Ako Fakataukei Hono 9
Fakaʻaongaʻi ʻa e Tekinolosiá ʻi he Māʻoniʻoni
ʻE lava ke ʻomi ʻe hono fakaʻaongaʻi ʻo e tekinolosiá ha ngaahi faingamālie mo ha ngaahi faingataʻa fakatouʻosi. ʻI hono fakaʻaongaʻi e tekinolosiá ʻi he māʻoniʻoní, te tau lava ʻo fakahoko lelei ange ai ʻa e ngaahi taumuʻa ʻa e ʻEikí maʻatautolu ko e kau faifekaú pea ʻi heʻetau moʻui fakaʻahó.
Taki fealēleaʻakí: Feinga ke fakamatala nounou ʻa e konga “Fakaʻuhingaʻí” mo e “Fakatātaaʻí” koeʻuhí ke maʻu ʻe he kau akó ha taimi lahi ke akoako.
Fakaʻuhingaʻí
Taki fealēleaʻakí: Fakafeʻiloaki ʻa e tefito ki he ako fakataukei ko ʻení ʻaki hono fakamatalaʻi ʻa e ngaahi meʻa ko ʻení:
ʻE lava ke hoko e ʻū meʻangāue fakaʻilekitulōnika hangē ko e telefoní mo e komipiutá ko ha meʻangāue mālohi ke paotoloaki e ngāue ʻa e ʻEikí, fakatupulaki ʻetau ngāue fakapotopotó, mo tanumaki ha ngaahi vā fetuʻutaki lelei. ʻOku lahi foki mo ha ngaahi ʻahiʻahi ʻoku haʻu fakataha mo e ʻū meʻangāue fakaʻilekitulōnika ko ʻení.
Lau ʻa e “Ko e Hā ʻOku Totonu Ke Ke Faí Kapau ʻOkú Ke Ongoʻi Vaivai pe Tākiekinangofua?” ʻi he vahe 2 ʻo e Malanga ʻAki ʻEku Ongoongoleleí ([2023], 24–25). Kumi ha tefitoʻi moʻoni ʻe tolu ʻe lava ʻo tokoni ke tau ikunaʻi e ngaahi ʻahiʻahi fekauʻaki mo hono fakaʻaongaʻi ʻo e tekinolosiá.
Taki fealēleaʻakí: Fakakaukau ke hiki e ngaahi tefitoʻi moʻoni ko ʻení ʻi he palakipoé:
-
Tefitoʻi Moʻoni 1: Tokanga telia hoʻo ngaahi fakakaukaú, ongó, mo e ʻulungāngá.
-
Tefitoʻi Moʻoni 2: Fili ke ngāue.
-
Tefitoʻi Moʻoni 3: Ako, fakatomala, mo fakalakalaka.
Fakatātaaʻi
Taki fealēleaʻakí: Vahevahe ha tūkunga hangē ko ʻení. Aleaʻi fakataha ʻa e ngaahi fehuʻí ke tokoni ke fakatātaaʻi ʻa e founga ʻe lava ke fakaʻaongaʻi ai ʻa e ngaahi tefitoʻi moʻoni ʻe tolú ʻi ha tūkunga moʻoni ʻo e moʻuí.
ʻOku ʻi ai ha keimi ʻa Sēmisi ʻi heʻene telefoní ʻokú ne saiʻia ke vaʻinga ai. ʻOkú ne faʻa toʻo hake ʻene telefoní ke keimi ai lolotonga e maʻu meʻatokoni efiafí, ʻi he lotú, pe lolotonga ʻene ʻi he kalasí he akó.
Tefitoʻi Moʻoni 1: Tokanga telia hoʻo ngaahi fakakaukaú, ongó, mo e ʻulungāngá.
-
Ko e hā ha ngaahi fakakaukau pe ongo te ne ala fakatupu ʻa Sēmisi ke ne fakahoko ʻení?
-
Ko e hā e meʻa ʻe ala mahuʻinga ke mahino kiate ia fekauʻaki mo ʻene fakaʻaongaʻi e tekinolosiá ʻi he ngaahi tūkunga ko ʻení?
Tefitoʻi Moʻoni 2: Fili ke ngāue.
-
Ko e hā ha ngaahi ngāue pau ʻe lava ke fai ʻe Sēmisi ke tokoniʻi ia ke ne kau lahi ange ʻi he ngaahi tūkunga fakasōsiale ko ʻení?
Tefitoʻi Moʻoni 3: Ako, fakatomala, mo fakalakalaka.
-
Ko e hā ha meʻa ʻe ala ako ʻe Sēmisi mei he meʻa naʻá ne aʻusiá ʻi heʻene feinga ke fakalakalaká?
Ako Fakahoko
Taki fealēleaʻakí: ʻOange ha taimi ki he kau akó ke nau akoako fakaʻaongaʻi ai e ngaahi tefitoʻi moʻoni ʻe tolú ki ha ngaahi tūkunga kehe. Te ke lava ʻo fakaʻaliʻali ʻa e ngaahi tūkunga ko ʻení pea vahevahe ʻa e kalasí ki ha fanga kiʻi kulupu iiki. Kole ki he kulupu takitaha ke nau fili ha tūkunga ʻe ua pe tolu pea aleaʻi pe ʻe fēfē hono fakaʻaongaʻi e ngaahi tefitoʻi moʻoni ʻe tolu ʻi he ngaahi tūkunga ne nau filí.
-
Naʻe mamata ʻa Sōfia ki ha fealeaʻaki ʻi he mītia fakasōsialé naʻe fakatupu ʻita kiate ia, pea ʻokú ne loto ke fai ha tali ki ai.
-
ʻI he taimi ʻoku taʻeoliʻia ai ʻa Kitioné, ʻokú ne faʻa ngāue ʻaki ʻene telefoní. Kimuí ni maí, kuo tohoakiʻi ia ke ne mamata ʻi he ponokalafí.
-
ʻOku faʻa fakafehoanaki ʻe Malia ʻa e tokolahi e kakai ʻoku saiʻia mo muimui ʻiate ia ʻi he mītia fakasōsialé ki he tokolahi ʻo e kakai ʻoku saiʻia mo muimui ʻi hono ngaahi kaungāmeʻá.
-
ʻI he taimi ʻoku lue takai holo ai ʻa Lūkasí, ʻokú ne meimei fanongo maʻu pē ki he mūsiká ʻaki ʻene meʻa-fanongo fasí.
-
ʻOku faʻa ʻā fuoloa ʻa ʻAmali ʻo vaʻinga keimi vitiō.
Taki fealēleaʻakí: Kapau ʻoku toe lahi e taimí, fakaafeʻi ha kau ako tokosiʻi ke nau vahevahe ha tūkunga ne nau aleaʻi ʻi heʻenau kulupú mo e founga naʻa nau fakaʻaongaʻi ai e ngaahi tefitoʻi moʻoni ʻe tolú ʻi he tūkunga ko iá.
Fakaʻaongaʻí
Taki fealēleaʻakí: ʻOange ha taimi ki he niʻihi ʻoku kau maí ke nau fakakaukau ki he founga te nau lava ai ʻo fakaʻaongaʻi ʻa e ngaahi tefitoʻi moʻoni ʻe tolu ko ʻení ʻi heʻenau moʻuí. Fakaafeʻi ke nau fokotuʻu ha taumuʻa ki hono fakaʻaongaʻi ʻa e tekinolosiá ʻi he māʻoniʻoní pea ngāue ke fakahoko ia.