Ako Fakataukei Hono 6
Talanoa mo e Tokotaha Kotoa
ʻI he taimi ʻoku talanoa ai ʻa e kakai kei talavoú mo e kakai ʻoku ʻikai ke nau ʻiló, ʻoku angamaheni ke nau ongoʻi taʻefiemālie pe manavasiʻi. ʻE lava ke tokoni ʻa e ʻekitivitī ko ʻení ki he kau mēmipa ʻo e kalasí ke nau akoako fakahoko ha fepōtalanoaʻaki mo e kakai ne nau toki fetaulakí.
Taki fealēleaʻakí: Feinga ke fakamatala nounou ʻa e konga “Fakaʻuhingaʻí” mo e “Fakatātaaʻí” koeʻuhí ke maʻu ʻe he kau akó ha taimi lahi ke akoako.
Fakaʻuhingaʻí
Taki fealēleaʻakí: Fakamatalaʻi ange ʻoku kau ʻi he konga ʻo e ngāue fakafaifekaú ʻa e talanoa mo e kakai ʻoku ʻikai ke ke ʻilo ʻi he ʻaho kotoa pē.
-
Ko e hā ha aʻusia kimuí ni naʻá ke maʻu ʻi hoʻo fuofua talanoa mo ha taha? Naʻe fēfē ia?
Taki fealēleaʻakí: Kimuʻa pea fakafeʻiloaki ʻa e ngaahi fakahinohino pau ʻe fakatefito ai ʻa e ako fakataukei ko ʻení, fakakaukau ke lau fakataha ʻa e “Talanoa mo e Tokotaha Kotoa” (Malanga ʻAki ʻEku Ongoongoleleí [2023], 187–88). Te ke lava ʻo fakaafeʻi e kau akó ke nau aleaʻi e ngaahi fokotuʻu ne nau maʻu ʻoku ʻaonga tahá.
Fakamatalaʻi ange ʻe nofotaha ʻa e ako fakataukei ko ʻení ʻi ha ngaahi fakahinohino ʻe tolu ʻoku fakamatalaʻi fakanounou mei he Malanga ʻAki ʻEku Ongoongoleleí (vakai, peesi 187–88) mo e Ko e Fakaangaanga ki he Moʻui Fakafaifekaú (vakai, peesi 35–36). Fakaʻaliʻali e ngaahi fakahinohino ko ʻení pea fakaafeʻi ha niʻihi ʻo e kau mēmipa ʻo e kalasí ke nau taufetongi ʻi hono lau leʻolahi iá
-
Kumi ha founga faingofua ke kamataʻi ha fepōtalanoaʻaki. ʻAi ke ke angaʻofa, falalaʻia, mo anga fakakaumeʻa. ʻAhiʻahi lea fakafeʻiloaki, fai ha lea fakamāfana, fai ha tokoni ʻi ha faʻahinga meʻa, pe ʻeke ha fehuʻi (vakai ki he poini hokó ki ha ngaahi sīpinga).
-
ʻEke ha ngaahi fehuʻi. Fakakaukau ke fehuʻi ki he kakaí ha ngaahi meʻa ʻoku nau mālieʻia pe mahuʻingaʻia ai. ʻE lava ke kau heni ʻenau ngāué, ngaahi meʻa ʻoku nau saiʻia aí, ngaahi meʻa ʻoku fakamānako kiate kinautolú, fāmilí, pe feituʻu ʻoku nau lotu pe ako aí. Loto-fiemālie foki ke tali ʻenau ngaahi fehuʻi kau kiate koé.
-
Fakafanongo fakamātoato. Tokanga taha ki he meʻa ʻoku lea ʻaki ʻe he tokotaha ʻe tahá ʻo lahi ange ia ʻi he meʻa hoko te ke lea ʻakí. Feinga ke fesiofaki mata ki he mata lolotonga e fepōtalanoaʻakí. Fakahaaʻi ʻokú ke mahuʻingaʻia ʻi he tokotaha ʻokú ke talanoa ki aí mo e meʻa ʻoku nau lea ʻakí. Te ke lava ʻo ʻeke ange ha ngaahi fehuʻi lahi ange ke ke ako lahi ange.
Fakatātaaʻi
Taki fealēleaʻakí: Fakatātaaʻi e ngaahi taukei ko ʻení maʻá e kalasí ʻaki hano fakaafeʻi ha tokotaha ʻoku loto-fiemālie ke haʻu ki muʻa. Fai ha fepōtalanoaʻaki ʻaki haʻo muimui ki he ngaahi fakahinohino ʻoku hiki atu ʻi he konga kimuʻá. ʻI he ʻosi iá, fakaafeʻi e kalasí ke vahevahe e founga ne nau vakai ai ki he muimui ki he ngaahi fakahinohinó.
Ko e founga ʻe taha te ke lava ai ʻo fakatātaaʻi ʻa e taukei ko ʻení ko hono huluʻi ʻa e vitiō “Talking with Everyone” (ChurchofJesusChrist.org; mamata mei he taimi 4:00 ki he 6:08).
Ako Fakahoko
Taki fealēleaʻakí: Vahe ki he tokotaha takitaha ʻoku kau maí ha hoa ngāue. Hili ia pea vahevahe ʻa e ngaahi fakahinohino ko ʻení. Kapau ʻoku toe lahi e taimí, ʻoange ha faingamālie ki he kau akó ke nau toutou fakahoko ʻeni mo ha niʻihi kehe ʻi he kalasí.
Taufetongi mo ho hoá ʻi hono kamataʻi ha fepōtalanoaʻaki ʻaki hano fakaʻaongaʻi e ngaahi fakahinohino ʻe tolu kuo tau aleaʻí:
-
Kumi ha founga faingofua ke kamataʻi ha fepōtalanoaʻaki.
-
ʻEke ha ngaahi fehuʻi.
-
Fakafanongo fakamātoato.
Fakaʻaongaʻí
Taki fealēleaʻakí: Vahevahe ʻa e fakaafe ko ʻení. Te ke lava ʻo fakakaukau ke muimuiʻi ʻa e fakaafe ko ʻení ʻi ha kalasi ʻi he kahaʻú.
Kumi ha ngaahi faingamālie ʻi he uike ka hokó ke kamataʻi ha fepōtalanoaʻaki mo ha taha kuo teʻeki ai ke ke fetaulaki mo ia pe ʻikai ke ke ʻiloʻi lelei. Akoako fakaʻaongaʻi e ngaahi taukei kuó ke ako he ʻaho ní lolotonga hoʻomo fepōtalanoaʻakí.