Fakahinohino ki hono Akoʻi ʻo e Teuteu Ngāue Fakafaifekaú

ʻOku fakataumuʻa ʻa e meʻa kotoa pē ʻi he kalasi ko ʻení ke tokoni ki he kau akó ke fakamālohia ʻenau ului kia Sīsū Kalaisi mo ʻEne ongoongolelei kuo fakafoki maí. ʻOku haʻu fakataha ʻa e uluí mo ha ongoʻi holi lahi ange pea mo ha ivi ke vahevahe ʻa e ongoongolelei ʻo Sīsū Kalaisí mo e niʻihi kehé. Ke fakatupu ha ngaahi tūkunga pea mo ohi mai ʻa e uluí, ʻe fakaafeʻi ʻa e kau mēmipa ʻo e kalasí ke nau:

• Fakafemoʻuekinaʻi kinautolu ʻi he Malanga ʻAki ʻEku Ongoongoleleí koeʻuhí ke nau lava ʻo aʻusia ʻa e mālohi mo e mahuʻinga ʻo e tohi lēsoni ko ʻení. ʻE fakafeʻiloaki foki kinautolu ki he Ko e Fakaangaanga ki he Moʻui Fakafaifekaú (2013).

• Ako ʻa e taumuʻa ʻo e ngāue fakafaifekaú (vakai, Malanga ʻAki ʻEku Ongoongoleleí, 1) pea vakai ki he founga te ne lava ai ʻo tataki kinautolú, ʻi heʻenau moʻui ʻi he ʻahó ni pea ʻi he ngaahi tapa kotoa ʻo e ngāue fakafaifekaú.

• Fai ha ngaahi tukupā te ne tokoniʻi kinautolu ke nau moʻui ʻaki ʻa e ongoongolelei ʻo Sīsū Kalaisí, teuteu ki he ngāue fakafaifekaú, pea vahevahe ʻa e ongoongolelei ʻa e Fakamoʻuí mo honau fāmilí mo e ngaahi kaungāmeʻá.

• Ako pea mo akoako akoʻi ʻa e ngaahi moʻoni ʻoku maʻu ʻi he vahe 3 ʻo e Malanga ʻAki ʻEku Ongoongoleleí.

• Ako fakahoko ʻa e ngaahi taukei ko ē ʻe lava ʻo tokoni ke nau hoko ai ko ha kau faiako lelei ange ʻo e ongoongoleleí pea mo loto-vilitakí.

ʻOku kau ʻi he tohi lēsoni ko ʻení ha faʻahinga aʻusia fakaako ʻe ua: ngaahi tefitoʻi lēsoní mo e ngaahi ako fakataukeí.

ʻOku kau ʻi he kalasi ko ʻení ha ngaahi ako fakataukei ʻe 10 ʻoku ʻi he ngataʻanga ʻo e tohi lēsoní. ʻOku fakataumuʻa ʻa e ngaahi ako fakataukeí ke tokoni ʻi hono fakatupulaki ʻo e ngaahi potoʻi fakafaiako leleí mo e loto-vilitakí.

Ko ha lisi ʻeni ʻo e ngaahi ako fakataukeí:

