Fekumi mo Falala ki he Laumālié

Kuo pau ke malanga ʻaki ʻa e Ongoongoleleí ʻe he tokotaha kotoa pē ʻi he mālohi ʻo e Laumālie Māʻoniʻoní; pea he ʻikai ke lava ʻe ha taha ʻo malanga ʻaki ʻa e Ongoongoleleí taʻe kau ai ʻa e Laumālie Māʻoniʻoní. (Ngaahi Akonaki ʻa e Kau Palesiteni ʻo e Siasí: Siosefa Sāmita [2007], 383)

• ʻOkú ke pehē ko e hā ʻoku fakahoko ai ʻe he Laumālie Māʻoniʻoní ha fatongia mahuʻinga pehē ʻi hono malanga ʻaki e ongoongolelei ʻo Sīsū Kalaisí?

1. Ako ʻa e ngaahi palakalafi ʻi lalo ʻi he ongo ʻuluʻi tohi “Fekumi ki he Fakahinohino ʻa e Laumālie Māʻoniʻoní” mo e “Ko e Mālohi ʻo e Laumālié ʻi he Uluí” (Malanga ʻAki ʻEku Ongoongoleleí, 113; 115–16).

2. Ako ha potufolofola ʻe ua pe lahi ange ʻoku hiki atu ʻi he puha “Ako Folofolá” ʻi lalo he ʻuluʻi tohi “Ko e Mālohi ʻo e Laumālié ʻi he Uluí” (Malanga ʻAki ʻEku Ongoongoleleí, 116).

3. Fakatatau ki he meʻa ʻoku mou akó, teuteu ke vahevahe hoʻomou ngaahi tali ki he ngaahi fehuʻi ko ʻení:

   • ʻE tokoniʻi fēfē au ʻe he Laumālie Māʻoniʻoní ke u malanga ʻaki e ongoongolelei ʻa e Fakamoʻuí?

   • Ko e hā ʻa e fatongia ʻoku fakahoko ʻe he Laumālie Māʻoniʻoní ke tokoni ke haʻu ʻa e kakaí kia Kalaisí?

   • Ko e hā te u lava ʻo fai ke fakaafeʻi ʻa e Laumālié ʻi heʻeku vahevahe ʻa e ongoongolelei ʻo Sīsū Kalaisí?

1. Vahevahe hoʻo tali ki he ngaahi fehuʻi ʻe tolu mei he ʻekitivitī ako kimuʻá:

   1. ʻE tokoniʻi fēfē au ʻe he Laumālie Māʻoniʻoní ke u malanga ʻaki e ongoongolelei ʻa e Fakamoʻuí?

   2. Ko e hā ʻa e fatongia ʻoku fakahoko ʻe he Laumālie Māʻoniʻoní ke tokoni ke haʻu ʻa e kakaí kia Kalaisí?

   3. Ko e hā te u lava ʻo fai ke fakaafeʻi ʻa e Laumālié ʻi heʻeku vahevahe ʻa e ongoongolelei ʻo Sīsū Kalaisí?

2. Vahevahe ha potufolofola naʻá ke maʻu. Fakamatalaʻi e founga ʻoku fekauʻaki ai e potufolofola ko iá mo ha taha ʻo e ngaahi fehuʻi ʻe tolu naʻe aleaʻi kimuʻá.

3. Vahevahe ha aʻusia fakafoʻituitui pe ko hoʻo fakamoʻoni fekauʻaki mo e founga ʻe lava ke tokoniʻi ai koe ʻe he Laumālie Māʻoniʻoní.

Fokotuʻu ha taumuʻa ʻoku fekauʻaki mo e meʻa kuó ke akó. Fakaʻaongaʻi ha ngaahi fakakaukau hangē ko ʻení, pe fakakaukau pē ʻaʻau.

• Fakaʻaongaʻi ʻa e ngaahi meʻangāue ki he akó hangē ko e Fakahinohino ki he Ngaahi Folofolá, ako lahi ange ki he ngaahi fatongia kehekehe ʻo e Laumālie Māʻoniʻoní. Fakakaukau ki he founga ʻe lava ke tokoniʻi ai koe ʻe he Laumālie Māʻoniʻoní ʻi he taimí ni mo hoʻo hoko ko ha faifekaú.

