Ako Fakataukei Hono 8
Mānava ʻIloʻilo Pau
Lolotonga e ngāue fakafaifekaú pea ʻi heʻetau moʻui fakaʻahó, ʻoku angamaheni ke hoko ha ngaahi tūkunga fakamafasia. Ko e mānava ʻi he ʻiloʻilo paú ko ha founga ia te tau lava ʻo fakaʻaongaʻi ke fakasiʻisiʻi e loto-mafasiá mo fakatupu ha ongoʻi fiemālie.
Taki fealēleaʻakí: Feinga ke fakamatala nounou ʻa e konga “Fakaʻuhingaʻí” mo e “Fakatātaaʻí” koeʻuhí ke maʻu ʻe he kau akó ha taimi lahi ke akoako.
Fakaʻuhingaʻí
Taki fealēleaʻakí: Fakakaukau ke kole ki he kau akó ke nau talanoa fekauʻaki mo e founga ʻe lava ke uesia ai kitautolu ʻe he loto-mafasiá ʻi ha ngaahi founga lelei mo kovi fakatouʻosi. ʻO ka fiemaʻu, ʻe lava ke ke fakaʻaliʻali ʻa e fakamatala ko ʻení:
ʻE lava ke ʻomi ʻe hono aʻusia ʻa e loto-mafasiá ha ngaahi faingamālie ke tau tupulaki mo falala ai ki he ʻOtuá ke maʻu ha mālohi. Ka neongo ia, ʻe lava ke iku e ngaahi momeniti mafatukituki ʻo e loto-mafasiá pe toutou ongoʻi mafasia ʻi ha ngaahi vahaʻataimi lōloá ki ha ngaahi faingataʻa fakaesino mo fakaeloto.
Taki fealēleaʻakí: Lau pea aleaʻi fakataha e faleʻi ʻa e ʻEikí ʻi he Tokāteline mo e Ngaahi Fuakava 101:16. Fehuʻi ki he kau akó pe ʻoku nau ongoʻi ʻoku fakaʻaongaʻi fēfē ʻa e faleʻi ko ʻení ki he ngaahi tūkunga fakamafasiá, kau ai e ngaahi tūkunga te nau ala fehangahangai mo ia ʻi heʻenau hoko ko e kau faifekaú. Te ke lava ʻo fakafeʻiloaki ʻa e taukei ʻo e mānava ʻiloʻilo paú ʻaki hano fakaʻaliʻali ʻa e ngaahi meʻá ni:
Ko e founga lelei ʻe taha ke matuʻuaki ʻaki e ngaahi tuʻunga kovi ʻo e loto-mafasiá ko e fakamālohisino e mānavá. ʻE lava ke tokoni ʻa e mānavá ke fakanonga hotau ʻatamaí mo hotau sinó. ʻOkú ne toe fakaʻatā foki ke tau fakaleleiʻi ʻetau tokangá, mapuleʻi ʻetau ngaahi ongó, fakatupulaki ʻetau manatú, pea ongoʻingofua ange ʻa e ngaahi ueʻi ʻa e Laumālié.
Fakatātaaʻi
Taki fealēleaʻakí: Ko ha faʻahinga ʻeni ʻe ua ʻo e fakamālohisino mānavá te ke lava ʻo fakatātaaʻi:
Fili 1: Fakamānava loloa
Tangutu ʻi ha sea pea ʻai ke ke fiemālie. Fakapapauʻi ʻoku falala lelei ho tuʻá pea ʻoku tuʻu lelei ho vaʻé ʻi he falikí. Te ke lava ʻo ʻāʻā pe kuikui ho matá.
-
Sitepu 1: Mihi e mānavá ʻaki ho ihú pea lau māmālie ki he nima, ke fakafonu ho maʻamaʻá ʻaki e ʻeá.
-
Sitepu 2: Fakamānava loloa ʻi ha sekoni ʻe nima. Feinga ke fakaʻehiʻehi mei he tukuange fakaʻangataha e mānavá ʻi he sekoni kakato ʻe nimá.
-
Sitepu 3: Tukuange māmālie ho mānavá ʻaki ho ngutú ʻi ha sekoni ʻe nima.
-
Sitepu 4: Kiʻi taʻofi ai ʻi ha sekoni ʻe nima.
-
Sitepu 5: Toe fakahoko ʻa e sitepu 1 ki he 4 kae ʻoua kuó ke ongoʻi fiemālie.
Taki fealēleaʻakí: Te ke lava ʻo fakaʻaliʻali ʻa e fakatātā ko ʻení ke tokoni ke mahino lelei ange ki he kau akó ʻa e fakamālohisino mānava ko ʻení:
Fili 2: Fakamālohisino mānava ʻi he Fakaangaanga ki he Moʻui Fakafaifekaú
Taki fealēleaʻakí: Tokoni ke ʻilo ʻe he kau akó ʻa e Ko e Fakaangaanga ki he Moʻui Fakafaifekaú ʻi he Gospel Library (Laipeli > Ngaahi Tohi Tuʻutuʻuní mo e Ngaahi Uiuiʻí > Ngaahi Uiuiʻi Fakafaifekaú > Ko e Fakaangaanga ki he Moʻui Fakafaifekaú).
Kumi ʻa e ʻekitivitī “Ko e Fakamālohisino Mānavá” ʻi he konga “Ngaahi Tefitoʻi Moʻoni Fakalūkufua ki hono Mapuleʻi e Loto Mafasiá” ʻi he Ko e Fakaangaanga ki he Moʻui Fakafaifekaú ([2013], 18). Muimui ʻi he sitepu ʻe tolu ʻoku fakamatalaʻi ʻi he ʻekitivitií.
Ako Fakahoko
Taki fealēleaʻakí: Hili hono fakatātaaʻi ha foʻi fakamālohisino mānava ʻe taha pe fakatouʻosi pē, ʻoange ha taimi ki he kau akó ke nau akoako fakahoko ai ia. Te ke lava ʻo fakaafeʻi ke nau fakafuofuaʻi ʻenau ongoʻi loto-mafasiá pe loto-hohaʻá ʻi ha meʻafua ʻo e 1 ki he 5 kimuʻa pea ʻi he hili ʻa e fakamālohisino mānavá ke sio pe ʻoku nau fakatokangaʻi ha kehekehe.
Fakaʻaongaʻí
Taki fealēleaʻakí: Vahevahe ha fakaafe hangē ko ʻení ke tokoni ki he niʻihi ʻoku kau maí ke nau fakaʻaongaʻi e taukei ko ʻení:
Akoako ʻa e mānavá ʻi ha ngaahi miniti siʻi ʻi he ʻaho takitaha pea pehē ki ha faʻahinga taimi pē ʻokú ke aʻusia ai ʻa e loto-mafasiá. Fakatokangaʻi ʻa e ongo ʻokú ke maʻú ʻi hoʻo akoako fakahoko iá. Lotua e tokoni ʻa e Tamai Hēvaní ʻi hono tokangaʻi e ngaahi tūkunga fakamafasia ʻi hoʻo moʻuí.