• Ako Fakataukei 1: Fakafeʻiloaki e Tohi ʻa Molomoná ki he Kakaí

• Ako Fakataukei Hono 2: Fakaʻaongaʻi ʻa e Folofolá ʻi Hoʻo Faiakó

• Ako Fakataukei Hono 3: Akoʻi e Kakaí ʻi he Founga ʻo e Lotú

• Ako Fakataukei Hono 4: Fai ha Ngaahi Fehuʻi ʻOku Ueʻi Fakalaumālié

• Ako Fakataukei Hono 5: Feinga ke Ako Maʻuloto ʻa e Folofolá

• Ako Fakataukei Hono 6: Talanoa mo e Tokotaha Kotoa

• Ako Fakataukei Hono 7: Meʻa ke Fai ʻi he Ongoʻi Taʻefeʻungá

• Ako Fakataukei Hono 8: Mānava ʻIloʻilo Pau

• Ako Fakataukei Hono 9: Fakaʻaongaʻi ʻa e Tekinolosiá ʻi he Māʻoniʻoni

• Ako Fakataukei Hono 10: Fakatupulaki ha Ngaahi Sīpinga Fakakaukau Lelei

ʻE lava ke akoʻi ʻa e ngaahi ako taukeí ʻi he lolotonga ʻo e taimi kalasi tatau, ko ha tefitoʻi lēsoni. ʻOku ʻi ai ha ngaahi tefitoʻi lēsoni ʻe niʻihi ʻoku nau ʻomai ha ngaahi fokotuʻu ki he ngaahi ako taukei ʻoku fekauʻaki mo iá.

ʻOku fakataumuʻa ʻa e ngaahi ako fakataukeí ke miniti pē ʻe 15 ki he 20, ka te ke lava ʻo liliu kinautolu ke lōloa ange pe nounou ange. ʻOku ʻikai fiemaʻu ia ke ke akoʻi ʻa e foʻi taukei kotoa, pea te ke lava ʻo akoʻi kinautolu ʻi ha faʻahinga fakahokohoko pē. Neongo ʻoku mahuʻinga ʻa e ngaahi ako fakataukeí, ka ko e konga lahi taha ho taimi faiako ʻi he kalasí ʻoku totonu ke fakaʻaongaʻi ia ʻi he ngaahi tefitoʻi lēsoní.

Neongo ko e tokolahi ʻo e kau ako ʻoku ʻi he kalasi ko ʻení te nau teuteu ki ha misiona akoʻi, ka ʻe ala ʻi ai ha niʻihi ʻoku nau teuteu ki ha misiona ngāue tokoni. ʻE ala ʻi ai ha niʻihi ʻoku ʻikai haʻanau palani ke ngāue fakafaifekau taimi kakato, ka ʻoku nau holi ke ʻilo ʻa e founga ke vahevahe lahi ange ai ʻa e ongoongoleleí mo tokoni ke tānaki ʻa ʻIsileli. ʻAi ke ke ongoʻingofua e ngaahi fiemaʻu ʻa kinautolu kotoa ʻoku kaú, kae ʻikai ko kinautolu pē ʻoku teuteu ki ha misiona akoʻí. Kumi ha ngaahi faingamālie ke tokoniʻi ai e kau akó kātoa ke nau fakatokangaʻi ʻa e ngaahi tāpuaki mo e ngaahi lelei ʻo e kalasi ko ʻení. Hangē ko ʻení, te ke ala tuku ha taimi ʻi he lolotonga ʻo e kalasí ke toe fakamanatu ai ʻa e ngaahi faingamālie mo e ngaahi tāpuaki ʻo e misiona ngāue tokoní (vakai, ChurchofJesusChrist.org/service-missionary ke maʻu ha fakamatala lahi ange).

Ko e fakamatala fekauʻaki mo e founga ke maʻu ai ha maaka ke ʻosi mei he ʻinisititiutí pe ha maaka ʻe lava ke ʻave ki he ngaahi akoʻanga ʻa e Siasí, vakai, InstituteCredit.ChurchofJesusChrist.org.

Ko e kalasí ni ʻoku faingofua pē ke feliliuaki. ʻE lava ke fakaʻaongaʻi ia ʻe he ngaahi koló, uōtí, siteikí, mo e ʻinisititiutí. ʻE lava ke fakaʻaongaʻi ia ʻe ha kalasi ʻoku lau uike pē hono lōloá pe ʻi ha kalasi ʻe lau māhina. ʻE lava foki ke liliu ke fakaʻaongaʻi ia ʻi ʻapi.

ʻOku fakahaaʻi ʻe he tēpile ko ʻení ʻa e founga ʻe lava ke fokotuʻutuʻu ai ha kalasi miniti ʻe 50:

Ko e ngaahi kalasi ko ia ʻoku lele ʻi ha ngaahi māhiná te nau lava ke fakaʻaongaʻi ha kalasi ʻe taha pe lahi ange ʻi ha foʻi lēsoni.