• Fakapapauʻi pe ko e hā ha ngaahi liliu te ke lava ʻo toutou fakahoko lahi ange, te ne fakaafeʻi ʻa e Laumālie Māʻoniʻoní ki hoʻo moʻuí.

Tau pehē ʻoku fehuʻi atu ʻe ha taha kiate koe ʻa e founga ke tala ai e faikehekehe ʻo e ngaahi ueʻi mei he Laumālie Māʻoniʻoní mo hoʻo ngaahi fakakaukau mo e ngaahi ongo pē ʻaʻaú.

• Te ke tali fēfeeʻi ia?

Fili ha taha ʻo e ngaahi founga ako ko ʻení mei he vahe 4 ʻo e Malanga ʻAki ʻEku Ongoongoleleí ke fakaloloto hoʻo mahino fekauʻaki mo hono ʻiloʻi ʻo e Laumālie Māʻoniʻoní:

1. Ako ʻa e “Ako ke Fakatokangaʻi ʻa e Ngaahi Ueʻi ʻa e Laumālié” (Malanga ʻAki ʻEku Ongoongoleleí, 118–19).

2. Lau ʻa e ngaahi fakamatala ʻo e Laumālie Māʻoniʻoní ʻi he puha “Ako Fakafoʻituituí” (Malanga ʻAki ʻEku Ongoongoleleí, 119). Ako ha niʻihi ʻo e ngaahi potufolofola kuo hiki atu ʻoku ngali mātuʻaki mahuʻinga kiate koé.

• Ko e hā ha ʻilo naʻá ke maʻu fekauʻaki mo e founga ʻoku fetuʻutaki ai ʻa e ʻOtuá mo kitautolu ʻo fakafou ʻi he Laumālie Māʻoniʻoní?

• Ko e hā ha ngaahi sīpinga ʻokú ke ongoʻi ʻokú ne fakamatalaʻi hoʻo aʻusia fakafoʻituitui mo e Laumālie Māʻoniʻoní?

1. Ko ha taha ʻoku fekumi ki ha fakahinohino mo ha tataki ki ha faʻahinga meʻa ʻoku mahuʻinga kiate ia. ʻOkú ne lotu mo kole ki he Tamai Hēvaní ke ʻomai ha tali ʻi he fakaʻosinga ʻo e uiké.

2. ʻOkú ke fakatokangaʻi ko e taimi ʻokú ne ongoʻi ai ʻa e Laumālié, ʻoku fakaʻau ke nau maʻu ha ngaahi ongo fakaeloto lahi ange ʻiate koe. ʻOkú ke fifili leva pe ʻoku ʻi ai ha meʻa ʻoku fehalaaki ʻiate koe.

3. ʻOku ongoʻi ʻe ha taha ʻo hangē kuó ne maʻu ha fakahinohino mei he Laumāllié ke fakahoko ha faʻahinga meʻa ʻoku fehangahangai mo e ngaahi akonaki ʻa e kau palōfitá mo e kau ʻaposetoló.

4. Kuo teiti fakamātoato ha talavou mo ha finemui. ʻI ha ʻaho ʻe taha naʻe pehē ange ai ʻe he talavoú ki he finemuí, “Kuó u maʻu ha ueʻi fakalaumālie ʻoku totonu ke ke mali mo au.”

5. Kuo tali ha taha ki ha ʻunivēsiti kehekehe ʻe ua. Neongo ʻa e ʻaukaí mo e lotú, ka ʻoku ʻikai ke ne ongoʻi ʻoku fakahā ange ʻe he ʻEikí ʻa e ʻapiako ke ne hū ki aí.

Fokotuʻu ha taumuʻa ʻoku fekauʻaki mo e meʻa kuó ke akó. Fakaʻaongaʻi ha ngaahi fakakaukau hangē ko ʻení, pe fakakaukau pē ʻaʻau.

