Ako Fakataukei 1
Fakafeʻiloaki e Tohi ʻa Molomoná ki he Kakaí
Kuo foaki mai ʻe he ʻEikí ʻa e Tohi ʻa Molomoná ke tokoni ki he fakauluí. ʻE lava ke tokoni ʻa e ʻekitivitī ko ʻení ki he kau akó ke nau akoako vahevahe mo e niʻihi kehé ha talateu nounou ki he Tohi ʻa Molomoná.
Taki fealēleaʻakí: Feinga ke fakamatala nounou ʻa e konga “Fakaʻuhingaʻí” mo e “Fakatātaaʻí” koeʻuhí ke maʻu ʻe he kau akó ha taimi lahi ke akoako.
Fakaʻuhingaʻí
Taki fealēleaʻakí: Fakafeʻiloaki ʻa e tefito ki he ako fakataukei ko ʻení ʻaki hono fakamatalaʻi ʻa e ngaahi meʻa ko ʻení:
“Ko e Tohi ʻa Molomoná, ʻi hono fakatahaʻi mo e Laumālié, ko hoʻo mauʻanga tokoni mālohi taha ia ʻi he fakauluí” (Malanga ʻAki ʻEku Ongoongoleleí [2023], 127). ʻI hoʻo hoko ko e faifekaú, te ke maʻu ai ha ngaahi faingamālie lahi ke fakafeʻiloaki ʻa e kakaí ki he Tohi ʻa Molomoná.
Fakakaukauloto ʻoku ʻi ai haʻo kaungāmeʻa ʻokú ne fehuʻi atu, “Ko e hā ʻa e Tohi ʻa Molomoná?”
-
Kapau ko ha miniti pē ʻe taha pe ua ʻoku tuku atu ke ke tali aí, ko e hā ha niʻihi ʻo e ngaahi meʻa mahuʻinga taha ke mahino kiate kinautolú?
Taki fealēleaʻakí: Fakakaukau ke hiki ʻi he palakipoé ʻa e tali ʻa e kau akó ki he fehuʻi kimuʻá. Fakamatalaʻi ange ko e taimi ʻoku fakafeʻiloaki ai e kakaí ki he Tohi ʻa Molomoná, ʻe ala tokoni ke tokanga taha ki he meʻa ʻoku mahuʻinga tahá. ʻE lava ke maʻu ʻa e ngaahi meʻa faingofua ʻe lava ke tau tokanga taha ki aí ʻi he ʻuluʻitohi “Ko e Fakafeʻiloaki ʻo e Tohi ʻa Molomoná ki he Kakaí” ʻi he “Lēsoni 1—Ko e Pōpoaki ʻo Hono Fakafoki Mai ʻo e Ongoongolelei ʻo Sīsū Kalaisí” (Malanga ʻAki ʻEku Ongoongoleleí, vahe 3, 49). Fakaafeʻi e kau mēmipa ʻo e kalasí ke nau kumi ʻa e ʻuluʻitohi ko ʻení. Pea vahevahe ange leva ʻa e ngaahi fakahinohino ko ʻení:
Lau ʻa e “Ko e Fakafeʻiloaki ʻo e Tohi ʻa Molomoná ki he Kakaí” ʻi he puha “Ngaahi Fakakaukau ki he Akoʻí” (Malanga ʻAki ʻEku Ongoongoleleí, 49). Kumi ha ngaahi meʻa ʻaonga ke ke tokanga taha ki ai ʻi hono fakafeʻiloaki e kakaí ki he Tohi ʻa Molomoná.
Taki fealēleaʻakí: Fakaafeʻi e kau akó ke vahevahe e meʻa ne nau maʻú. Kapau ʻe fiemaʻu, te ke lava ʻo fakatonutonu ʻa e lisi naʻá ke faʻu kimuʻa ʻi he palakipoé.
Fakatātaaʻi
Taki fealēleaʻakí: Fakatātaaʻi ha sīpinga ʻo e founga ke fakafeʻiloaki ai ʻa e niʻihi kehé ki he Tohi ʻa Molomoná. Te ke lava ʻo fai ʻeni ʻaki haʻo fakafeʻiloaki e Tohi ʻa Molomoná ki he kalasí, pe te ke fakaafeʻi ha mēmipa ʻo e kalasí ke haʻu ki muʻa ʻi he lokí ke ke lava ʻo fakatātaaʻi hono fakafeʻiloaki ʻo e tohí kiate kinautolu.
Ko ha founga ʻe taha ko hano fakaʻaliʻali ʻo e “What is the Book of Mormon? A 60-Second Overview” (1:08) pe ko e “What is the Book of Mormon about?” (1:53). ʻOku maʻu atu e ongo vitioó ʻi he ChurchofJesusChrist.org. ʻE lava ke kumi ʻe he kau mēmipa ʻo e kalasí ha ngaahi fakakaukau te nau lava ʻo fakakau ʻi heʻenau ngaahi fakafeʻiloakí.
Ako Fakahoko
Taki fealēleaʻakí: Vahevahe ʻa e ngaahi fakahinohino ko ʻení. ʻOange ha taimi ki he kau akó ke nau teuteu mo akoako fakahoko ai.
Teuteu ke fakafeʻiloaki ʻa e Tohi ʻa Molomoná ki ha taha ʻaki haʻo fai e ngaahi meʻá ni:
-
Hiki ha ngaahi tefitoʻi fakakaukau te ke lava ʻo vahevahe, kau ai ʻa e ʻuhinga ʻo e Tohi ʻa Molomoná mo e founga kuó ne tākiekina fakataautaha ai koé.
-
Fakaʻaongaʻi ha miniti nai ʻe 1–2 ke mo taufetongi mo ha taha hono fakafeʻiloaki ʻo e Tohi ʻa Molomoná.
Taki fealēleaʻakí: Hili hono akoako fakahoko ʻe he kau mēmipa ʻo e kalasí, te ke lava ʻo fakaafeʻi kinautolu ke fakapapauʻi pe ko e hā ha ngaahi liliu te nau fai ki he founga ne nau fakafeʻiloaki ai e Tohi ʻa Molomoná. Te ke lava leva ʻo vahe kinautolu ke nau ngāue mo ha hoa kehe pea fakaafeʻi ke nau toe ako fakahoko e meʻa tatau.
Fakaʻaongaʻí
Taki fealēleaʻakí: Vahevahe ha fakaafe hangē ko ʻení ke tokoni ki he kau akó ke nau fakaʻaongaʻi ʻa e taukei ko ʻení:
Kumi ha faingamālie ke fakafeʻiloaki ai ʻa e Tohi ʻa Molomoná ki ha taha ʻi he ʻaho ʻe taha pe ua ka hoko maí. ʻE lava pē ko ha taha ʻeni ʻoku ʻikai ke maheni mo e tohí, pe te ke akoako fakafeʻiloaki mo ha kaungāmeʻa pe mēmipa ʻo e fāmilí.