ʻOku fakatātaaʻi ʻe he ngaahi sīpinga ko ʻení ha ngaahi founga kehekehe ke akoʻi ai ʻa e kakano ʻo e kalasi ko ʻení.

Sīpinga 1: Kalasi Fakasiteikí (kalasi ʻe 20; miniti ʻe 60 ki he kalasi)

ʻOku teuteu ʻa Misa Lauala ke akoʻi ha kalasi teuteu ngāue fakafaifekau maʻa hono siteikí ʻi ʻAkalā, ʻi Kana. ʻE fakataha fakauike ʻene kalasí. ʻOku faʻu ʻe Misa Lauala ʻa e palani ko ʻení:

• Akoʻi ha tefitoʻi lēsoni ʻi he Sāpate ʻuluaki mo e Sāpate tolu ʻo e māhiná.

• Koeʻuhí ʻoku ʻi he kalasí ha kau mēmipa foʻou tokolahi pea ko ha niʻihi ʻoku ʻikai ko ha kau mēmipa ʻo e Siasí, ʻoku fakakaukau ai ʻa Misa Lauala ke ne fakamamafaʻi makehe ʻa e tefitoʻi lēsoni fika 6. ʻOkú ne fakakaukau ke fai ha ʻekitivitī ako mei he tefitoʻi lēsoni fika 6 ʻi he Sāpate ua mo e fā ʻo e māhina takitaha. ʻE maʻu heni ʻe heʻene kalasí ha ngaahi faingamālie lahi ke ako mo akoʻi ʻa e tokāteline mahuʻinga mei he vahe 3 ʻo e Malanga ʻAki ʻEku Ongoongoleleí.

• ʻOkú ne fakahā foki ha ngaahi ako fakataukei ʻe fā ʻokú ne fie-fakaʻaongaʻi ʻi heʻene kalasí. ʻOkú ne fakapapauʻi ke ne fakahoko fakahili uike ha ako fakataukei. ʻOku ʻi ai ha taukei ʻe taha ʻoku fuʻu mahuʻinga ki heʻene kalasí ʻo ne fakakaukau ai ke ne fakaʻaongaʻi ia ʻi ha kalasi kehekehe ʻe ua.

Sīpinga 2: Kalasi Fakasiteikí (sēsini ʻe 7; miniti ʻe 60 ki he kalasi)

ʻOku teuteu ʻa Misa mo Mīsisi Kulini ke na akoʻi ʻa e teuteu ngāue fakafaifekau ki honau siteikí ʻi Polovo, ʻi ʻIutā. ʻE fakataha fakahili-uike ʻena kalasí.

• Hili haʻana talanoa mo ʻena palesiteni fakasiteikí, naʻá na fakakaukau ke akoʻi ʻa e ngaahi tefitoʻi lēsoni 1, 3, 6, 9, mo e 12. Te na fakaʻaongaʻi ha kalasi ʻe tolu ke nofotaha ʻi he tefitoʻi lēsoni fika 6. ʻI hono fai iá ʻe maʻu ʻe he kalasí ha ngaahi faingamālie ke ako ai, mahino, pea mo akoako akoʻi ʻa e ngaahi moʻoni mahuʻinga mei he vahe 3 ʻo e Malanga ʻAki ʻEku Ongoongoleleí.

• Makatuʻunga ʻi he faleʻi mei heʻena palesiteni fakasiteikí, ʻe toe maʻu ai ʻe he fāmili Kuliní ha taimi he lolotonga ʻo e kalasí ki he ngaahi ako fakataukei ʻo e “Fakatupulaki ha Ngaahi Sīpinga Fakakaukau ʻOku Leleí” mo e “Talanoa mo e Tokotaha Kotoa.”