• ʻI he ngaahi ʻaho siʻi ka hokó, tokanga ʻaupito ki he ngaahi founga kehekehe ʻokú ke ongoʻi ai hono tataki koe ʻe he Laumālie Māʻoniʻoní pe ko e founga ʻokú ke aʻusia ai ʻa e ngaahi fua ʻo e Laumālié (vakai, Kalētia 5:22–23). Lekooti hoʻo ngaahi aʻusiá.

• Ako takitaha ʻa e ngaahi potufolofola kuo hiki atu ʻi he puha “Ako Fakafoʻituituí” ʻi he peesi 119 ʻo e Malanga ʻAki ʻEku Ongoongoleleí. Lekooti ha ngaahi ʻilo ʻokú ke maʻu fekauʻaki mo e founga ke ongoʻi mo fakatokangaʻi ai ʻa e Laumālié.

ʻE hoku kāinga ʻofeina, ʻoku ou kole atu kiate kimoutolu ke fakatupulaki hoʻomou malava fakalaumālie ke maʻu ʻa e fakahaá. … Fili ke ke fai ʻa e ngāue fakalaumālie ʻoku fiemaʻu ke ke maʻu ai ʻa e meʻafoaki ʻo e Laumālie Māʻoniʻoní mo toutou fanongo mo mahino ange ai kiate koe e leʻo ʻo e Laumālié. (“Fakahā maʻá e Siasí, Fakahā ki Heʻetau Moʻuí,” Liahona, Mē 2018, 96)

• ʻOkú ke pehē ko e hā ʻoku mahuʻinga ai ke maʻu maʻu pē ha fakahinohino mo ha fakahā mei he Laumālie Māʻoniʻoní?

Lau ʻa e konga ʻoku ui ko e “Falala ki he Laumālié” ʻi he Malanga ʻAki ʻEku Ongoongoleleí (peesi 121). Kumi ha ngaahi ʻuhinga ʻoku mahuʻinga ai ke maʻu e feohi o e Laumālié ʻi hoʻo fakahoko e ngāue ʻa e ʻEikí.

• Ko e hā naʻá ke ako fekauʻaki mo e ʻuhinga ʻoku mahuʻinga ai ke falala ki he Laumālie Māʻoniʻoní?

• Ko e hā ʻe lava ke ne fakafeʻātungiaʻi ʻa e hala ʻo e falala kakato ki he Laumālié?

• Ko e hā ha meʻa kuó ne tokoniʻi koe ke ke ongoʻi ʻa e mālohi ʻo e Laumālié ʻi hoʻo moʻuí?

Tau pehē ko ha faifekau koe pea kuo kole atu ke ke fai ha lea ʻi hoʻomou fakataha fakavahe ka hokó ʻi he tefito ko e “ʻE Founga Fēfē Haʻatau Lava ʻo Falala Lahi Ange ki he Laumālie Māʻoniʻoní?” Fakaʻaongaʻi ʻa e kiʻi puha “Ako Folofola” ʻi he ngataʻanga ʻo e konga “Falala ki he Laumālié” he (Malanga ʻAki ʻEku Ongoongoleleí, 121), teuteu ha lea miniti ʻe ua ki he tolu te ne veteki ʻa e fehuʻi ko ʻení. Lekooti ʻa e ngaahi tefitoʻi moʻoni mo e ngaahi ʻilo ʻokú ke fie vahevahe ʻi hoʻo leá.

Fokotuʻu ha taumuʻa ʻoku fekauʻaki mo e meʻa kuó ke akó. Fakaʻaongaʻi ha ngaahi fakakaukau hangē ko ʻení, pe fakakaukau pē ʻaʻau.

• Ako maʻuloto ha potufolofola fekauʻaki mo e Laumālie Māʻoniʻoní, hangē ko ha taha ʻo e ngaahi potufolofola ko ʻení: 1 Nīfai 4:6; 2 Nīfai 32:5; Molonai 10:5; pe Tokāteline mo e Ngaahi Fuakava 8:2.

• ʻAi ke ʻiloʻi ʻa e meʻa te ke lava ʻo kamata ke fakahokó pea mo ia te ke lava ʻo taʻofi hono fakahokó ke tokoni ke lahi ange hoʻo takaua mo e Laumālie Māʻoniʻoní.