoku ui ko e “ʻOku Fepoupouaki ʻa e Tohi ʻa Molomoná mo e Tohi Tapú” (peesi 133–34). Kumi ha ngaahi akonaki ʻe lava ʻo tokoni ki he tokotaha kuo fai ki ai e fehuʻi ʻi he tūkungá.

• Ko e hā ʻoku ʻaonga ai ke ʻi ai ha kau fakamoʻoni tokolahi kia Sīsū Kalaisí?

• Kuo fakamālohia fēfē hoʻo tui kia Sīsū Kalaisí ʻe he ako fakataha ʻo e Tohi Tapú mo e Tohi ʻa Molomoná?

Kumi ha ngaahi sīpinga ʻi he folofolá ʻoku nau fakahaaʻi ʻa e founga ʻoku fepoupouaki ai ʻa e Tohi Tapú mo e Tohi ʻa Molomoná. Fili ha meʻa ʻe taha pe toe lahi ange mei he ngaahi meʻa ko ʻení ke tokoni atu ke ke fai ʻeni:

1. Ako ʻa e ngaahi sīpinga ʻoku lisi atu ʻi he puha “Ako Fakatāutahá pe Ako Fakahoá” ʻi he ngataʻanga ʻo e “ʻOku Fepoupouaki ʻa e Tohi ʻa Molomoná mo e Tohi Tapú” ʻi he vahe 5 ʻo e Malanga ʻAki ʻEku Ongoongoleleí (peesi 134).

2. Fakaʻaongaʻi ʻa e Fakahinohino ki he Ngaahi Folofolá ke kumi ha tefito ʻokú ke saiʻia ai. Kumi ha ngaahi potufolofola mei he Tohi Tapú mo e Tohi ʻa Molomoná kuo lisi ki he tefito ko iá.

3. Kumi ha niʻihi ʻo e ngaahi veesi ʻokú ke saiʻia taha ai ʻi he Tohi ʻa Molomoná. Vakaiʻi ʻa e ngaahi futinoutí ke ʻiloʻi pe ʻoku ʻi ai ha ngaahi veesi kuo hiki atu ʻi he Tohi Tapú ʻoku nau tokoniʻi hoʻo mahino ki he ngaahi veesi ko ʻení.

Fokotuʻu ha taumuʻa ʻoku fekauʻaki mo e meʻa kuó ke akó. Fakaʻaongaʻi ha ngaahi fakakaukau hangē ko ʻení, pe fakakaukau pē ʻaʻau.

• ʻI hoʻo ako ʻa e Tohi ʻa Molomoná, vakaiʻi ʻa e futinoutí pea kumi ʻa e ngaahi fakamoʻoni fakafolofola ki he ngaahi potufolofola ʻi he Tohi Tapú ʻoku fekauʻaki mo e meʻa ʻoku mou akó.

• Ako ha taha ʻo e ngaahi Kosipeli ʻe fā ʻi he Fuakava Foʻoú (Mātiu, Maʻake, Luke, pe Sione). ʻI hoʻomou laú, tokanga ki he meʻa ʻoku mou ako mo ongoʻi fekauʻaki mo Sīsū Kalaisí. Vakaiʻi ʻa e ngaahi futinoutí pea kumi ʻa e ngaahi fakamoʻoni folofola ki he Tohi ʻa Molomoná ʻoku fekauʻaki mo e meʻa ʻoku mou akó.