Sīpinga 3: Kalasi ʻInisititiutí (sēsini ʻe 14; miniti ʻe 90 ki he kalasi)

ʻOku teuteu ʻa Mīsisi Siliva ke ne akoʻi ha kalasi teuteu ngāue fakafaifekau ʻi heʻene ʻinisititiutí ʻi Mānosi ʻi Palāsilá. ʻE fakataha fakauike ʻene kalasí ʻi ha miniti ʻe 90. ʻOku fakakaukau ʻa Mīsisi Siliva ke ne fai ʻa e ngaahi meʻa ko ʻení:

• Te ne fakaʻaongaʻi ha miniti ʻe 50 ʻi he ʻuluaki uike ʻe 11, ʻi ha ngaahi tefitoʻi lēsoni kehekehe. ʻI heʻene ʻiloʻi ʻoku ʻi ai ha niʻihi ʻo e kau mēmipa ʻo ʻene kalasí ʻoku ʻi ai haʻanau ngaahi fehuʻi fekauʻaki mo e Laumālie Māʻoniʻoní, ʻokú ne pehē leva ke fakaʻaongaʻi ha kalasi ʻe ua pe lahi ange ʻi he tefitoʻi lēsoni fika 8: “Fekumi mo Falala ki he Laumālié.”

• ʻOku fie tokoni ʻa Mīsisi Siliva ki he kau mēmipa ʻo ʻene kalasí ke fakatupulaki ʻenau loto-falala ke vahevahe ʻa e ongoongoleleí mo e niʻihi kehé. ʻOkú ne fakapapauʻi ko e lolotonga ʻo e ʻuluaki uike ʻe 11, ko ha kalasi ai ʻe ono ʻe fakakau ai ha taki miniti ʻe 30 ke fakaʻaongaʻi ʻa e tefitoʻi lēsoni fika 6 ke tokoni ke ako pea mo akoʻi ʻe he kau mēmipa ʻo e kalasí ʻa e tokāteline ʻi he vahe 3 ʻo e Malanga ʻAki ʻEku Ongoongoleleí. ʻOkú ne toe fakakaukau foki ʻe tukutaha ʻa e kalasí kakato ʻi he uike 12 mo e 13, ke teuteu mo nau feakoʻiʻaki ha ngaahi lēsoni nounou.

• Kuo ʻilo ʻe Mīsisi Siliva ha ngaahi taukei ʻe tāpuekina ai ʻa e kau mēmipa ʻo ʻene kalasí, ke nau ako fakahoko. ʻOkú ne fakakaukau ke fakahoko ʻa e ngaahi ako fakataukei ko iá ʻi he lolotonga ʻo e ʻuluaki uike ʻe 11, ʻi he ngaahi ʻaho ʻoku ʻikai fakataimi-tēpileʻi ai ke nau faiako mei he vahe 3.

• ʻI he ʻaho fakaʻosí, ʻoku palani ai ke fakaʻosi ʻenau kalasí ʻaki ʻa e tefitoʻi lēsoni 13: “Laka Ki Muʻa ʻi he Tui.”

Faʻu ha palani ʻoku fakapatonu ki hoʻo kalasí. ʻI hoʻo palani ko ia hoʻo taimi-tēpilé, te ke ala fiemaʻu ha tokoni mei he kau mēmipa hoʻo kalasí pe ko e fē ʻa e tefito te nau mahuʻingaʻia taha ai mo fekauʻaki mo kinautolú.

Manatuʻi, ko e taumuʻa mahuʻinga tahá ke ului kia Sīsū Kalaisi, kae ʻikai ko e ʻosi kakato ʻo e lēsoní. ʻOua naʻa fuʻu tōtuʻa hoʻo meʻa ʻoku fakataimi-tēpileʻi ki hoʻo ngaahi kalasí. Ko e tupulaki fakalaumālié he ʻikai ke lava ia ʻo fakavaveʻi pe fakamālohiʻi. Fiemālie ʻi he meʻa te ke lava ʻo fakahokó, ʻi ha founga mahuʻingamālie, pea ʻi he taimi ʻokú ke maʻú.