Ako Fakataukei Hono 3
Akoʻi e Kakaí ʻi he Founga ʻo e Lotú
Ko e tokolahi ʻo e kakai ʻoku akoʻi ʻe he kau faifekaú ʻoku siʻisiʻi haʻanau aʻusia fekauʻaki mo e lotú. “Ko hono fakaafeʻi ko ia ʻo e kakaí ke lotú ko e taha ia ʻo e ngaahi fakaafe mahuʻinga taha te ke lava ʻo fakahoko ʻi hoʻo hoko ko ha faifekaú” (Malanga ʻAki ʻEku Ongoongoleleí [2023], 51).
Taki fealēleaʻakí: Feinga ke fakamatala nounou ʻa e konga “Fakaʻuhingaʻí” mo e “Fakatātaaʻí” koeʻuhí ke maʻu ʻe he kau akó ha taimi lahi ke akoako.
Fakaʻuhingaʻí
Taki fealēleaʻakí: Fakafeʻiloaki ʻa e tefito ki he ako fakataukei ko ʻení ʻaki hono vahevahe ʻa e ngaahi meʻa ko ʻení:
ʻOku finangalo ʻetau Tamai Hēvani ʻofá ke fetuʻutaki ʻEne fānaú mo Ia ʻi he lotu. ʻOku faʻa akoʻi ʻe he kau faifekaú ʻa e kakai ʻoku siʻisiʻi pe ʻikai haʻanau aʻusia ʻi he lotú.
Taki fealēleaʻakí: Fakaafeʻi e kau akó ke nau kumi ʻa e “Lēsoni 4—Ko e Hoko ko e Kau Ākonga ʻa Sīsū Kalaisí ʻi he Kotoa ʻo e Moʻuí” ʻi he vahe 3 ʻo e Malanga ʻAki ʻEku Ongoongoleleí. Tokoni ke nau kumi ʻa e ʻuluʻi tohi ko e “Faʻa Lotu” ʻi he peesi 88. Pea vahevahe ange leva ʻa e ngaahi fakahinohino ko ʻení:
Lau ʻa e konga ʻoku ui ko e “Faʻa Lotu” (Malanga ʻAki ʻEku Ongoongoleleí, 88). Kumi ha ngaahi fakahinohino ʻe lava ʻo tokoni atu ke ke akoʻi e niʻihi kehé ki he ʻuhinga ʻoku mahuʻinga ai ke lotú pea mo e founga ʻo e lotú.
-
Ko e hā naʻá ke ako fekauʻaki mo e mahuʻinga ʻo e lotú?
-
Ko e hā ha meʻa naʻá ke maʻu ʻe ala tokoni ke ʻiloʻi ʻe he niʻihi kehé ʻa e founga ke lotú?
Taki fealēleaʻakí: Fakakaukau ke fakaʻaliʻali e ngaahi fakahinohino ko ʻeni mei he konga ko ʻení ke lava e kau akó ʻo vakai ki ai lolotonga e ʻekitivitī akoakó:
-
Kamata ʻaki haʻo ui ki he Tamai Hēvaní.
-
Fakahaaʻi e ngaahi ongo hotau lotó, hangē ko e houngaʻia ʻi he ngaahi tāpuaki kuo tau maʻú.
-
Fai ha ngaahi fehuʻi, kole ha fakahinohino, mo kole ha ngaahi tāpuaki.
-
Fakaʻosi ʻaki haʻo pehē, “ʻI he huafa ʻo Sīsū Kalaisí, ʻēmeni.”
Fakatātaaʻi
Taki fealēleaʻakí: Fakatātaaʻi pe ʻe fēfē nai hano akoʻi ki ha taha ʻa e lotú. Fakamatalaʻi ko ha konga ʻo hoʻo fakatātaá ʻa e ʻuhinga ʻoku mahuʻinga ai ʻa e lotú pea mo e founga ʻo e lotú.
Te ke lava foki ʻo fakaʻaongaʻi ʻa e foʻi vitiō “Teaching about the Holy Ghost and Prayer: John” (ChurchofJesusChrist.org; mamata mei he taimi 2:46 ki he 5:00).
Ako Fakahoko
Taki fealēleaʻakí: Vahe ki he mēmipa takitaha ʻo e kalasí ha hoa pea vahevahe ʻa e ngaahi fakahinohino ko ʻení:
Taufetongi mo ho hoá ʻi hono feakoʻiʻaki fekauʻaki mo e lotú (vakai ki he ngaahi fakahinohino mei he peesi 88 ʻo e Malanga ʻAki ʻEku Ongoongoleleí ʻo ka fiemaʻu). Fakapapauʻi ke fakamatalaʻi fakatouʻosi ʻa e ʻuhinga ʻoku tau lotu aí mo e founga ʻo e lotú. Te ke lava foki ʻo fakamoʻoni ʻoku fanongo mo tali ʻe he ʻOtuá ʻa e ngaahi lotú.
Fakaʻaongaʻí
Taki fealēleaʻakí: Vahevahe ha fakaafe hangē ko ʻení ke tokoni ki he kau akó ke nau fakaʻaongaʻi e taukei ko ʻení:
Lolotonga e uike hono hokó, kumi ha faingamālie ke akoako ai hono akoʻi ha taha ʻi he founga ʻo e lotú. ʻE lava ke fai ʻeni mo ha mēmipa ʻo e fāmilí pe kaungāmeʻa kuó ne ʻosi ʻiloʻi e founga ʻo e lotú, pe kapau ʻokú ke ʻiloʻi ha taha ʻoku ʻikai maheni mo e founga ʻo e lotú, te ke lava ʻo akoʻi ia. Fakakaukau foki ki he founga te ke ala fakaleleiʻi ai hoʻo lotu fakatāutahá.